,
დღეს, 24 ნოემბერს ე.წ. აფხაზეთის პრეზიდენტის ვებგვერდზე გამოქვეყნდა დოკუმენტი, რომელიც ასლან ბჟანიასა და ვლადიმერ პუტინს შორის შეხვედრისას იქნა ხელმოწერილი.
ეს არის პროგრამა, რომელიც რუსეთს და აფხაზეთს შორის ერთიანი სოციალური და ეკონომიკური სივრცის ფორმირებისთვის არის შემუშავებული. პროგრამა რუსეთის ფედერაციასა და ე.წ. აფხაზეთის რესპუბლიკას შორის სხვადასხვა სფეროებში ურთიერთობის გაღრმავებას ითვალისწინებს - ეს არის ორმაგი მოქალაქეობა, სამართლებრივი აქტები, რომლებიც არეგულირებენ აფხაზეთში რუსული ინვესტიციების მოზიდვას, ინტელექტუალური საკუთრების უფლებების დაცვასა და ა.შ.
ფაქტიურად ამ პროგრამით რუსეთის ფედერაცია ღიად ამზადებს ნიადაგს, საქართველოს ტერიტორიის ნაწილის ანექსიის და ე.წ. აფხაზეთის როგორც ერთ-ერთი სუბიექტის რუსეთის ფედერაციის შემადგენლობაში შეყვანისათვის, როგორც ეს ერთხელ უკვე მან განახორციელა ყირიმის შემთხვევაში.
დოკუმენტი მოიცავს 45 პუნქტს, რომელთა შესრულება უნდა მოხდეს უახლოესი 3 წლის განმავლობაში. ეს პროგრამა წარმოადგენს რუსეთსა და აფხაზეთს შორის 2014 წლის ალიანსისა და სტრატეგიული პარტნიორობის შესახებ ხელშეკრულების გაგრძელებას.
2021 წლამდე აფხაზეთის მინისტრთა კაბინეტმა და რუსეთის საგარეო საქმეთა სამინისტრომ უნდა შეიმუშაონ და ხელი მოაწერონ შეთანხმებას ორ ქვეყანას შორის ორმაგი მოქალაქეობის საკითხების მოგვარების შესახებ.
პროგრამა ითვალისწინებს ორმაგი დაბეგვრის თავიდან აცილების შესახებ ქვეყნების მთავრობებს შორის ხელშეკრულების შემუშავებასა და ხელმოწერას.
დოკუმენტი ასევე ეხება ენერგეტიკის სფეროსაც. 2021 წლის ივნისის ჩათვლით, ე.წ აფხაზეთის მთავრობამ, რუსეთის ენერგეტიკის, ეკონომიკური განვითარების და იუსტიციის სამინისტროებთან ერთად, უნდა შეიმუშაონ და მიიღონ ერთიანი ნორმატიული აქტები რუსეთის ელექტრომომარაგების კომპანიებიდან ინვესტიციების მოზიდვის, ინფრასრუქტურის განვითარების და მოდერნიზაციის და აფხაზეთის ენერგეტიკული უსაფრთხოების უზრუნველსაყოფად.
ე.წ. აფხაზეთის სახელმწიფო საბაჟო კომიტეტმა, რუსეთის ფედერალურ საბაჟო სამსახურთან ერთად, 2023 წლამდე უნდა მოამზადოს და ხელი მოაწეროს ორმხრივ აქტს საბაჟო რეგულირების სფეროში, კერძოდ:
2021-2023 წლებისთვის ასევე უნდა შემუშავდეს და მიღებულ იქნეს ე.წ. აფხაზეთის რესპუბლიკის კანონი ფინანსური იჯარის შესახებ. ამავე პერიოდში უნდა იქნას მიღებული რესპუბლიკის კანონი საინვესტიციო პარტნიორობის შესახებ.
სოციალური შრომის სამინისტრომრუს კოლეგებთან ერთად, 2021 წელს უნდა შეიმუშაოს და ხელი მოაწეროს მემორანდუმს და გრაფიკს აფხაზეთში საწარმოო უბედური შემთხვევებისა და პროფესიული დაავადებების სავალდებულო სოციალური დაზღვევის სისტემის ფორმირების შესახებ.
ორ ქვეყანას შორის ერთიანი სოციალური და ეკონომიკური სივრცის ფორმირების პროგრამა წარმოადგენს აფხაზეთის რესპუბლიკასა და რუსეთის ფედერაციას შორის ალიანსისა და სტრატეგიული პარტნიორობის შესახებ 2014 წლის 24 ნოემბრის ხელშეკრულების ლოგიკურ გაგრძელებას.
პროგრამა მიზნად ისახავს შექმნას ხელსაყრელი პირობები, ეწ. აფხაზეთის რესპუბლიკის მონაწილეობის იმ ინტეგრაციის პროცესებში, რომლებიც ხორციელდება რუსეთის ინიციატივით და დახმარებით - ნათქვამია ე.წ. აფხაზეთის პრეზიდენტის ვებგვერდზე გამოქვეყნებულ დოკუმენტში.
სამწუხაროდ, დღეს დილით გამოქვეყნებულ ამ დოკუმენტზე, საქართველოს ოფიციალურ სტრუქტურებს, ჯერ-ჯერობით არანაირი რეაგირება არ მოუხდენიათ.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
