რუსეთის საგარეო საქმეთა სამინისტრომ 3 დეკემბერს გაავრცელა განცხადება, რომელშიც საქართველოს მოთხოვნა — დიპლომატიური ურთიერთობების აღდგენის წინაპირობად რუსეთის მხრიდან აფხაზეთისა და სამაჩაბლოს აღიარების გაუქმება — „უსაფუძვლოდ, არარეალისტურად და ქართული მხარისთვისვე საზიანოდ“ შეაფასა.

რუსეთის საგარეო საქმეთა სამინისტროს ბოლო განცხადება კვლავ უსვამს ხაზს იმ ფაქტს, რომ მოსკოვი არ განიხილავს აფხაზეთისა და სამაჩაბლოს სტატუსზე რაიმე ფორმის დათმობას. ქართული მხარის მიერ წაყენებული პირობა — ურთიერთობების აღდგენა რუსეთის მხრიდან აღიარების გაუქმების შემთხვევაში — რუსეთმა „არარეალისტურად“ შეაფასა, რაც კიდევ ერთხელ მიუთითებს, რომ კრემლი ამ მიმართულებით არ გეგმავს პოზიციის შეცვლას.

მნიშვნელოვანია ისიც, რომ განცხადებაში თბილისი მიბმულია სააკაშვილის დროინდელ პოლიტიკურ ხაზთან, რაც პოლიტიკური მესიჯია — მოსკოვი ცდილობს ქართული მოთხოვნა „ძველი რეჟიმის“ მემკვიდრეობად წარმოაჩინოს.

რუსეთის მიერ ხაზგასმული ფორმულირება — „ნორმალიზებისთვის მზად ვართ იმ ფარგლებში, რასაც საქართველო შეძლებად მიიჩნევს“ — დიპლომატიური მანევრის სივრცეზე მიუთითებს, თუმცა არა სტატუსის საკითხზე.
ამგვარი მიდგომა ადასტურებს, რომ მოსკოვის პოზიცია სტატუსის თაობაზე უცვლელია, ხოლო დიალოგის უწყვეტობა მთლიანად ქართულ ინიციატივაზეა მიბმული.