ევროპის ახალგაზრდული ჩემპიონატის ჯგუფური ეტაპის პირველ ტურში საქართველოს ნაკრებმა პოლონეთი 2:1 დაამარცხა.

პირველ ტაიმში თანაბარი თამაში იყო, თუმცა მომენტები მხოლოდ პირობითმა მასპინძლებმა შექმნეს - მოსურმა და კოზუბალმა ბურთი ძელს გაარტყეს. საქართველოს ნაკრებს ბურთის დაჭერა და მეტოქის კარზე იერიშების მიტანა უჭირდა, თუმცა 55-ე წუთზე მაინც მოახერხა დაწინაურება და თავი ტრადიციულად ლომინაძემ გამოიჩინა. აქედან მოყოლებული პოლონელებმა დიდი ძალებით შემოგვიტიეს, კალუაზინსკის დარტყმულ ბურთს კარის წინ აზაროვი გადაეღობა. შემდეგ საჯარიმოს ხაზზე სიგუასთან ბრძოლაში ფორნალჩიკი წაიქცა, მსაჯმა ცოტა არ იყოს საეჭვო პენალტი დანიშნა და კალუაზინსკიმ ანგარიში გაათანაბრა. მორიგ ეპიზოდში ხარატიშვილმა პედას არ გაატანინა, ხოლო კომპენსირებულ დროში მაისურაძემ ბოლომდე იბრძოლა და მისი პასით იაროშის კარი გორდეზიანმა დალაშქრა. ბოლოს პირისპირ გასულ რაკოჩის დარტყმული ბურთი ხარატიშვილმა მოიგერია და გავიმარჯვეთ.

 მატჩის საუკეთესო ფეხბურთელად მაისურაძე დაასახელეს.

 14 ივნისს, მეორე ტურში საქართველოს ნაკრები საფრანგეთს დაუპირისპირდება, რომელიც პარალელურ შეხვედრაში პორტუგალიას ფრედ, 0:0 ეთამაშა.

 ჟილინა. „პოდ დუბნიომი“

პოლონეთი - საქართველო  1:2

გოლები: 0:1 ლომინაძე (55), 1:1 კალუაზინსკი (73, პენ), 1:2 გორდეზიანი (90+4)

 საქართველო: ხარატიშვილი, აზაროვი, ხვადაგიანი, საზონოვი, მაისურაძე, ლომინაძე (ო. მამაგეიშვილი 66), გაგნიძე (ოდიშვილი 90+6), სიგუა (გორდეზიანი 80), კვერნაძე, ოდიშარია (იეგოიანი 80), აბუაშვილი (გ. მამაგეიშვილი 66)