„ლელოს“ ერთ-ერთი ლიდერის, საბა ბუაძის განცადებით, ოპოზიციისთვის ISFED-ის პარალელური დათვლა გაყალბების დამადასტურებელი ერთადერთი ინსტრუმენტი არ ყოფილა.
მისი თქმით, აღნიშნულის დამადასტურებელი უამრავი მტკიცებულება არსებობს. ამასთან, როგორც ბუაძემ აღნიშნა, ხელისუფლება „სამართლიანი არჩევნების“ დისკრედიტაციას ცდილობს.
„ქართული ოცნება“ აგრძელებს სამოქალაქო სექტორის და მაღალი რეპუტაციის მქონე არასამთავრობო ორგანიზაციების დისკრედიტაციას. ისინი ახლა ცდილობენ, რომ პოლიტიკური იარლიყი მიაკერონ ამ შეცდომას და ორგანიზაციაში მიმდინარე პროცესებს. არცერთ შემთხვევაში, ოპოზიცია ISFED-ის პარალელურ დათვლას არ იყენებდა როგორც გაყალბების დამადასტურებელ ერთადერთ ინსტრუმენტს. არჩევნების გაყალბების უამრავი მტკიცებულება არსებობს და ISFED-ის პარალელური დათვლა არ ყოფილა ამის ერთადერთი მტკიცებულება. ვითარებას ეს არანაირად არ ცვლის, ეს კიდევ ერთხელ ახდენს „ქართული ოცნების“ ლუსტრაციას, როგორც იმ პოლიტიკური ძალის, რომელიც არაჯანსაღად ერევა სამოქალაქო ორგანიზაციების საქმიანობაში. აქ არსებობს კითხვები იმასთან დაკავშირებით, თუ საიდან იცოდა „ქართულმა ონცებამ“ ISFED-ში მიმდინარე პროცესების შესახებ იქამდე, ვიდრე ეს ორგანიზაცია ღიად დაიწყებდა ამ ანგარიშში არსებულ შეცდომაზე საუბარს“, - განაცხადა ბუაძემ.
შეგახსენებთ, „სამართლიანმა არჩევნებმა“ (ISFED) 2020 წლის 31 ოქტომბრის არჩევნების საბოლოო შედეგების დაზუსტებული ინფორმაცია გამოაქვეყნა. მათი განმარტებით, გამოვლინდა ხარვეზი საარჩევნო სუბიექტების მიერ მიღებული ხმების გამოსათვლელ ფორმულაში. როგორც ორგანიზაციაში აცხადებენ, გასწორების შედეგად, საარჩევნო სუბიექტების მიერ მიღებული ხმების პროცენტული რაოდენობა უმნიშვნელოდ შეიცვალა და აღნიშნული სხვაობა გავლენას არ ახდენს არცერთი საარჩევნო სუბიექტის მიერ მიღებული მანდატების რაოდენობაზე. „სამართლიანი არჩევნების“ (ISFED) 2020 წლის 31 ოქტომბრის არჩევნების დღის საბოლოო შედეგების დაზუსტებული ინფორმაციით, "ქართული ოცნება - დემოკრატიულ საქართველოს" ხმების 47.6% აქვს.
ამასთან, გუშინ ცნობილი გახდა, რომ ელენე ნიჟარაძე „სამართლიანი არჩევნების“ (ISFED) აღმასრულებელი დირექტორის თანამდებობას აღარ იკავებს.