,
საბურთალოს რაიონში ინფრასტრუქტურული პროექტების განხორციელება აქტიურ რეჟიმში გრძელდება. ამ ეტაპზე, საგზაო სამუშაოები მიმდინარეობს დიდ დიღომში, III მიკრორაიონში, N14 და N15 კორპუსების მიმდებარედ. ასფალტის საფარი უკვე დაიგო N1, N3, N5, N6, N15 და N17 კორპუსების მიმდებარედ.
ჯამში, აღნიშნულ მისამართებზე ინფრასტრუქტურული სამუშაოები 8 000 კვ.მ ფართობზე განხორციელდა.
საბურთალოს რაიონის გამგებელი გიზო ვასაძე მიმდინარე სამუშაო პროცესს ადგილზე გაეცნო.
მოსახლეობასთან საუბრისას, მან ხაზი გაუსვა მსგავსი პროექტების მნიშვნელობას და იმედი გამოთქვა, რომ მოწესრიგებული შიდა გზები უფრო კომფორტულს გახდის საცხოვრებელ გარემოს.
„ინფრასტრუქტურული პროექტები საბურთალოს გამგეობისთვის ერთ-ერთი პრიორიტეტია. საგზაო ინფრასტრუქტურის გაუმჯობესება არა მხოლოდ გადაადგილებას ხდის უფრო კომფორტულსა და უსაფრთხოს, არამედ მთლიანად საცხოვრებელ გარემოსაც აუმჯობესებს. წლის დასაწყისიდან დღემდე, რაიონში უკვე მოწესრიგდა 47 869 კვ.მ ფართობის ტერიტორია, რისთვის ადგილობრივი ბიუჯეტიდან 3 460 466 ლარი დაიხარჯა“, - აღნიშნა გიზო ვასაძემ მიმდინარე პროექტის დათვალიერებისას.
ინფორმაციას თბილისის მერია ავრცელებს.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
