,
რუსეთის მთავრობის გადაწყვეტილებით, კრიპტოვალუტების მაინინგი 6 წლით აიკრძალება ჩრდილოეთ კავკასიაში მდებარე რესპუბლიკებსა და რუსეთის მიერ ანექსირებულ უკრაინულ მიწებზე. ჩამონათვალი ვხედავთ, როგორც დაღესტანს, ინგუშეთს, ყაბარდო-ბალყარეთს, ყარაჩაი-ჩერქეზეთს, ჩრდილოეთ ოსეთს და ჩეჩნეთს, ასევე დონეცკის, ლუგანსკს, ზაპოროჟიეს და ხერსონის ოლქებს. მთავრობის განკარგულება უკვე გამოიცა, ხოლო აკრძალვა ძალაში 2025 წლის 1-ელი იანვრიდან შევა და 2031 წლის 15 მარტამდე იმოქმედებს.
თუკი ეს შეზღუდვა მუდმივია, კრიპტოვალუტების მოპოვება ასევე აიკრძალება რამდენიმე სხვა რეგიონში, მაგრამ იქ ეს სანქცია დროებითია და ენერგომოხმარების პიკურ პერიოდს ემთხვევა. ირკუტსკის ოლქში, ბურიატიაში და ზაბაიკალიეს მხარეში მაინინგი ჯერ 1-ელი იანვრიდან 15 მარტამდე აიკრძალება, მოგვიანებით კი შეზღუდვა ყოველწლიურ ხასიათს მიიღებს და კრიპტოვალუტების გამომუშავება 15 ნოემბრიდან 15 მარტამდე არ იქნება დაშვებული. როგორც რუსეთის მთავრობაში ამბობენ, ტერიტორიული ერთეულების ჩამონათვალი საბოლოო არ არის, ანუ იმ ოლქების ჩამონათვალი, სადაც კრიპტოვალუტების მაინინგი აკრძალულია, შესაძლოა, გაფართოვდეს.
თავად ეს გადაწყვეტილება კი, რუსეთში არსებული ელექტროენერგიის წონასწორობის შენარჩუნებას გულისხმობს. მაინინგი, როგორც ცნობილია, ენერგოტევადი პროცესია, რომელიც, როგორც წესი, მასშტაბურად ხორციელდება, რაც კონკრეტულ რეგიონებში ენერგომოთხოვნას ზრდის. სხვადასხვა მონაცემებით, კრიპტოვალუტების მაინერები რუსეთში ყოველწლიურად 16 მილიარდ კილოვატ-საათ ენერგიას მოიხმარენ, რაც ქვეყნის ჯამური ენერგომოხმარების 1.5%-ია. კრიპტომაინერების გააქტიურება კრიპტოვალუტების რეკორდულ გაძვირებას უკავშირდება, რადგან მაინინგი მხოლოდ მაშინაა მოგებიანი, როცა ბიტკოინი და სხვა ძირითადი ვალუტები კონკრეტული ფასის მაღლა ივაჭრება.
მნიშვნელოვანია გარემოება, რომ კრიპტოვალუტების მაინინგი რუსეთში დაშვებული და რეგულირებული საქმიანობაა, რომელიც ვლადიმირ პუტინმა საკანონმდებლო დონეზე მიმდინარე წლის აგვისტოში დაუშვა. გამომდინარე იქიდან, რომ რუსეთის ფედერაციაზე გლობალური კრიპტომაინინგის დაახლოებით 5% მოდის, ამ ბიზნესის რეგულირების გზით, რუსეთის პრეზიდენტს ომში მყოფი ქვეყნის ბიუჯეტისთვის დამატებითი შემოსავლის მობილიზება სურს, რომელიც თანხობრივად წლიურად $2 მილიარდზე არის პროგნოზირებული.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
