Eagle Hills-მა მილიარდიანი ინვესტიცია უნდა განახორციელოს რუსთავი-თბილისის მაგისტრალის მიმდებარედ, სოფელ აღთაკლიასა და ფონიჭალაში მდებარე 590 ჰექტარის მიწის ნაკვეთზე - ამის შესახებ ირკვევა იმ რენდერიდან, რომელიც Eagle Hills-მა გამოაქვეყნა. კომპანიის რენდერის თანახმად, ტერიტორია მოიცავს იმ მიწასაც, რომელსაც ამჟამად კრწანისის ტყე-პარკი ეწოდება. ტერიტორია სახელმწიფო საკუთრებაშია და მის განმკარგავად სსიპ ველური ბუნების ეროვნული სააგენტო არის მითითებული, თუმცა მას დაცული ტერიტორიის სტატუსი არ აქვს. მიწის ინვესტორისთვის გადაცემა ჯერ არ მომხდარა. ისევე როგორც კვლავ სახელმწიფო საკუთრებაშია 260 ჰექტარის მიწის ნაკვეთი გონიოს ჩრდილოეთით, შავ ზღვასთან მდინარე ჭოროხის შესართავთან. თუმცა, სავარაუდოდ კომპანიას ორივე მიწის ნაკვეთი დეველოპერული მიზნებით საკუთრებაში უახლოეს მომავალში გადაეცემა. ამასთან, ჯერჯერობით პროექტთან დაკავშირებით არც სამშენებლო ნებართვა, არც გარემოზე ზემოქმედების შეფასება არაა დამტკიცებული.

როგორც გონიოში, ასევე თბილისში დაგეგმილი პროექტების ჯამური ინვესტიცია 6.6 მილიარდი დოლარია, თუმცა უშუალოდ თბილისის ან გონიოს პროექტები რა დაჯდება ცნობილი არაა და კომპანია Eagle Hills-ს პრესრელიზებში საუბარია მხოლოდ ჯამურ საინვესტიციო მოცულობაზე დეტალიზაციის გარეშე.

თბილისის პროექტის სახელწოდება იქნება Tbilisi Waterfront-ი, გონიოს პროექტის სახელწოდება კი Gonio Yachts and Marina იქნება.

დღესვე კომპანია Eagle Hills-მა ყოფილ კინო რუსთაველის შენობაში გაყიდვების ოფისი გახსნა.

Eagle Hills-ის თბილისის პროექტის ლოკაცია და რენდერები: