,
მოსკოვში, რუსეთის საგარეო საქმეთა სამინისტროს ცენტრალური შენობიდან მილიონ დოლარზე მეტი ნაღდი ფული მოიპარეს. ადგილობრივი მედიის ცნობით, შემთხვევა ერთი წლის წინ მოხდა, მაგრამ ინფორმაცია ამის შესახებ მხოლოდ ახლა გავრცელდა.
ფული სავალუტო-საფინანსო დეპარტამენტის წამყვანი სპეციალისტ-ექსპერტის, ნატალია აგალცოვას კაბინეტიდან გაქრა. ამის შესახებ ცნობილი გახდა 2019 წლის 19 დეკემბერს, როდესაც აგალცოვას თანხა ბანკში უნდა მიეტანა. 20 დღით ადრე აგალცოვამ ირანში რუსეთის საელჩოსგან 1,5 მილიონი დოლარი მიიღო, რაც საკონსულო მომსახურების საფასურს წარმოადგენდა. საელჩო საბანკო გზავნილით ფულს ამერიკული სანქციების გამო ვერ აგზავნიდა, ამიტომ ის რუსეთში დიპლომატიური ფოსტით გაგზავნეს. ტელეკომპანია RENTV-ის ცნობით, მსგავსი პრაქტიკა არაერთ ქვეყანაშია აპრობირებული.
აღსანიშნავია, რომ რუსეთში გამოგზავნის წინ ეს ფული არაყი "აბსოლუტის" ყუთებში მოათავსეს და ისე გაამოამგზავრეს მოსკოვში.
2019 წლის 19 დეკემბერს აგალცოვამ უფროსს განუცხადა, რომ თავს ცუდად გრძნობდა და სამსახურში დააგვიანდებოდა. მისი კაბინეტი გახსნეს და დიდი ოდენობით ნაღდი ფული აღმოაჩინეს, რევიზიამ 1,066 მილიონი დოლარის დანაკლისი დაადგინა. სათვალთვალო კამერების ჩანაწერებზე გამოჩნდა, რომ წინა დღეს აგალცოვა კაბინეტიდან ორი დიდი ჩანთით გავიდა.
საგარეო საქმეთა სამინისტროს თანამშრომელი დააკავეს. მას ბრალი საბიუჯეტო სახსრების გაფლანგვაში ედება. გაუჩინარებული ფული ამ დრომდე ნაპოვნი არაა, თუმცა სიცრუის დეტექტორზე ჩატარებულმა დაკითხვამ აჩვენა, რომ აგალცოვამ ფულის ადგილმდებარეობა იცის.
ინფორმაციას ამის შესახებ რუსეთის საგარეო უწყებაშიც ადასტურებენ. საქმეზე გამოძიება დასრულებულია. სასამართლოში საქმის განხილვა 30 დეკემბერს დაიწყება.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
