,
რუსული მედიით გავრცელებული ინფორმაცია იმის შესახებ, რომ რუსულმა საგადახდო სისტემა Unistream-მა საქართველოში მუშაობა განაახლა, სიმართლეს არ შეესაბამება. ინფორმაციას საბანკო ასოციაციაში ადასტურებენ.
„იუნისტრიმის“ განაღდებები არ ხორციელდება“ - აცხადებენ ასოციაციაში.
რუსული მედია საშუალებები Unistream-ის ხელმძღვანელობაზე დაყრდნობით იუწყებიან, რომ რუსეთიდან საქართველოში Unistream-ით გადარიცხვები განახლდა. კომპანიაში აღნიშნავენ, რომ ეს რუსეთში მცხოვრებ ქართველებს, საქართველოში მცხოვრები ნათესავებისთვის ფინანსურ მხარდაჭერას გაუმარტივებს.
რუსეთიდან საქართველოში Unistream-ის სისტემით ფულადი გადმორიცხვები მას შემდეგ შეწყდა, რაც გასული წლის ივლისში რუსული ბანკი ამერიკის შეერთებული შტატების სანქციების ქვეშ აღმოჩნდა. 2023 წლის 6 თვის მონაცემებით, ეს იყო სისტემა, რომელზედაც ქვეყანაში რუსეთიდან შემოსული ფულადი გზავნილების ყველაზე დიდი წილი მოდიოდა (2023 წლის 6 თვეში 762 მლნ დოლარი გადმოირიცხა).
ქვეყნის მასშტაბით, სეზონური გრიპის საწინააღმდეგო ვაქცინაცია დაიწყო - აცრა, ყველა მოქალაქისთვის, უფასოდ იქნება ხელმისაწვდომი.
ჯანდაცვის სამინისტროს ცნობით, იმუნიზაციის სახელმწიფო პროგრამის ფარგლებში, საქართველომ, 200 000 დოზა ფრანგული წარმოების, ოთხკომპონენტიანი, (SANOFI WINTHROP INDUSTRIE-ის VaxigripTetra™) სეზონური გრიპის საწინააღმდეგო ვაქცინა შეიძინა, რომელიც ერთ-ერთია ჯანმოს მიერ რეკომენდებულ ვაქცინებს შორის.
„ვაქცინა მორგებულია იმ შტამებზე, რომელთა ცირკულაცია მოსალოდნელია გრიპის სეზონზე.
განსაკუთრებით მნიშვნელოვანია ვაქცინაცია მაღალი რისკის / ქრონიკული დაავადების მქონე პირებისთვის, რადგან ზოგიერთი ადამიანისთვის გრიპი შესაძლოა სახიფათო დაავადებად იქცეს.
აცრა ვაქცინაციის სერვისის მიმწოდებელ სამედიცინო დაწესებულებებსა და პოლიკლინიკებში 6 თვის ასაკიდანაა შესაძლებელი და ბენეფიციარებისთვის სრულად უფასოა”,- აღნიშნულია ინფორმაციაში.
დაწესებულებები იხილეთ ბმულზე: https://ncdc.ge/#/pages/file/87a090e3-e8de-4d08-adaf-aaf0cb8b7128
