,
სამგორის რაიონში, მიხეილ გახოკიძის ქუჩის სრული რეაბილიტაცია მიმდინარეობს. ამ დროისთვის, ქუჩაზე ეწყობა სანიაღვრე ქსელი და გაზმომარაგების მილები. მიმდინარეობს კაბელ არხების მოწყობაც.
გარდა ამისა, ქუჩის იმ მონაკვეთში, სადაც მიწისქვეშა კომუნიკაციები შეიცვალა, დაწყებულია საგზაო სამუშაოები. კერძოდ, ეწყობა საფუძველი და გარკვეულ მონაკვეთებში დაგებულია ასფალტის საფარის ქვედა ფენები.
მიმდინარე სამუშაოებს თბილისის მერი კახა კალაძე მერის მოადგილე ირაკლი ბენდელიანთან ერთად გაეცნო.
„გახოკიძის ქუჩაზე, რომელიც ძალიან მძიმე მდგომარეობაში იყო, სარეაბილიტაციო სამუშაოები მიმდინარეობს. უკვე სრულად შეცვლილია მიწისქვეშა კომუნიკაციები - წლისა და წყალარინების ქსელები, ამ დროისთვის კი მიმდინარეობს სამუშაოები გაზის მილებთან დაკავშირებით. ქუჩის სიგრძე 2.3 კილომეტრია. გზის, დაახლოებით, 700-მეტრიანი მონაკვეთი უკვე მოქცეულია ასფალტის ქვედა ფენებში. გარდა ამისა, მოეწყობა ტროტუარები, ზებრა გადასასვლელები და კუნძულები; დამონტაჟდება განათების ბოძები LED სანათებით, ელექტროსადენები კი მიწის ქვეშ განთავსდება“, - განაცხადა კახა კალაძემ.
პროექტის შემდეგ ეტაპზე, გზის სავალ ნაწილზე დაიგება ასფალტის საფარი და ინფრასტრუქტურა ადაპრიტდება შშმ პირთათვის.
გახოკიძის ქუჩის რეაბილიტაციას თბილისის მერიის ინფრასტრუქტურის განვითარების საქალაქო სამსახური ახორციელებს. სამუშაოები, რომლის ღირებულება შეადგენს 20 მლნ ლარს, მიმდინარე წლის გაზაფხულზე დასრულდება.
დედაქალაქის მერთან ერთად, ადგილზე ინფრასტრუქტურის განვითარების საქალაქო სამსახურის უფროსი გიორგი აბუთიძე და სამგორის რაიონის გამგებელი კახა სამხარაძე იმყოფებოდნენ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
