ვლადიმირ პუტინის ბრძანებით, კავკასიის რეგიონში, რუსეთის შეიარაღებული ძალების ახალი სამხედრო სწავლება - "ბრძოლისუნარიანობის მოულოდნელი შემოწმება" დაიწყო.

რუსეთის თავდაცვის სამინისტროს განცხადებით, "შემოწმებამ" უნდა დაადგინოს, რამდენად შესწევს რუსეთის არმიას უნარი, უზრუნველყოს ქვეყნის უსაფრთხოება ქვეყნის სამხრეთ-დასავლეთში და მოამზადოს ნიადაგი სექტემბერში ფართომასშტაბიანი სწავლების - "კავკასია-2020"-ის ჩასატარებლად.

საბრძოლო მზადყოფნის შემოწმების მიზნით სხვადასხვა სახმელეთო და საზღვაო პოლიგონზე ჩატარდება 56 ტაქტიკური დონის სწავლება, რომელშიც, საერთო ჯამში, 150,000 სამხედრო მოსამსახურე, 26,000-მდე სამხედრო ტექნიკა, 414 საფრენი აპარატი და 106 საზღვაო ხომალდი მიიღებს მონაწილეობას.