2001 წელს, აშშ-ს საზღვაო ფლოტიდან წამოსვლის შემდეგ, ყოფილი სსრკ-ის და მოკავშირე ქვეყნების მდგომარეობით დავინტერესდი, როდესაც ისინი დემოკრატიულ საზოგადოების მშენებლობის გზას დაადგნენ. სწორედ ამ ინტერესმა განაპირობა, რომ დოქტორანტურა ბულგარეთში, წმინდა კლიმენტ ოჰრიდსკის უნივერსიტეტში გავაგრძელე.
2006 წელს მეგობრის დაბადების დღეზე ვიყავი გერმანიაში, სადაც ტრადიციული ცეკვის ანსამბლმა იცეკვა საქართველოდან. მათ ჩემზე დიდი შთაბეჭდილება მოახდინეს, მეგობარს ანსამბლის შესახებ გამოვკითხე. საქართველოს და ქართველი ხალხის მიმართ მისი აღფრთოვანება მეც გადმომედო. ასე დაიწყო ჩემი გატაცება კავკასიის რეგიონის მიმართ და ჩემი გამორჩეული ურთიერთობა ქართველ ხალხთან. 2010 წელს გავიცანი ვაშინგტონში საქართველოს ელჩი ბათუ ქუთელია. მას შევთავაზე სამხრეთ კაროლინაში (სადაც მე ვცხოვრობ) ცნობილ Spoleto Festival USA-ში ქართველების მონაწილეობა. ფესტივალში საქართველოს ნაციონალური ბალეტი ჟიზელის პარტიით წარსდგა. ბევრმა ბალერინამ იცეკვა, მაგრამ ცოტამ თუ მიაღწია პრიმა ბალერინა ნინა ანანიაშვილის მიერ დრამატული ოსტატობის კომბინაციას. 2010 წელს ელჩმა ქუთელიამ შემომთავაზა საქართველოს საპატიო კონსულობა სამხრეთ კაროლინაში. მას დავთანხმდი და ამაყად შევუდექი მოვალეობის შესრულებას. აქტიურად ჩავერთე ამერიკულ და ქართულ კომპანიებს შორის ბიზნეს ურთიერთობების განვითარებაში, ქართული კულტურის ცნობიერების ამაღლებაში, დიასპორის დახმარების პროექტებში, ასევე საერთაშორისო საგანმანათლებლო პროგრამებში. ამჟამად ჩართული ვარ საქართველოში აკადემიურ საქმიანობაში, განსაკუთრებით კავკასიის უნივერსიტეტში. როგორც მოწვეულმა ლექტორმა, ამ ინსტიტუტის საპატიო დოქტორის წოდება 2011 წელს მივიღე. ეს იყო ძალიან მნიშვნელოვანი გამოცდილება, განსაკუთრებით იმის ხილვა, თუ როგორ იზრდებიან და ვითარდებიან სტუდენტები. 2021 წელს შევუერთდი საქართველოს დაჭრილ მეომრების მხარდაჭერის ფონდის გამგეობას.
საქართველოს დიდი ისტორია აქვს, როგორც შეერთებული შტატების და ნატოს მტკიცე მოკავშირეს, ქართველი ჯარისკაცი მუდამ ფრონტის ხაზზე დგას, ის უფრო მეტი გამბედაობით და სიმტკიცით მსახურებს, ვიდრე სხვა. არასოდეს ნებდება და ბევრჯერ გადაიხადა ძალიან მაღალი ფასი. მამაცმა კაცებმა და ქალებმა, რომლებსაც საქართველოს ფორმა აცვიათ, მსოფლიოში თავისუფლებისა და დემოკრატიის უზრუნველყოფის მიზნით ძალიან ბევრი გასცეს. საქართველო, როგორც აშშ-ს მოკავშირე ტერორიზმის წინააღმდეგ ომში, იყო მესამე უმსხვილესი კონტრიბუტორი ერაყის ომში და წარმოადგენდა ერთ სულ მოსახლეზე ყველაზე დიდ კონტრიბუციას ავღანეთში აშშ-ის მისიაში. ათასობით ქართველმა ჯარისკაცმა სიცოცხლე შესწირა, მაგრამ, სამწუხაროდ, დაჭრილ ვეტერანთა უმრავლესობას არ მიუწვდება ხელი აუცილებელ მკურნალობაზე, თერაპიის გაგრძელებაზე თუ სხვა დახმარებაზე. ჩვენს ფონდს რამდენიმე მიზანი აქვს: დაჭრილი მეომრების მხარდაჭერა და უმაღლესი განათლების დაფინანსება.
საქართველო საოცარი ქვეყანაა თავისი მდიდარი ისტორიით, ხშირად მღელვარე, მაგრამ ყოველთვის საინტერესო ფაქტებით. წმინდა ნინო, დავით აღმაშენებელი, თამარ მეფე, სულხან-საბა ორბელიანი, შოთა რუსთაველის ვეფხისტყაოსანი, ნადირობის ქალღმერთი დალი და დემონების მკვლელი კოპალა, ჩემთვის ნამდვილი ლეგენდები არიან.
დამოუკიდებლობის აღდგენის შემდეგ, საქართველო აქტიურად აგრძელებს მყარ ურთიერთობებს დასავლურ ინსტიტუტებთან. საბჭოთა ბატონობის ოთხმოცდაათი წლის შემდეგ, ქართველებს ესმით თავისუფლების მნიშვნელობა. ბევრ გამოწვევას ხვდებიან, რათა რეგიონში დემოკრატიისა და სოციალური ტრანსფორმაციის სტანდარტები დაადგინონ. ჯერ კიდევ მიმდინარეობს მუშაობა ბევრ სექტორში, მაგრამ ბოლო ორი ათწლეულის განმავლობაში საქართველომ მიაღწია წარმოუდგენელ პროგრესს, ანტიკორუფციულ რეფორმებში, ინფრასტრუქტურულ პროექტებში, განათლებასა და მედიცინაში. ბევრი შესაძლებლობა არსებობს, რომ ქვეყნის შიდა და საგარეო პოლიტიკა გაძლიერდეს. საქართველოს აქვს დიდი შესაძლებლობები განათლების სისტემაში, როგორც უმაღლეს, ასევე პროფესიულ განათლებაში. მომდევნო წლების განმავლობაში საზღვარგარეთ სწავლის პროგრამები არსებითად უნდა გაიზარდოს, რაც მნიშვნელოვნად გააღრმავებს საერთაშორისო გაგებას კავკასიის რეგიონის მიმართ.
აშშ-სა და საქართველოს მცირე და საშუალო ბიზნესს შორის კომერციული ურთიერთობების გაფართოება გააძლიერებს საქართველოს ეკონომიკას, განსაკუთრებით კი საშუალო ფენას. ეს არა მხოლოდ ხელს შეუწყობს საერთაშორისო მეწარმეობის წახალისების ატმოსფეროს ჩამოყალიბებას, არამედ მოხდება საქართველოსთვის ძირეული პოლიტიკური მხარდაჭერა, რადგან ბიზნესის მფლობელები ზრუნავენ საქართველოზე და როგორც გავლენიანი ამომრჩევლები, აკავშირებენ მას თავიანთი კონგრესის წევრებთან. მიუხედავად იმისა, რომ ჩემი ცოდნა საქართველოს სოფლის მეურნეობის სექტორების მიმართ მწირია, მიმაჩნია, რომ რამდენიმე ინიციატივის განხორციელება შეიძლება მაინც ღირდეს. მაგალითად, მსხვილფეხა რქოსანი პირუტყვის შეჯვარების ეფექტური პროგრამა იქნება მეცხოველეობის წარმოებაში, ხოლო სატყეო მენეჯმენტის გაძლიერება ხელს შეუწყობს ხე-ტყისა და ხის პროდუქტების ექსპორტის ზრდას.
ტურიზმი საქართველოში მნიშვნელოვანი ინდუსტრიაა. აშშ-დან დასავლეთ ევროპის, თურქეთის ან ახლო აღმოსავლეთის გავლით ფრენების დრო ხშირ შემთხვევაში ძალიან მოკლე ან ძალიან გრძელია, მაგრამ ბევრად უფრო პრობლემურია დილით ადრე ჩამოსვლის/გასვლის დრო თბილისში, რაც იწვევს ტურისტებისთვის დისკომფორტს. მგზავრობის სიმარტივე გააუმჯობესებდა შვებულების საქართველოში გატარების სურვილს. სხვაგვარად ამერიკაში მოგზაურობა უფრო მოსახერხებელი ვერ გახდება. 2022 წელს შეერთებულ შტატებსა და საქართველოს შორის დიპლომატიური ურთიერთობების ოცდაათი წელი შესრულდა. ორივე ქვეყანამ უნდა იზეიმოს ეს მნიშვნელოვანი თარიღი, რაც საქართველოს ეკონომიკური და დემოკრატიული პროგრესის მიღწევაში უნდა გამოიხატოს. ვიმედოვნებ, საქართველო მიაღწევს სრულ ინტეგრაციას ევროპულ საზოგადოებაში და დაამყარებს ორმხრივ ურთიერთობებს საერთაშორისო ვაჭრობის გასაძლიერებლად, როგორიც არის თავისუფალი ვაჭრობის შეთანხმება აშშ-თან. უნდა მოხდეს მეტი ინიციატივის წახალისება აშშ-საქართველოს შორის მცირე და საშუალო ბიზნეს ურთიერთობების გასაძლიერებლად. 2008 წლის აგვისტოში რუსეთი საქართველოში შემოიჭრა და დღემდე ოკუპირებულია სამხრეთ ოსეთი და აფხაზეთი. მიუხედავად იმისა, რომ აშშ და სხვა დასავლური ქვეყნები გმობენ უკანონო ოკუპაციას, ჯერ არ მომხდარა რუსული ძალების გაყვანა საქართველოს ტერიტორიიდან. გისურვებთ საქართველოს ტერიტორიული მთლიანობის აღდგენას! ძალა ერთობაშია!
