ჩვენ უნდა შევწყვიტოთ ტყუილი სამხედრო ოპერაციის შესახებ. ამის შესახებ რუსეთის დუმის თავდაცვის პოლიტიკის კომიტეტის ხელმძღვანელი, გენერალ-პოლკოვნიკი ანდრეი კარტაპოლოვი აცხადებს. ეს განცხადება მან „Soloviev Live“-ის ეთერში განაცხადა.

„ჩვენ უნდა შევწყვიტოთ ტყუილი. ამაზე არაერთხელ გვისაუბრია, მაგრამ, რატომღაც, ეს ვერ გაიგეს ცალკეულმა ლიდერებმა“, - განაცხადა დუმის კომიტეტის თავმჯდომარემ.

კარტაპოლოვმა აღნიშნა, რომ წაიკითხა საბჭოთა საინფორმაციო ბიუროს მოხსენებები 1941 წლისთვის, როდესაც გერმანელები მოსკოვში შევიდნენ. მისი თქმით, ამ შეტყობინებებიდან მაშინ ხალხი მიხვდა, რომ საფრთხე ემუქრებოდათ - „იცოდნენ, რომ მტერი ჩვენს მიწაზე იყო“, - აღნიშნა კომიტეტის თავმჯდომარემ.

მისივე თქმით, „ახლა მტერი მათ ტერიტორიაზეა“.

„ახლა ჩვენს მიწაზეა მტერი და საუბარია არა ახლად შეძენილ ტერიტორიებზე. ბელგოროდის რეგიონის თითქმის ყველა საზღვრისპირა სოფელი განადგურებულია. ჩვენ გვაქვს ქალაქი ვალუიკი - გამაგრებული ქალაქი, სხვათა შორის, რომელიც მუდმივი ცეცხლის ქვეშაა. ამის შესახებ ვიგებთ ვიღაცისგან - გუბერნატორებისგან, ტელეგრამის არხების მფლობელებისგან, სამხედრო კორესპონდენტებისგან და სხვა არავისგან“, - განაცხადა კარტაპოლოვმა.

მისივე თქმით, თავდაცვის სამინისტროს ანგარიშები არ იცვლება.

„ჩვენ გავანადგურეთ ათობით ჭურვი, გავანადგურეთ 50 ობიექტი, გავანადგურეთ ასობით ნაცისტი... და ეს არის. ჩვენი ხალხი სულელი არ არის. ხედავს, რომ არაფრად აგდებენ, ხედავს, რომ არ უნდათ მისთვის არც სრული სიმართლის თქმა და არც ამ სიმართლის ნაწილი. ამან შეიძლება გამოიწვიოს ნდობის დაკარგვა“, - აცხადებს დუმის თავდაცვის კომიტეტის ხელმძღვანელი.