კრემლმა იმ იმედით გამოაცხადა 9 მაისისათვის სამდღიანი ცეცხლის შეწყვეტა, რომ უკრაინელების მხირდან სამხედრო აღლუმის პოტენციური დაბომბვა არ განხორციელებულიყო და მოსკოვის ცაზე საჰაერო განგაში აერიდებინა თავიდან. ეს ყველაფერი კი იმ ფონზე ხდებოდა, რომ იგი უცხოელ ლიდერებს ელოდა მოსკოვში, რითიც საერთაშორისო ლეგიტიმაციის დაბრუნებას ცდილობდა.
მაგრამ ერთი კვირაა აქტიური საინფორმაციო კამპანია მიმდინარეობს პოტენციური საფრთხეების შესახებ - თვით უკრაინის პრეზიდენტიც კი გამოვიდა და აღნიშნა, რომ აღლუმის უსაფრთხოების გარანტიას ის ვერავის მისცემდა. ლოგიკურია, ადგილი, სადაც რუსული შეიარაღება და სამხედრო ძალები იყრიან თავს ომის მდგომარეობაში ლეგიტიმურ სამხედრო სამიზნედ იქცევიან. შესაბამისად, კრემლისადმი პოზიტიურად განწყობილი ლიდერები თავის არიდებას იწყებენ მოსკოვში ჩასვლისაგან, მიუხედავად იმისა იქნება თუ არა საჰაერო განგაში.
სერბეთის პრეზიდენტი ვუჩიჩი და სლოვაკეთის პრემიერი ფიცო ავად გახდნენ და შეხვედრას ალბათ არ დაესწრებიან. რუსი პროპაგანდისტები ბრაზობენ ალბათ თავს იკატუნებენ, ჩვენთან ჩამოსვლის ეშინიათ და მიზეზებს ეძებენო. ამასთან, ინდოეთის პრემიერი ნარენდრა მოდიც აუქმებს ღონისძიებაზე დასწრებას. ჩინეთმა მიმართა უკრაინას თავი შეიკავოს იერიშებისაგან, მაგრამ ზელენსკის განცხადების შემდეგ საინტერესოა ჩავა თუ არა სი ძინ პინის ღონისძიებაზე.
მაგრამ შეხვედრაზე საქართველოს სახელმწიფოებრიობის მტრები ნამდვილად იქნებიან, მათ შორის აფხაზი სეპარატისტების ლიდერიც.
სომხეთის პრემიერის დასწრება ძალიან ცუდი ამბავია, მაგრამ ნათელია, რომ ფაშინიანი თავისი პოლიტიკური კარიერისათვის და პრო-რუსული ძალების დასაშოშმინებლად მოსკოვთან გზების დაწვისაგან თავის არიდებას ცდილობს და აზერბაიჯანთან ურთიერთობაში დახმარების იმედიც აქვს, თუმცა რამდენად საფუძვლიანია ეს გამოჩნდება.
ამ ფონზე აშშ-მ 310 მილიონი დოლარის უკრაინელების F16-ზე წვრთნისა და აღჭურვის პროგრამა დაამტკიცა.
