საქართველოს მთავრობაში რამდენიმე ადამიანი იღებს გადაწყვეტილებას“

"საქართველოს მთავრობაში რამდენიმე ადამიანი იღებს გადაწყვეტილებას“ - ინვესტორი ნიდერლანდებიდან

дата: 607

#ინვესტორისხმა - ასე ჰქვია გადაცემა „Forbes კვირისა" და TheCheckpoints-ის ახალ რუბრიკას, რომლის ფარგლებშიც BMG-ის ბელგიელი ჟურნალისტი გიომ მულარტი საქართველოს ბიზნესგარემოზე უცხოელი ინვესტორების მოსაზრებებს თუ შეფასებებს მოისმენს და გაგიზიარებთ.

58 წლის გროდ ვან ილი ნიდერლანდების სამეფოდანაა. მისთვის ყოფილი საბჭოთა კავშირის ქვეყნები ნაცნობია. ის 20 წელზე მეტია საქართველოში ბევრ დიდ პროექტშია ჩართული, მაგალითად, როგორც ჟაკ ფლერი - "ბორჯომში." ასევე უძრავი ქონებისა და სავაჭრო ცენტრების მიმართულებითაც საქმიანობს.

გროდ ვან ილი BMG-სთან იმ გამოწვევებზე საუბრობს, რაც საქართველოში ბიზნესის კეთების მიმართულებით არსებობს. ბიზნესმენს ერთ-ერთ მთავარ პრობლემად გადაწყვეტილებების მიღების გაჭიანურებაა. მას რჩება შთაბეჭდილება, რომ ამ ქვეყანაში გადაწყვეტილებებს მხოლოდ რამდენიმე ადამიანი იღებს. „მე ერთ-ერთ პროექტში ვარ ჩართული, რომელიც ცდილობს „მაკდონალდსის“ დრაივ-ინის აშენებას. ექვს თვეზე მეტია ველოდებით ნებართვას, რადგან სახელმწიფო გვეუბნება, რომ დრაივ-ინის გზაზე მოძრაობა არ არის სწორად დალაგებული“, - ყვება ის.

„ვფიქრობ, ეს მნიშვნელოვანია. შეგიძლია გააკეთო ის, რაც გინდა, მაგრამ შენ თვითონ უნდა გააკეთო. ნუ ელით, რომ მთავრობა, ადგილობრივი ხელისუფლება დაგეხმარებათ. როდესაც გვერდით გყავს სწორი ხალხი, სწორი პარტნიორები, შეიძლება სულაც არ იყვნენ ქართველი პარტნიორები, აქ ბევრი რამის გაკეთება შეგიძლია. მაშინაც კი, თუ არ დაგეხმარებიან, შენს საწინააღმდეგოდ მაინც არ იმოქმედებენ. ვფიქრობ, ეს მნიშვნელოვანია.

საბანკო სისტემა აქ საკმაოდ დახვეწილია. გარემო ძალიან, ძალიან სასიამოვნოა. კარგი კლიმატია. არ ვიცი ეს რამდენადაა ინვესტიციის ჩადების მოტივი, მაგრამ ეს ქვეყნისთვის პლუსია. ცხადია, უარყოფითი გარემოებებიც არსებობს. მე გაგაფრთხილებდით, რომ არ მოელოდეთ მთავრობისგან დიდ დახმარებას. მიუხედავად იმისა, რომ ისინი აქტიურად ამბობენ, რომ დაგეხმარებიან, ეს მაინც რთული საკითხია;

როდესაც ქართველ ხალხთან მუშაობთ, მათ ყოველთვის სურთ თავიანთი ოჯახის ჩართვა ბიზნესში. როდესაც თქვენ გყავთ პარტნიორი ან ადამიანი, რომელთან ერთადაც გარკვეულ საქმიანობაში ხართ ჩართული, ისინი ყოველთვის წარგიდგენენ თავიანთ ოჯახის წევრს, რომელიც, როგორც წესი, სულაც არ არის შესაფერისი სამუშაოსთვის. ქართველები არ არიან პუნქტუალურები. ასე რომ, თუ ერთი საათს დააგვიანებენ... ასე ხდება ხოლმე.

ქვეყნაში არსებობენ პროფესიონალები. მაგრამ, უნდა ვთქვა, სახლი არ ააშენებინოთ ქართველს, სახლის შენება დაასრულებინეთ ქართველს, რადგან ისინი ნიჭიერი და არტისტულები არიან - მხატვრობაში, ხელოვნებაში, მუსიკაში... ამ შენობასაც თუ შეხედავთ, მიხვდებით როგორ შეასრულეს. მათ ამის გაკეთება ნამდვილად შეუძლიათ. ჩამოიტანეთ თქვენი უნარები, იდეები და ფული, მაგრამ იპოვნეთ სწორი პარტნიორი. არ დაიწყოთ ბიზნესი მარტომ. არ გირჩევდით უბრალოდ ფულის ჩადებას და წასვლას. დარჩით ან იპოვნეთ ვინმე სანდო ადამიანი, რომელიც აქ ორ წელზე მეტია ცხოვრობს.

ადამიანი, რომელმაც იცის ბიზნესი, ადამიანი, რომელსაც ენდობით. იპოვნეთ სწორი პარტნიორი. ეს არ არის ახალი ქვეყანა, მაგრამ ის განვითარების შუა ეტაპებზეა. საქართველო არ არის ისე შორს, როგორც რუსეთია და მას სურს იყოს ევროპასთან ახლოს. შესაბამისად, საქართველო ცდილობს ევროპული სტანდარტების დანერგვას. ბანკები ევროპული სტანდარტებისაა. მე ვიტყოდი, რომ რეგისტრაციის სისტემა აქ ძალიან მარტივია.

სიმართლე გითხრათ, ბოლო ორი, სამი წლის განმავლობაში, ჩვენ ვხედავთ გარკვეულ პოლიტიკურ კრიზისს, არჩევნებისა და თავად მთავრობის კომპეტენციის გამო. ვფიქრობ, მთავრობაში მხოლოდ რამდენიმე ადამიანი იღებს გადაწყვეტილებას. ეს ნიშნავს, რომ ბევრი ადამიანი არ იღებს ამ გადაწყვეტილებებს და ხალხს ეშინია გადაწყვეტილებების მიღების. მე ერთ-ერთ პროექტში ვარ ჩართული, რომელიც ცდილობს „მაკდონალდსის“ დრაივ-ინის აშენებას. ექვს თვეზე მეტია ველოდებით ნებართვას, რადგან სახელმწიფო გვეუბნება, რომ დრაივ-ინის გზაზე მოძრაობა არ არის სწორად დალაგებული. ჩვენ მივმართეთ საქართველოში არსებულ ერთადერთ ექსპერტს, რომელიც სახელმწიფოს ხშირი მრჩეველია მსგავს საკითხებში. მან თქვა, რომ ყველაფერი რიგზეა, მაგრამ სადღაც მთავრობის შიგნით, ადგილობრივი ხელისუფლების შიგნით, ვინც გადაწყვეტილება უნდა მიიღოს, ვერ ბედავს ამ გადაწყვეტილების მიღებას. ეს არის პრობლემა. ეს ხდება იმიტომ, რომ იერარქიაში ამ ადამიანის ზემოთ მდგომი პირი ალბათ შვებულებაშია ან სხვა მიზეზითაა შეფერხებული. ეს ტიპიური საქართველოს ქეისია ამ მომენტისთვის. სიმართლე გითხრათ, ადრე ამაზე უკეთესი ვითარება იყო. ახლა ხალხს ეშინია გადაწყვეტილების მიღების. ყველაფერი კი ნებართვების საფუძველზე ხდება. აქ ნებართვის გარეშე ვერაფერს გააკეთებ. ზოგჯერ, ეს ნებართვა სწრაფად მოდის, ზოგჯერ კი წლები სჭირდება“, - აცხადებს გროდ ვან ილი.

bm.ge

культура

პარიზის წიგნის ფესტივალზე საქართველოს მწერალთა სახლი ეროვნული სტენდით პირველად არის წარმოდგენილი

კულტურის სამინისტროს მხარდაჭერით 12-14 აპრილს საქართველოს მწერალთა სახლი 2024 წლის პარიზის წიგნის ფესტივალზე ეროვნული სტენდით პირველად მონაწილეობს.

Grand Palais Éphémère–ში ფესტივალისა და საქართველოს ეროვნული სტენდის გახსნას მწერალთა სახლის დირექტორი ქეთევან დუმბაძე, საქართველოს საგანგებო და სრულუფლებიანი ელჩი საფრანგეთის რესპუბლიკაში გოჩა ჯავახიშვილი და ლიტერატურული სფეროს წარმომადგენლები ესწრებოდნენ.

საქართველოს ეროვნული სტენდის პრეზენტაცია გაიმართა ღონისძიებით - „ჰაგიოგრაფიიდან პოსტმოდერნიზმამდე“. მწერალთა სახლის სტენდის სტუმრებს, ქართული მწერლობის გაცნობასთან ერთად, საინტერესო კალიგრაფიულ აქტივობაში ჩართვის შესაძლებლობა ჰქონდათ. კალიგრაფმა გიორგი სისაურმა მათ ქართული ანბანით დაუწერა სასურველი სიტყვები, გამონათქვამები, ფრაზები, სახელები და ა. შ. ასევე გაიმართა ღონისძიება, სახელწოდებით, „თექვსმეტსაუკუნოვანი უწყვეტი ლიტერატურული პროცესი“, რომელიც განიხილავს ქართულ ლიტერატურას, ქართულ-ფრანგულ ლიტერატურულ ურთიერთობებსა და ქართული და ევროპული ლიტერატურის კავშირს.

პირველ საფესტივალო დღეს გამართულ პანელ-დისკუსიაში მონაწილეობა მიიღეს საქართველოს საგანგებო და სრულუფლებიანმა ელჩმა საფრანგეთის რესპუბლიკაში გოჩა ჯავახიშვილმა და ფრანგული ფილოლოგიის დოქტორმა, პროფესორმა, ივანე ჯავახიშვილის სახელობის თბილისის სახელმწიფო უნივერსიტეტის რომანული ფილოლოგიის ფაკულტეტის ხელმძღვანელმა ბელა ხაბეიშვილმა. შეხვედრას ასევე ესწრებოდნენ უცხოელი გამომცემლები, ლიტერატურული აგენტები, მედიის წარმომადგენლები და ქართული სათვისტომოს საპატიო წევრები.

ფესტივალის მსვლელობისას ქართულ სტენდზე დაგეგმილია არაერთი აქტივობა და საქმიანი შეხვედრა - PUBLISHERS MATCHMAKING. შეხვედრის მონაწილეები იქნებიან საქართველოს მწერალთა სახლი, ქართული გამომცემლობები: „სეზან ფაბლიშინგი“, „მედუზა,“ „ბაკმი“ და მთარგმნელები - მაია ვარსიმაშვილი და მაია გიორხელიძე. შეხვედრაზე განიხილავენ ქართული ლიტერატურის კატალოგს. მთარგმნელი დალი იაშვილი წარადგენს მიხეილ ჯავახიშვილის მოთხრობას - „ლამბალო და ყაშა“ და მოთხრობების კრებულს. მთავარ სცენაზე გაიმართება წიგნის - „მზე, მთვარე და პურის ყანა“ წარდგენა. წიგნს წარადგენენ ავტორი - მწერალი და კინორეჟისორი თემურ ბაბლუანი და ეროვნული კინოცენტრის წარმომადგენელი ევროპაში სოფიო ბაბლუანი. ქართველ გამომცემლებთან ერთად საქართველოს სტენდთან იქნებიან ფრანგული გამომცემლობები: LE CHERCHE MIDI, GINGKO, EDITIONS DES CARNETS DU DESSERT DE LUNE, MEDUZA, და იტალიური გამომცემლობა MODERN TIMES, რომლებიც წარმოადგენენ ფრანგულად თარგმნილ კლასიკურ და თანამედროვე ქართულ პროზასა და პოეზიას.

საქართველოს ეროვნულ სტენდზე წარმოდგენილი იქნება ბუკლეტი ქართველი ავტორების 50-ამდე ნამუშევრის სინოპსისითა და ამონაბეჭდებით ისეთი ცნობილი ნაწარმოებებიდან, როგორიც არის „შუშანიკის წამება“, „ვეფხისტყაოსანი“ და სხვა.

აღსანიშნავია, რომ პარიზის წიგნის ბაზრობა ევროპის ერთ-ერთი ყველაზე მნიშვნელოვანი კულტურული მოვლენაა, რომელიც ყოველწლიურად გაზაფხულზე იმართება და მასში მონაწილეობას 1 200 გამომცემელი და 2 000 ავტორი იღებს. საქართველოს წელს პირველად მიეცა საშუალება, საკუთარი სტენდით ჩაერთოს საფესტივალო აქტივობებში.

ფესტივალში ეროვნული სტენდით მონაწილეობა საქართველოსთვის ძალიან მნიშვნელოვანია.

საფესტივალო აქტივობები მწერალთა სახლს, ქართველ მწერლებსა თუ გამომცემლებს დაეხმარება ლიტერატურული ურთიერთობების წარმართვაში, ქართული მწერლობის პოპულარიზაციაში, ახალი კონტაქტების მოძიებასა და მთარგმნელობითი საქმიანობის ხელშეწყობაში.