რუსეთის უშიშროების საბჭოს ხელმძღვანელი, სერგეი შოიგუ, საგანგებო ვიზიტით პეკინში გაემგზავრა და ჩინეთის საგარეო საქმეთა მინისტრს, ვანგ ის შეხვდა.
მოსალოდნელი იყო, რომ რუსეთი შექმნილი მომენტით სარგებლობას შეეცდება და ტრამპის სურვილებს ჩინეთთან სავაჭროდ გამოიყენებს, განსაკუთრებით სამხედრო მიმართულებაში.
გასული 3 წლის განმავლობაში, თითქმის არ დაფიქსირებულა ჩინეთის პირდაპირი სამხედრო დახმარება რუსეთისთვის, მძიმე შეიარაღების ან დიდი რაოდენობით საბრძოლო მასალების მიწოდების კუთხით, თუმცა რუსული სამხედრო ნაწარმის შესაქმნელად, აქტიურად გამოიყენება ჩინური ორმაგი დანიშნულების მაკომპლექტებლები და მიკროჩიპები, ასევე ჩინური მანქანა-დანადგარები და ჩარხები.
სავარაუდოდ, რუსეთი ივაჭრებს ჩინეთთან და ტრამპის ეკონომიკურ შეთავაზებზე უარის თქმის სანაცვლოდ, ჩინეთს მოთხოვს მძიმე საბრძოლო ტექნიკითა და საბრძოლო მასალებით დახმარებას, ასევე სანაცვლოდ შესთავაზებს მინერალებს, წიაღისეულს და არქტიკის ნავთობზე და სავაჭრო გზებზე წვდომას.
თანაც ეს იმ პირობებში, როდესაც პუტინსა და სი ძინ პინს შორის რამდენიმე დღის წინ გამართულ სატელეფონო საუბარში, სიმ პუტინს განუცხადა, რომ ჩინეთისა და რუსეთის ორმხრივ პარტნიორობას შეზღუდვები არ გააჩნია.
