საქართველოს ეროვნული ბოტანიკური ბაღის დირექტორი ირინე დანელია გაცნობითი ვიზიტით პალერმოს უნივერსიტეტის ბოტანიკურ ბაღს ეწვია
ვიზიტის ფარგლებში საქართველოს ეროვნულ ბოტანიკურ ბაღსა და პალერმოს ბოტანიკურ ბაღს შორის ურთიერთთანამშრომლობის ხელშეკრულებას მოეწერა ხელი
შეხვედრა ორგანიზებული იყო ხმელთაშუაზღვეთის ფიტოტაქსონომიური კვლევის ორგანიზაციის ''OPTIMA'' ჩართულობით, რომელშიც საქართველოს ეროვნული ბოტანიკური ბაღი 2019 წლიდან არის გაერთიანებული როგორც ინსტიტუციური წევრი. შეხვედრას ესწრებოდა OPTIMA-ს მდივანი ჯანიანტონიო დომინა
თანამშრომლობა მიზნად ისახავს გამორჩეულ მცენარეთა კოლექციების გაცვლას, ერთობლივ სამეცნიერო და საგანმანათლებლო პროექტების ორგანიზებასა და თანამშრომლობას კავკასიისა და ხმელთაშუაზღვეთის ფლორის კვლევებში
მთელს მსოფლიოში ბოტანიკური ბაღები მნიშვნელოვან როლს ასრულებენ მცენარეთა მრავალფეროვნების მეცნიერულ შესწავლასა და კონსერვაციაში, შეგროვებასა და შენარჩუნებაში, გარემოსდაცვითი ცნობიერების ამაღლებაში
პალერმოს ბოტანიკური ბაღი იტალიის მნიშვნელოვანი კვლევითი და საგანმანათლებლო დაწესებულებაა, რომელიც ევროპის ერთ-ერთ უძველეს ისტორიულ ბაღად არის ცნობილი
ბოტანიკური ბაღის დირექტორმა, ირინე დანელიამ პალერმოს ბოტანიკური ბაღის დირექტორს, როსსარიო სკიკისს და ბაღის კოლექტივს პროფესიული წარმატებები უსურვა. აღინიშნა, რომ ურთიერთთანამშრომლობის მემორანდუმი მნიშვნელოვანი ნაბიჯია ერთობლივი ახალი სამეცნიერო პროექტების განვითარებისთვის.
