,
საქართველოს ეროვნულმა ბანკმა საფინანსო სექტორის მიმდინარე ტენდენციების შესახებ ახალი ანგარიში გამოაქვეყნა. დოკუმენტის თანახმად, საბანკო სექტორში საპროცენტო განაკვეთებს შემცირების ტენდენცია აქვს. სებ-ის თანახმად, ივნისში კრედიტების განაკვეთმა საშუალოდ 13.1% შეადგინა, რაც წინა თვესთან შედარებით 1 პროცენტული პუნქტით ნაკლებია. ეროვნული ბანკის ანგარიშის მიხედვით, განაკვეთების შემცირება ლარის სესხებზე პროცენტების დაწევას უკავშირდება.
"ივნისში სესხების საშუალო შეწონილი საპროცენტო განაკვეთები წინა თვესთან შედარებით 1.0 პპ-ით შემცირდა და 13.1% შეადგინა. ეროვნული ვალუტით სესხებზე საშუალო შეწონილი წლიური საპროცენტო განაკვეთი 0.7 პპ-ით 15.9%-მდე შემცირდა, ხოლო უცხოური ვალუტით გაცემულ კრედიტებზე საპროცენტო განაკვეთი უცვლელია და 9.0%- ის დონეზეა.
დაკრედიტება ივნისში წლიურად 13.5%-ით იზრდება, ამასთან სესხების ზრდის ტემპმა წინა თვესთან შედარებით 0.7 პპ-ით მოიმატა. როგორც ეროვნული ბანკის დოკუმენტიდან ირკვევა, უფრო მეტი სესხი ეროვნულ ვალუტაში გაიცემა, რის გამოც, ლარით დაკრედიტების ტემპი 15.7%-ით იზრდება.
ივნისში, ლარით დაკრედიტება წლიურად 15.7%-ით, 25.9 მლრდ ლარამდე გაიზარდა და მთლიანი სესხების ზრდაში 8.1 პპ-იანი წვლილი შეიტანა. უცხოური ვალუტით დაკრედიტება (გაცვლითი კურსის ეფექტის გამორიცხვით) 11.1%-მდე გაიზარდა და მთლიანი სესხების ზრდაში 5.4 პპ-იანი წვლილი შეიტანა. უცხოური ვალუტით დაკრედიტების ტემპის ზრდა ძირითადად ბიზნეს სესხების ზრდის ტემპის მატებით არის განპირობებული, რომლის წვლილი მთლიანი სესხების ზრდაში, წინა თვესთან შედარებით, 0.7 პპ-ით გაიზარდა, იპოთეკური სესხების წვლილი კი არ შეცვლილა. სამომხმარებლო სესხების ზრდის ტემპი მცირედით შემცირდა თუმცა კვლავ მაღალ დონეზეა და მთლიან სესხებში 3.5 პპ-იანი წვლილი შეიტანა,"- ნათქვამია სებ-ის ანგარიშში.
