საქართველოში დროებით თუ შედარებით ხანგრძლივად შემოსულმა რუსეთის ფედერაციის მოქალაქეებმა 2022 წლის 24 თებერვლის შემდეგ 1,550 კომპანია დააფუძნეს. გაცილებით უფრო დიდია რუსეთის მოქალაქეების ინდივიდუალურ მეწარმედ რეგისტრაციის ოდენობა, რაც 25,689-ს შეადგენს. რუსეთის ფედერაციის მოქალაქეთა დაფუძნებული კომპანიების შესახებ იუსტიციის სამინისტროს მიერ დეპუტატ თინათინ ბოკუჩავასთვის გაცემული პასუხიდან ირკვევა.

ინდმეწარმის სტატუსის აღების მასშტაბური მაჩვენებელი სავარაუდოდ ამ სტატუსის საგადასახადო შეღავათებთან არის დაკავშირებული. საქმე ისაა, რომ საქართველოში მცირე მეწარმის სტატუსის მფლობელებს შეუძლიათ წლის განმავლობაში მიღებულ 100,000 ლარამდე შემოსავალზე მხოლოდ 1%-იანი გადასახადი გადაიხადონ.

ამ სტატუსს ქვეყანაში ფლობენ როგორც ბიზნეს აქტივობით დაკავებული პირები, ასევე დასაქმებულებიც, რომლებიც კონკრეტული კომპანიებისთვის სერვისის მიწოდებით არიან დაკავებული. მაგალითად, პროგრამისტი დასაქმებულის ნაცვლად რეგისტრირდება ინდ. მეწარმედ და მას დამსაქმებელი სერვისის მიწოდების კონტრაქტს უფორმებს. ამ დროს პირი 20%-ის საშემოსავლო გადასახადის ნაცვლად, ბრუნვის 1%-იან გადასახადს იხდის. შესაბამისად, ინდ მეწარმის სტატუსი საქართველოში რუსეთის მოქალაქეთა ნაწილისთვის რელოკაციის ერთ-ერთი წამახალისებელი ფაქტორი აღმოჩნდა.