,
მთავრობამ, მევენახეების მხარდასაჭერად, რთველის სუბსიდირების გადაწყვეტილება მიიღო და რქაწითელისა და კახური მწვანეს ფასი მინიმუმ 80 თეთრით განისაზღვრა, - ამის შესახებ პრემიერმინისტრმა გიორგი გახარიამ მთავრობის სხდომაზე განაცხადა.
„მოგეხსენებათ რთველი გვიახლოვდება. ერთ-ერთი სამიზნე მთავრობის ანტიკრიზისული გეგმის გახლავთ სოფელი, ფერმერი, ქართველი გლეხი. ჩვენ ყველაფერი გავაკეთეთ იმისთვის, რომ სხვადასხვა ინსტრუმენტებით ამ ადამიანებს დავხმარებოდით, ქართველი ფერმერი გაგვეძლიერებინა კრიზისის პირობებში. ბოლო წლების განმავლობაში, ვითარდება მეღვინეობა და მევენახეობა. 2019 წელი იყო რეკორდული, როდესაც საქართველოდან 94 მილიონი ბოთლის ექსპორტი მოხდა. რა თქმა უნდა, შიდა მოხმარებაც იზრდებოდა. საერთოდ მეღვინეობა ქართულ ექსპორტში 2012 წელს იყო დაახლოებით 2,5% და დღეის მონაცემებით ეს არის 6%. ეს არის ძალზედ სერიოზული დინამიკა განვითარების, დარგის ზრდის. ამიტომ, შეუძლებელი იყო ჩვენ ყურადღება არ მიგვექცია ამ დარგისთვის და ანტიკრიზისული გეგმა სპეციალურად მევენახეებისთის არ მოგვემზადებინა, განსაკუთრებით რთველის პირობებში. მთავრობამ მიიღო გადაწყვეტილება მოახდინოს სუბსიდირება რთველის. განსაკუთრებით ისეთი ჯიშების, როგორიც არის რქაწითელი და კახური მწვანე, რომლის ფასი არ იქნება 80 თეთრზე ნაკლები. ამისთვის ბიუჯეტი უკვე გამოყოფილია. შესაბამისი დავალება სოფლის მეურნეობის სამინისტროს აქვს მიღებული. თუ საჭირო იქნება სახელმწიფოც ჩაერთვება შესყიდვებში, იმ შემთხვევაში თუ ასეთი უკიდურესი აუცილებლობა გახდება. მაგრამ ყველა შემთხვევაში ქართველმა მევენახეებმა უნდა იცოდნენ, რომ მინიმალური ფასი ქართულ ყურძენზე, რქაწითელსა და კახურ მწვანეზე იქნება 80 თეთრი. ეს ის მინიმალური შესაძლებლობაა კრიზისის პირობებში, რაც ჩვენ შეგვიძლია დახმარების სახით გავუწიოთ ქართველ მევენახეებს“, - განაცხადა გიორგი გახარიამ.
პანდემიით შექმნილ ვითარებაში, მევენახეობა-მეღვინეობის დარგის მხარდასაჭერად, სახელმწიფო 2020 წლის რთველის სუბსიდირებას განახორციელებს.
მთავრობის გადაწყვეტილებით, მევენახეები მიიღებენ არანაკლებ 80 თეთრს 1 კგ. რქაწითელსა და კახურ მწვანეზე.
სუბსიდიას მიიღებენ ის ღვინის კომპანიები, რომლებიც 2020 წლის რთველის განმავლობაში შეისყიდის და გადაამუშავებს კახეთის რეგიონიდან არანაკლებ 1000 ტონა რქაწითელის ან კახური მწვანის ჯიშის ყურძენს და შესყიდული 1 კგ ყურძნის სანაცვლოდ ყურძნის ჩამბარებელს გადაუხდის არანაკლებ 0,80 ლარს.
1 კგ ყურძნის შესყიდვის სანაცვლოდ, ღვინის კომპანიებზე სუბსიდია გაიცემა: 1 კგ რქაწითელისათვის - 0,30 ლარი და 1 კგ კახური მწვანისთვის - 0,30 ლარი; ამ მიზნისთვის, ბიუჯეტიდან გათვალისწინებულია 40 მლნ ლარის გამოყოფა.
ღვინის კომპანიების მხრიდან ყურძენზე მოთხოვნის ნაკლებობის შემთხვევაში, სახელმწიფო მმართველობაში არსებული სს „აკურა“ ჩაერთვება ყურძნის მიღება-გადამუშავების პროცესში.
რთველი 2020-ის ორგანიზებულად წარმართვის მიზნით, შეიქმნება რთველის საკოორდინაციო შტაბი, ყურძნის რეალიზაციის ხელშეწყობის მიზნით, თვითმმართველ ქალაქებში გამოიყოფა შესაბამისი ადგილები.
შექმნილი ვითარების გათვალისწინებით, მევენახე-მეღვინეებისთვის იაფ ფინანსურ რესურსზე ხელმისაწვდომობისთვის, შეღავათიანი აგროკრედიტის სახელმწიფო პროგრამაში განხორციელდა რიგი ცვლილებები, ასევე დარგის მხარდაჭერას ახორციელებს სასოფლო-სამეურნეო კოოპერატივების ხელშეწყობის სახელმწიფო პროგრამა.
სტრატეგიულ ბაზრებზე ახალი ონლაინ პლატფორმების გამოყენებაში მცირე მარნებს მხარდაჭერას ღვინის ეროვნული სააგენტო აღმოუჩენს.
ღვინის ეროვნული სააგენტო უზრუნველყოფს სადეგუსტაციო ღვინის გაგზავნას საერთაშორისო ბაზრებზე.
მევენახეობა-მეღვინეობის დარგში სახელმწიფოს მიერ გატარებული სწორი პოლიტიკის შედეგად, ბოლო 2 წლის განმავლობაში რთველი სუბსიდიის ფორმით მხარდაჭერის გარეშე წარმატებით ტარდებოდა.
სწორმა პოლიტიკამ დარგი მნიშვნელოვნად გააძლიერა: გაშენდა ახალი ვენახები, შეიქმნა ახალი საწარმოები, გაუმჯობესებულია ღვინის ხარისხი, გაფართოვდა საექსპორტო ბაზრების არეალი, 2019 წელს რეკორდულ რაოდენობამდე გაიზარდა ღვინის ექსპორტი, მუშაობს აგროკრედიტისა და აგროდაზღვევის სისტემა.
