თბილისის მერიაში მუნიციპალიტეტის მთავრობის მორიგი სხდომა გაიმართა. დღის წესრიგით გათვალისწინებული საკითხების განხილვამდე, დედაქალაქის მერმა კახა კალაძემ რამდენიმე განცხადება გააკეთა და თბილისის საარჩევნო შტაბის ირგვლივ განვითარებულ მოვლენებს კიდევ ერთხელ გამოეხმაურა.
მანვე მადლობა გადაუხადა მმართველი პარტიის წევრებსა და მხარდამჭერებს, ბოლო დღეების განმავლობაში აქციის მონაწილეების მხრიდან წამოსული შეურაცხყოფებისადმი გამოჩენილი მოთმინებისთვის.
„ყველამ კარგად დაინახა, რა პროცესები განვითარდა თბილისის საარჩევნო შტაბის გარშემო. რადიკალთა დაჯგუფება პროვოკაციული ქმედებებით, აგრესიით, უწმაწური შეძახილებით, გინებით, ზიზღის ენით დაუპირისპირდა მმართველი პარტიის წევრებსა და მხარდამჭერებს, მედიას, რიგით გამვლელებს, ყველას, ვინც მათ გვერდით არ დგას. მიზანი ცხადია - საზოგადოების გახლეჩა და საარჩევნო კამპანიისთვის ხელის შეშლა. მინდა, მადლობა გადავუხადო ყველა ჩვენს მხარდამჭერს, თანაგუნდელს, ვინც ამ დღეების განმავლობაში მოთმინებით პასუხობს ძალადობრივი ჯგუფების აგრესიას. ეს არის ჩვენი პასუხი მათ აგრესიაზე, მოსახლეობის პასუხი კი იქნება 4 ოქტომბერს, რაც დასრულდება თბილისის გამარჯვებით“, - განაცხადა კახა კალაძემ.
დედაქალაქის მერმა განმარტა, რომ მისთვის, როგორც თბილისის მერობის კანდიდატისთვის, მნიშვნელოვანია წინასაარჩევნო კამპანიის მშვიდ გარემოში წარმართვა და მოსახლეობასთან ღია კომუნიკაცია.
„ახლოვდება თვითმმართველობის არჩევნები, რომელმაც უნდა განსაზღვროს თბილისის მომავალი, მისი ხვალინდელი დღე. ბუნებრივია, ყველა, ვისაც ამ ქალაქზე შესტკივა გული, კარგად აცნობიერებს ამ არჩევნების მნიშვნელობას. გარდა იმისა, რომ ვარ მოქმედი მერი, ვაწარმოებ საარჩევნო კამპანიას, როგორც „ქართული ოცნების“ თბილისის მერობის კანდიდატი, ვაფასებ და ვუფრთხილდები ჩვენი მოსახლეობის მიერ გამოცხადებულ ნდობას და ვგრძნობ პასუხისმგებლობას მათ წინაშე. სწორედ ამიტომ, საარჩევნო კამპანია დავიწყეთ დაგეგმილზე ადრე, რათა ამომრჩეველს მივაწოდოთ დეტალური ინფორმაცია, როგორც უკვე გაკეთებულ საქმეებზე, ისე სამომავლო გეგმებზე. ვფიქრობ, ჩვენ საქმით დავამტკიცეთ, რომ ვართ ის გუნდი, ვინც შეძლებს იზრუნოს თბილისზე და თბილისელებზე. ამდენად, ჩვენთვის ძალიან მნიშვნელოვანია, წინასაარჩევნო კამპანია და საარჩევნო პროცესში დაგეგმილი ღონისძიებები ჩავატაროთ მშვიდ გარემოში, ღიად და გახსნილად ვხვდებით ჩვენს ამომრჩეველს, ვისმენთ მათ ხედვებს, მათ პრობლემებს“, - აღნიშნა თბილისის მერმა.
კახა კალაძის თქმით, მისთვის კატეგორიულად მიუღებელია ძალადობა მაშინაც კი, როდესაც ქალი ძალადობს და ბილწსიტყვაობს.
„ზოგადად, კატეგორიულად მიუღებელია ძალადობა მაშინაც კი, როდესაც ქალი შეუფერებლად იქცევა, ძალადობს და ბილწსიტყვაობს. მესმის, რომ ძალიან რთულია მოთმინებით უპასუხო ისეთ ადამიანებს - ქალებს და კაცებს, რომლებიც გუშინ და გუშინწინ საარჩევნო შტაბს დაესხნენ თავს. ეს ადამიანები არ ცნობენ არც საკუთარ სქესს, არც ეროვნებას, არც რელიგიას, არც სამშობლოს. აღარაფერს ვამბობ მათ მორალსა და ზნეობაზე. ეს არის გარედან დაფინანსებული აგრესიული ჯგუფი. ასეთი ინდივიდების ჩამოყალიბების პროცესი დღეს ან გუშინ არ დაწყებულა. მიზანმიმართულად ხდებოდა სხვადასხვა ინსტიტუციებში მათი გაწვრთნა, დატრენინგება, უსამშობლო მასად ქცევა. ამ ყველაფერში ათეულობით მილიონი დოლარი იხარჯებოდა. გახსოვთ ალბათ, წლების წინ, გია ბუღაძის ინიციატივით, სამხატვრო აკადემიაში ჩატარებული პერფორმანსი, სადაც პირისპირ მსხდომი ახალგაზრდები ერთმანეთს აფურთხებდნენ და ეს კონცეპტუალურ პროექტად დასახელდა“, - განაცხადა თბილისის მერმა.
მისივე თქმით, ოპონენტები ცდილობენ, ზიზღი და შეურაცხყოფა დემოკრატიულ პროცესად წარმოაჩინონ.
„ასეთივე დამაჯერებლობით“, ლიბერალური ფაშიზმის წარმომამდგენლები ახლაც ცდილობენ, ზიზღი, სიძულვილი, შეურაცხყოფა, დემოკრატიულ პროცესად წარმოაჩინონ, რაც, ცხადია, განწირულია წარუმატებლობისთვის. ყველა პოლიტიკური პარტია, ვინც დაკავებულია შეურაცხყოფით, ზიზღით, ემსახურება სხვა ქვეყნის ინტერესებს, რა თქმა უნდა, მათ არანაირი მომავალი პოლიტიკაში არ აქვთ და ყოველთვის განწირულნი იქნებიან მარცხისთვის. კიდევ ერთხელ გავიმეორებ, რომ ჩვენ მათ ყველა ქმედებას მოთმინებით უნდა ვუპასუხოთ, რადგან სწორედ სიძულვილზე სიძულვილით პასუხი არის ის, რასაც ეს ადამიანები ელიან. ჩვენ უნდა მოვიქცეთ არა მათი უღირსობის, არამედ ჩვენი ღირსების შესაბამისად“, - აღნიშნა კახა კალაძემ.
რაც შეეხება საარჩევნო სამზადისს, დედაქალაქის მერის თქმით, ამ პროცესს ხელს ვერავინ შუეშლის და თბილისის განვითარება გაგრძელდება.
„დავუბრუნდები ისევ არჩევნებისთვის სამზადისს, ამ პროცესს ხელს ვერც უსამშობლო აგენტები შეუშლიან და ვერც მათი დამკვეთები. ჩვენ გვაქვს აღებული პასუხისმგებლობა თბილისელების წინაშე. გაძლევთ პირობას, გაგრძელდება თბილისის განვითარება, გაგრძელდება ყველა რეფორმა, რაც ჩვენი დედაქალაქისთვის სასიცოცხლოდ მნიშვნელოვანია. დღეს უკვე ვთქვი და კიდევ ერთხელ გავიმეორებ: თუ ისინი კეტავენ გზებს და არ აძლევენ მოქალაქეებს თავისუფლად გადაადგილების შესაძლებლობას, ჩვენ ვხსნით რეაბილიტირებულ, მოდერნიზებულ ქუჩებს, სკვერებს, პარკებს, საბავშვო ბაღებს, სპორტულ მოედნებს. თუ ისინი ზიზღის ენით უპირისპირდებიან ყველას, ვინც მათ გვერდით არ დგას, ჩვენ ვესაუბრებით მოსახლეობას მათ პრობლემებზე და ვცდილობთ, დავძლიოთ დედაქალაქში არსებული გამოწვევები“, - განაცხადა თბილისის მერმა.
თბილისის მერმა ყურადღება ინფრასტრუქტურულ პროექტებზეც გაამახვილა და აღნიშნა, დღეს სამგორის რაიონში გაიხსნა კიდევ ერთი რეაბილიტირებული, გახოკიძის ქუჩა.
„აღნიშნულ ქუჩაზე მოძრაობა ორი თვის წინ გავხსენით, ავტომობილებს გადაადგილება უპრობლემოდ შეეძლოთ. დარჩენილი იყო მცირე სამუშაოები და დღეს უკვე დასრულებული ქუჩა გავხსენით. პირველი, რაც პროექტის ფარგლებში გაკეთდა, იყო მიწისქვეშა ქსელის რეაბილიტაცია, შეიცვალა არსებული კომუნიკაციები, დამონტაჟდა განათების ბოძები ლედ სანათებით, მოწესრიგდა ტროტუარები, მოეწყო საპარკინგე არეალები. ყველას გვახსოვს, განსაკუთრებით კი იმ ადამიანებს, ვინც გახოკიძის ქუჩით სარგებლობდა, რამდენად მძიმე და ქაოტური მდგომარეობა იყო იქ. ადგილზე დარჩენილია მხოლოდ პარკის სამშენებლო სამუშაოები, რომელიც გაშლილია 3 ჰექტარ ტერიტორიაზე.
მინდა, კიდევ ერთხელ მადლობა გადავუხადო ადგილობრივ მოსახლეობას მხარდაჭერისთვის, რადგან მათი ჩართულობით მოხდა 100-მდე უსახური ფარეხის დემონტაჟი. შედეგად ძალიან დიდი სივრცე გამოთავისუფლდა, სადაც ამჟამად პარკის მშენებლობა მიმდინარეობს. სამუშაოები წლის ბოლოს დამთავრდება და ქალაქს კიდევ ერთი რეკრეაციული სივრცე შეემატება. ასეთი პროექტების განხორციელებას მომავალშიც გავაგრძელებთ“, - აღნიშნა კახა კალაძემ.
კიდევ ერთი პროექტი, რომელიც უკვე დასრულებულია, გლდანის რაიონის მეოთხე მიკრორაიონის N110–112 კორპუსებთან განხორციელდა და სკვერის მოწყობას ითვალისწინებდა.
თბილისის მერის თქმით, სამუშაოების ფარგლებში განხორციელდა უკანონო შემოღობვებისა და ავტოფარეხების დემონტაჟი, მოსუფთავდა ტერიტორია და მრავალფუნქციური სივრცე მოეწყო.
„მინდა, ძალიან დიდი მადლობა გადავუხადო მოსახლეობას. ზუსტად, მათი ჩართულობით მოხდა ფარეხების დემონტაჟი და გამოთავისუფლებულ ტერიტორიაზე ძალიან კარგი დასასვენებელი სივრცე მოეწყო, სადაც განთავსებულია ბავშვებისთვის შესაბამისი ატრაქციონები, მოსასვენებელი პავილიონები, ფიტნეს ზონები, დამონტაჟდა გარე განათებისა და სარწყავი სისტემები. შეიქმნა ყველანაირად მოწესრიგებული სივრცე.
ჩვენი მთავარი მიზანი და ამოცანაა, რომ ყველა რაიონში შევიდეთ, განვაახლოთ მსგავსი სივრცეები და შევქმნათ ისეთი ადგილები, სადაც იქ მცხოვრებ ადამიანებს ექნებათ გართობის, დასვენების, ვარჯიშისა და განტვირთვის საშუალება“, - განაცხადა დედაქალაქის მერმა.
მთავრობის დღევანდელ სხდომაზე ასევე აღინიშნა, რომ სახალხო დღესასწაული „თბილისობა“ წელს 20-21 სექტემბერს გაიმართება, რომლის ფარგლებშიც, გარდა სხვადასხვა აქტივობისა და ღონისძიებისა, 20 სექტემბერს საპატიო თბილისელების დაჯილდოების ცერემონია, ხოლო 21 სექტემბერს საზეიმო კონცერტი ჩატარდება.
„იმის გამო, რომ წელს, 4 ოქტომბერს არის თვითმმართველობის არჩევნები, „თბილისობა“ 20-21 სექტემბერს ჩატარდება. ღონისძიების მთავარი ლოკაციები კვლავ ორბელიანის მოედანი და რიყის პარკი იქნება, სადაც ორი დღის განმავლობაში, სტუმრებს მრავალფეროვანი პროგრამა დახვდებათ. 20 სექტემბერს, სახელმწიფო ცერემონიების სასახლეში ტრადიციულად საპატიო თბილისელების დაჯილდოების ცერემონია გაიმართებ, რომელიც სატელევიზიო ეთერით გადაიცემა, ხოლო 21 სექტემბერს, ევროპის მოედანზე საზეიმო კონცერტი ჩატარდება.
რაც შეეხება დანარჩენ ღონისძიებებს, ორივე დღეს, ორბელიანის მოედანზე წარმოდგენილი იქნება გამოფენები, თეატრალიზებული, გასართობი თუ საბავშვო პროგრამები; აბანოთუბანში 20-21 სექტემბერს ჩატარდება გამოფენა-გაყიდვა „თბილისური მრავალფეროვნება“, ხოლო რიყის პარკში მისულ სტუმრებს დახვდებათ საბავშვო წარმოდგენები და ქართული ესტრადის შემსრულებლების მონაწილეობით საზეიმო კონცერტი. 21 სექტემბერს, 20:00 საათზე კი, ევროპის მოედანზე, როგორც უკვე გითხარით, დაიწყება „თბილისობის“ საზეიმო კონცერტი“, - აღნიშნა კახა კალაძემ.
მისივე თქმით, ღონისძიებების შესახებ დეტალურ ინფორმაციას მუნიციპალიტეტი უახლოეს დღეებში გაავრცელებს.
თბილისის მერმა ასევე განაცხადა, რომ დღეიდან განახლდა განაცხადების მიღება კონკურსის - „შემოქმედებითი თბილისი“ მეორე ეტაპზე, რომლის მიზანი შემოქმედებითი ინდუსტრიის განვითარების ხელშეწყობა, ამ სფეროში ჩართული ხელოვანებისა და სახელოვნებო ჯგუფების შემოქმედებითი იდეების წარმოჩენა და რეალიზებაა.
„კონკურსი 2019 წლიდან ამოქმედდა და მისი არსებობის მეექვსე წელს, თბილისის მერიის ხელშეწყობით, უკვე 230-მდე საინტერესო პროექტი განხორციელდა. შემოდგომის ეტაპზე, 10 სექტემბრიდან 30 სექტემბრის ჩათვლით, პროექტები მიიღება სამი მიმართულებით: საგამომცემლო საქმიანობა, დიზაინი და რეწვა, თანამედროვე ვიზუალური ხელოვნება“, - განაცხადა კახა კალაძემ.
მისივე თქმით, დამატებითი ინფორმაციის მიღება და განაცხადების ატვირთვა მსურველებს შეუძლიათ სპეციალურად კონკურსისთვის შექმნილ ვებგვერდზე culture.tbilisi.gov.ge.
„კონკურსში მონაწილეობის მიღება შეუძლია საქართველოს ტერიტორიაზე რეგისტრირებულ იურიდიულ პირს ან საქართველოს საგადასახადო კოდექსით განსაზღვრულ მეწარმე ფიზიკურ პირს. აღსანიშნავია, რომ კონკურსის ფარგლებში დაფინანსებული პროექტების უმეტესი ნაწილი ნამდვილად ემსახურება დასახული მიზნების განხორციელებას“, - აღნიშნა კახა კალაძემ.
