- უკრაინული აზოვის ბრიგადა დონეცკის ოლქში კონტრშეტევაზე გადავიდა, ნიუ-იორკის დასავლეთ ნაწილში ოპერატიული ალყა გაარღვია და ბრძოლით ჩარჩენილ უკრაინელებამდე გავიდა. ამით კი ქალაქის დასავლეთ ნაწილზე უკრაინული კონტროლი აღდგა. ეს ის დასახლებაა, რომლის ტრაფარეტიც რუსმა პროპაგანდისტებმა ტელევიზიებში აფრიალეს და ალყითაც იწონებდნენ თავს. ოპერატიული ალყა გულისხმობს მდგომარეობას, როდესაც მოწინააღმდეგეს რამდენიმე მხრიდან გარემოცული აქვს ქალაქი, ხოლო დარჩენილ შესასვლელ-გასასვლელს საცეცხლე პოზიციებიდან აკონტროლებს.
აზოვის ბრიგადა უკრაინაში ერთ-ერთი ყველაზე ბრძოლისუნარიანი დანაყოფია. მის ჩამოყალიბებაში კრიტიკული როლი სწორედ ქართველებს მიუძღვით. მათი რიგები უკრაინელი ნაციონალისტებისაგან შედგება, რომლებიც მაღალი სამხედრო მორალით გამოირჩევიან. მისი წევრები ბრიგადაში შესვლის წინ ფიცს დებენ, რომ თავს გასწირავენ უკრაინისათვის და უკან არ დაიხევენ მტერთან ბრძოლაში. ბრიგადის ხელმძღვანელი უკრაინის ეროვნული გმირის წოდების მქონე დენის პროკოპენკოა, რომლის წინაპრებიც ფინური წარმოშობისანი არიან და რუსული იმპერიალიზმის მსხვერპლი იყვნენ. კარელიასა და ფინეთს რუსული ტირანია რამდენჯერმე დაატყდა თავს.
აზოვის ბრიგადა 10 წლისაა და მისმა წევრებმა თავი 2014 და 2022 წლის მარიუპოლისათვის გამართულ სამ სხვადასხვა ბრძოლაში გამოიჩინეს, ისევე როგორც შახტარსკისა და ილოვაისკისათვის შეტაკებებში. ამ უკანასკნელში რუსებმა მუხანათურად დაარღვიეს მშვიდობიანი დერეფნის შეთანხმება და უკანდახეულ უკრაინულ დანაყოფებს ჩაუსაფრდნენ და მათი ნაწილი დახოცეს. არადა შეთანხმებისამებრ რუსებს უსაფრთხო მწვანე დერეფანი უნდა გაეკეთებინათ უკანდახეული უკრაინელებისათვის. აზოვის დანაყოფი მაშინ ბრიგადის ზომისა იყო და 500 სამხედროსაგან შედგებოდა, ახლა კი 5000 სამხედროს აღწევს.
- უკრაინის გენერალური შტაბის უფროსმა სირსკიმ CNN-თან ინტერვიუში აღნიშნა, რომ რუსული შეტევა დონეცკის ოლქში, პოკროვსკის მიმართულებაზე პრაქტიკულად შეჩერებულია. მანვე დაამატა, რომ რუსებს ამ მონაკვეთზე ყველაზე გამოცდილი და ბრძოლისუნარიანი ნაწილები ჰყავთ მობილიზებული. მიუხედავად ამისა, რუსებმა სწრაფი იერიშის დაგვირგვინება და პოკროვსკამდე ჩასვლა ჯერ კიდევ ვერ შეძლეს. პროცესში კი იფიტებიან. არადა რუსი პროპაგანდისტები სექტემბრის ბოლოსათვის ქალაქის აღებას პროგნოზირებდნენ და დონეცკის ოლქის საზღვარზე გასვლასაც აანონსებდნენ.
- კურსკის ოლქში უკრაინული ლოკალური შეტევები გრძელდება. ისინი რუსებს ინიციატივის დაბრუნების უფლებას არ აძლევენ. ამასობაში კი ზურგში სანგრების თხრა და ფორტიფიკაციებისების მომზადება გრძელდება. კორენევოს ირგვლივ უკრაინული იერიში კვლავ აქტიურად მიმდინარეობს, ისევე როგორც რაიონულ ცენტრ ლგოვის მიმართულებაზე, მალაია ლოკნიას ჩრდილო-აღმოსავლეთით. თავად რუსები ამბობენ ლგოვზე უკრაინული საფრთხე არ მოხსნილაო.
რუსული ნაწილები კურსკის ოლქში იმ დასახლებებს ძარცვავენ, რომელთა დაცვაც ევალებათ. ხოლო იმ დასახლებებს, რომელიც უკრაინელებმა დაიკავეს 500 კილოგრამიან საავიაციო ბომბებს უშენენ. არადა ამ დასახლებებში თავად მათივე მოქალაქეები ცხოვრობენ. ზოგადად, კრემლისათვის მოსახლეობას არავითარი ფასი არ აქვს.
პრეზიდენტ ზელენსკის განცხადებით უკრაინელებმა კურსკის ოლქში 6000 რუსი გაანეიტრალეს - მოკლულების, ტყვეებისა და დაჭრილების სახით.
- რუსული ნავთობის ფასი 69 დოლარზე ჩამოვიდა. რუსულ ეკონომიკასა თუ სამხედრო ინდუსტრიას თუკი რაიმე კვებავს არამხოლოდ გაზის გაყიდვისაგან შემოსული თანხა, არამედ სწორედ ნავთობია. ზოგადად, გრძელვადიანად, ასეთი პოლიტიკური და ეკონომიკური სისტემის პირობებში რუსულ ეკონომიკას რთული მომავალი აქვს.
- აშშ-მ 250 მილიონიანი სამხედრო დახმარების პაკეტი დაანონსა, რომელშიც შედის:
+ სტინგერები - ხელით გადასატანი ჰაერსაწინააღმდეგო იარაღი;
+ HIMARS-ის სისტემები და ამუნიცია;
+ ყველაზე ხშირად გამოყენებული 155 მილიმეტრიანი საარტილერიო ჭურვები;
+ ტანკსაწინააღმდეგო ჯაველინები;
+ ბრედლის ქვეითთა საბრძოლო მანქანები;
+ MRAP მანქანები, რომლებიც ნაღმის აფეთქებას უძლებს;
ეს ყველაფერი ძალიან მნიშვნელოვანი დახმარების ნაწილია. თუმცა აუცილებელია აშშ-ს მხრიდან აინთოს მწვანე შუქი ამერიკული იარაღის რუსეთის მთელს ტერიტორიაზე გამოყენების შესახებ. რუსეთისათვის დაუსჯელობა მხოლოდ წამაქეზებელია გააგრძელოს უკრაინული მშვიდობიანი ქალაქების დაბომბვა.
- უკრაინელებისათვის ერთ-ერთი მთავარი თავისტკივილი რუსული დრონები იყო. ახლა უკრაინული დრონები რუსულ დრონებზე ნადირობენ და თან საკმაოდ წარმატებით და იაფად. ყარაბაღის ომიდან მოყოლებული ნათლად გამოჩნდა, რომ თანამედროვე ომში დრონებს კრიტიკული მნიშვნელობა ექნება.
