,
ნაძალადევის რაიონში, სანზონის დასახლების N19-20 კორპუსების მიმდებარედ არსებულ სპორტულ მოედანსა და სკვერს სრული რეაბილიტაცია ჩაუტარდა.
თბილისის მერიის ცნობით, რეკრეაციული სივრცის საერთო ფართობი 5 100 კვ. მეტრია. მათი ინფორმაციით, დასასვენებელ სივრცეში შემორჩენილი იყო მხოლოდ ამორტიზებული ატრაქციონები.
გარდა ამისა, დაზიანებული იყო ნოდარ ახალკაცის სახელობის ფეხბურთის მოედანი.
განახლებული სპორტული მოედანი და სკვერი თბილისის მერმა, კახა კალაძემ მოადგილე ირაკლი ბენდელიანთან ერთად დაათვალიერა.
„აღნიშნული რეკრეაციული პროექტის განხორციელება ჩვენი წინასაარჩევნო დაპირება იყო - როდესაც შევხვდით მოსახლეობას, დავპირდით, რომ ამ სივრცეს მოვაწესრიგებდით. დღეს, მეც ბედნიერი ვარ, რომ ადგილობრივებს ნორმალური დასვენების, პატარებს - ატრაქციონებზე გართობის შესაძლებლობა ექნებათ. ასევე, განახლდა სპორტული მოედანი, მოწყობილია დასასვენებელი სივრცეები, სასეირნო ბილიკები, სავარჯიშო სივრცე, გარე განათების ქსელი, სარწყავი სისტემა, დაირგო ხე-მცენარეები.
მინდა, მადლობა გადავუხადო ნაძალადევის რაიონის გამგეობას, ძალიან კარგი პროექტია. ასეთ პროექტებს აუცილებლად განვახორციელებთ ყველა რაიონში, ყველა უბანში, სადაც ეს შესაძლებელია. ქალაქს სჭირდება მეტი რეკრეაცია, მეტი მწვანე სივრცე, რათა არსებული ეკოლოგიური მდგომარეობა გამოვასწოროთ და ამასთან, ყველა თაობის ადამიანს შევუქმნათ დასვენების, გართობის, განტვირთვის შესაძლებლობა“, - განაცხადა კახა კალაძემ.
თბილისის მერიის ცნობით, პროექტის ფარგლებში, მოეწყო საბავშვო ატრაქციონები, სავარჯიშო სივრცე, დასასვენებელი პავილიონი, სარწყავი სისტემა, გარე განათების ქსელი და საპარკე ინფრასტრუქტურა; დაირგო 600-ზე მეტი ნერგი და მოეწყო ბალახის საფარი; აგრეთვე, მიმდებარე ტერიტორიაზე მოწესრიგდა საგზაო ინფრასტრუქტურა და დაიგო ასფალტის საფარი.
„სტადიონისა და სკვერის რეაბილიტაციის პროექტის ღირებულება 775 348 ლარია, საგზაო სამუშაოების ღირებულება კი 63 934 ლარს შეადგენს. სამუშაოები ნაძალადევის რაიონის გამგეობის ბიუჯეტიდან დაფინანსდა.
რეაბილიტირებული რეკრეაციული სივრცე, მერთან ერთად, ნაძალადევის რაიონის გამგებელმა ირაკლი ანდღულაძემ, პარლამენტისა და საკრებულოს მაჟორიტარ დეპუტატებთან - მიხეილ ყაველაშვილთან და ირაკლი ხელაძესთან ერთად დაათვალიერა“,-აღნიშნულია ინფორმაციაში.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
