18.12.2023 - შეჯამება უკრაინაში:
- ამჟამად უკრაინაში რამდენიმე ძალიან აქტიური წერტილია:
1. კრინკის სექტორი [ხერსონის ოლქი] - დნეპრის გასწვრივ, ხერსონის ოლქში, აღმოსავლეთ ნაპირზე, დასახლება კრინკის სიახლოვესა და მის შემოგარენში უკრაინული დანაყოფები კვლავ აგრძელებენ აქტიურ შეტევას. რუსული სამხედრო ძალები წყებად ცდილობენ უკრაინული იერიშების შეზღუდვას და ტერიტორიის სრულ კონტროლს, რის მისაღწევადაც ათობით ტექნიკისა და ასობით ცოცხალი ძალის გაღება უწევთ. ეფექტურია, არამხოლოდ უკრაინული ცოცხალი ძალა, არამედ სანაპიროსთან მოქმედი არტილერიაც, რომელიც რუსულ ტექნიკას უზუსტეს დარტყმებს აყენებს. პრაქტიკულად კრინკი გახდა ის სატყუარა, სადაც რუსებს აქტიურ თავდაცვაში უწევთ ყოფნა და ბევრად მცირე დანაყოფებისაგან შემდგარ უკრაინელთა შესაზღუდად ძალიან დიდი ძალების გაღება. იმ ფონზე, რომ სექტორში რამდენიმე წერტილია, სადაც უკრაინელები აქტიურად მოქმედებენ, რუსულ არმიას ერთიანად მრავალი პატარა მიმართულებით უწევს ფოკუსის გაკეთება და მრავალრიცხოვანი ჯარების დაყოვნება. ცოცხალი ძალისა და ტექნიკის სიმრავლე კი მეორე სანაპიროზე მდგომი უკრაინული არტილერიისათვის კარგ სამიზნეს ქმნის.
2. სინკივნა-კუპიანსკის სექტორი [ხარკივის/ხარკოვის ოლქი] - რუსები ძალიან აქტიურობენ ხარკივის ოლქში, კუპიანსკის მიმართულებით. საბრძოლო მოქმედებები ლიმან-პერშისა და სინკივკას მიმართულებაზე მიმდინარეობს. დიდი რაოდენობით ტექნიკისა და ცოცხალი ძალის თავმოყრის მიუხედავად რუსული შეტევა თვითგანადგურების რეჟიმში მიმდინარეობს. უკრაინელები ადრეული შემოდგომიდან ამ მიმართულებას დიდ ყურადღებას უთმობენ და ძალიან კარგადაც აქვთ გამაგრებული სექტორი. მიუხედავად იმისა, რომ რუსების გეგმა მინიმუმ მდინარე ოსკილის ირგვლივ ტერიტორიების დაკავება იყო, ამ ეტაპზე აღნიშნული ოპერაცია კატასტროფულად მიმდინარეობს მათთვის. უკრაინელები ძალიან მყარად დგანან თავდაცვაში - იყენებენ არტილერიას, დრონებს, ტანკსაწინააღმდეგო შეიარაღებას, ჩასაფრებებს და ა.შ.. ჯერჯერობით შეტევა არ მოგერიებულა სრულად. რუსული ძალა ამ მიმართულებით ჯერ კიდევ მასშტაბურია.
3. ავდიივკას სექტორი [დონეცკის ოლქი, ქალაქი დონეცკის შემოგარენი] - ჯერჯერობით კვლავ ყველაზე აქტიური საბრძოლო მოქმედების ზონად რჩება ავდიივკა. მიუხედავად კატასტროფული დანაკარგებისა რუსებმა ქალაქის საზღვრებში შეღწევა ვერ შეძლეს. ზოგიერთი ცნობით, რუსების მხრიდან მხოლოდ მოკლულთა რაოდენობა 10 ათასს აჭარბებს და შეიძლება 13 ათასიც კი იყოს. იმ კადრებისა და ტალღოვანი იერიშების ფონზე, რომელიც ავდიივკაზე მიმდინარების, ეს ციფრი სრულიად რეალისტურია. უკრაინელებს საკმაოდ დიდი ძალები ჰყავთ ქალაქში და მის ირგვლივ შეყვანილი. შესაბამისად, ნაკლებად სავარაუდოა, რუსებმა ავდიივკას აღება მარტივად მოახერხონ, არადა ამ იერიშისათვის ძალიან დიდი ხნის განმავლობაში ემზადებოდნენ.
4. ბახმუტი [დონეცკის ოლქი] აქტიური საბრძოლო მოქმედებები მიმდინარეობს ბახმუტის შემოგარენში. სამხრეთში რუსებმა რამდენჯერმე სცადეს კლიშჩიივკას ხელახალი ოკუპაცია, თუმცა წარუმატებლად. ამასთან, ბახმუტიდან რუსებმა მომიჯნავე დასახლება ივანივსკესკენაც სცადეს გაჭრა. უკრაინელებს თავდაცვითი პოზიციები უჭირავთ. იერიშები გრძელდება.
5. რობოტინეს სექტორი [ზაპორიჟიას ოლქი] ზაპორიჟიაში რობოტინესთან ფრონტის ხაზი მეტ-ნაკლებად სტაბილურია, თუმცა პერიოდულად უკრაინელები და რუსები ცდილობენ ინიციატივის ხელში აღებას. უშუალოდ დასახლებას უკრაინელები აკონტროლებენ.
6. პერიოდულად შეტაკებები ხდება ბელგოროგის ოლქში, რუსეთ-უკრაინის საზღვრის გასწვრივ, რუსეთის ტერიტორიაზე. ბოლო ასეთი შემთხვევა გუშინ დაფიქსირდა. უკრაინული დივერსიული ძალები სასაზღვრო ზონასთან განთავსებულ რუსულ სამხედრო ნაწილებს პერიოდულად და განმეორებით ესხმიან თავს. ამით რუსებს სასაზღვრო ზონაში დარჩენას აიძულებენ.
- დრონების გამოყენებით ბოლო დღეებია აქტიურად მიმდინარეობს იერიშები რუსეთის ტერიტორიაზე, უკრაინის მომიჯნავე ოლქებში: კურსკში, როსტოვში, ბელგოროდსა და კრასნოდარში. დასავლურ მედიაში უკრაინული იარაღი უკვე შეაფასეს, როგორც "თანამედროვე ომის საოცარი და იაფი საშუალება". რუსები უზარმაზარ რესურსებს ხარჯავენ ამ დრონების გასანეიტრალებლად, ხოლო უკრაინელთა შეღწევადობა რუსეთის ტერიტორიაზე მზარდია.
- წინა დღეებში ძალიან ცუდი ამინდები იყო აღმოსავლეთ უკრაინაში, რამაც გარემოს ატალახება გამოიწვია. ფრონტის ხაზზე ზოგიერთი მიმართულებით გადაადგილება ძალიან ჭირს.
- უკრაინაში საყოველთაო მობილიზაცია მიმდინარეობს. შესაძლოა, რომ ყველაზე მასშტაბური იყოს ის. მისი მიზანი სამხედროთა როტაციის შესაძლებლობა, ზამთარში რუსული იერიშების შეკავება და შეძლებისთანავე კონტრშეტევის დაწყება იქნება. რამდენიმე რისკთაგან ერთ-ერთი ყველაზე პრობლემური მაინც ის იქნება, რომ დიდი რაოდენობით გაწვეულების ფონზე, მათი გაწვრთნის ხარისხში შეიძლება გაჩნდეს პრობლემები. ამის გამო დასავლური სახელმწიფოები არამხოლოდ ახალწვეულთა წვრთნას იწყებენ, არამედ ინსტრუქტორთა წვრთნასაც, რომელთაც, თავისხმრივ, მოუწევთ უკრაინელი ახალწვეულების გადამზადება.
- უკრაინელები კვლავ აქტიურად აგრძელებენ ფრთოსანი რაკეტებით რუსული პოზიციები სიღრმეების დაბომბვას. მათ შორისაა ლუგანსკის ოლქი და ქალაქი მარიუპოლის შემოგარენი.
- სანამ უკრაინის დახმარება აშშ-ს მხრიდან ჩიხშია შესული გერმანიამ, ნორვეგიამ და დანიამ პრაქტიკულად გააორმაგეს უკრაინის სამხედრო და ფინანსური მხარდაჭერა. აქტიურობს პოლონეთის ახალი პრემიერიც, რომელმაც უკრაინის მხარდასაჭერად სრული მობილიზაცია გამოაცხადა როგორც პოლონეთში ისე მთელს ევროპაში. სამხედრო წარმოება იზრდება ევროპაში, ხოლო უკრაინელებს საშუალება ეძლევათ თავიანთი ტექნიკა უსაფრთხოდ გაარემონტონ თუ აწარმოონ მოკავშირე ქვეყნებში.
