,
დღეს საქალაქო სასამართლოში ეკონომიკის მინისტრის ყოფილი მოადგილის რომეო მიქაუტაძის სხდომა გაიმართა, რომელსაც მედიის წარმომადგენლები ვერ დაესწრნენ. როგორც მიქაუტაძის ადვოკატმა ბექა ნემსიწვერიძემ განაცხადა, პროცესი პატარა დარბაზში ჩატარდა და ხალხის სიმრავლის გამო, ჟურნალისტები ვერ დაესწრნენ.
მისივე თქმით, დაცვის მხარის ინტერესია, სასამართლო სხდომა საჯარო იყოს და იმედი აქვს, რომ შემდეგი პროცესი უფრო დიდ დარბაზში ჩატარდება და მედიაც იქნება.
მიქაუტაძეს პროკურატურამ ბრალი ჯამში სისხლის სამართლის ოთხი მუხლით წარუდგინა. 30 სექტემბერს კი ცნობილი გახდა, რომ მას ბრალი დაუმძიმდა, თუმცა როგორც მისი ადვოკატი ამბობს, სასჯელი იგივე დარჩა და ეკონომიკის სამინისტროს ყოფილ მაღალჩინოსანს დამტკიცების შემთხვევაში კვლავ 9-დან 12-მდე პატიმრობა ელის. მიქაუტაძე წარდგენილ ბრალს არ აღიარებს.
"ბრალის დამძიმება სასჯელზე არანაირად არ მოქმედებს, 194-ე მუხლი რაც იყო, რომელიც 9-დან 12-მდე პატიმრობას ითვალისწინებს ისევ არის. უბრალოდ გაიზარდა თანხა, ადრე პროკურატურა ამბობდა, რომ 2.5 მლნ ლარის ქონება იყიდა დაუსაბუთებელი თანხებით, ახლა ამბობს, რომ ეს თანხა 8.5 მლნ-ია. თავიანთი ჩატარებული რევიზიის საფუძველზე ამბობენ, თუმცა ამ რევიზიაში ბევრი უზუსტობაა. მათ შორის არის ისეთი ქონება მიწერილი რომეო მიქაუტაძესა და მის ოჯახზე, რომლებიც რეალურად არ არის მათი საკუთრება. ასევე დასკვნაში არა აქვთ საერთოდ გათვალისწინებული ის გარემოება, რომ ბევრი ქონება, რაზეც ამბობენ, რომ დაუსაბუთებელი თანხებით არის შეძენილი, საერთოდ საბანკო კრედიტით ნაყიდია და საბანკო კრედიტი ვერანაირად ვერ ჩაითვლება დაუსაბუთებელ შემოსავლად. აქედან გამომდინარე, ვთვლით, რომ ეს რევიზია არასწორად ჩატარებულია, არასწორად არის დათვლილი როგორც ქონების ღირებულება, ისე ბევრი სხვა გარემოება არ იქნა გათვალისწინებული", - ამბობს ადვოკატი.
მიქაუტაძის შემდეგი სასამართლო პროცესი 20 ოქტომბერს გაიმართება. ეკონომიკის მინისტრის ყოფილი მოადგილე სახელმწიფო უსაფრთხოების სამსახურმა 2025 წლის ივნისში დააკავა. გამოძიება სისხლის სამართლის კოდექსის 194-ე მუხლის მე-3 ნაწილის "გ" ქვეპუნქტითა და 332-ე მუხლის მეორე ნაწილით მიმდინარეობს, რაც სასჯელის სახით 9-დან 12 წლამდე პატიმრობას ითვალისწინებს.
ამ ეტაპზე პროკურატურა მიქაუტაძეს ჯამში 8 499 334 ლარის უკანონო/დაუსაბუთებელი შემოსავლის ლეგალიზებას ედავება. პროკურატურის ინფორმაციით, თემატური რევიზიის დასკვნის თანახმად, ბრალდებულს 2017-2024 წლებში მიღებული აქვს განსაკუთრებით დიდი ოდენობით უკანონო და დაუსაბუთებელი შემოსავალი, საიდანაც შეძენილი აქტივების ღირებულებამ შეადგინა 8 499 334
ლარი.
ირანისკენ კიდევ ერთი მშვენიერი არმადა მიემართება, - ამის შესახებ აშშ-ის პრეზიდენტმა, დონალდ ტრამპმა აიოვას შტატში, მხარდამჭერების წინაშე სიტყვით გამოსვლისას განაცხადა.
„ივნისში, ირანის ბირთვული პოტენციალი გავანადგურეთ. ამას ხალხი 22 წელი ელოდა. მათ ბირთვულ იარაღამდე დაახლოებით ერთი თვე აშორებდათ. ეს უნდა გაგვეკეთებინა“, - განაცხადა ტრამპმა.
დონალდ ტრამპმა იმედი გამოთქვა, რომ ირანი აშშ-სთან შეთანხმებას გააფორმებს.
„ახლა ირანისკენ კიდევ ერთი მშვენიერი არმადა მიემართება. დიდი იმედი მაქვს, რომ შეთანხმებას გააფორმებენ. შეთანხმება პირველივე ჯერზე უნდა გაეფორმებინათ“, - აღნიშნა აშშ-ის პრეზიდენტმა.
ცნობისთვის, ავიამზიდ „აბრაამ ლინკოლნის“ დამრტყმელი ჯგუფი ახლო აღმოსავლეთში ორშაბათს ჩავიდა. აშშ-ის ცენტრალურმა სარდლობამ განაცხადა, რომ დამრტყმელი ჯგუფი სამხედრო მზადყოფნის შემოწმების მიზნით წვრთნებს ჩაატარებს.
ინფორმაციისთვის, აშშ-ის პრეზიდენტის, დონალდ ტრამპის განცხადებით, ირანმა აშშ-სთან ახალი ბირთვული შეთანხმება უნდა დადოს, რომლის ფარგლებშიც თეირანი ურანის გამდიდრებას ვეღარ შეძლებს. 2025 წლის გაზაფხულზე აშშ-ის პრეზიდენტმა ირანის უზენაეს ლიდერს, აიათოლა ალი ხამენეის წერილი გაუგზავნა და მოლაპარაკებებისკენ მოუწოდა. წერილის თანახმად, დონალდ ტრამპმა ირანს ორი თვე მისცა, რათა ბირთვული პროგრამა შეეჩერებინა. 2025 წლის აპრილში, ომანში აშშ-ისა და ირანის დელეგაციებს შორის მოლაპარაკებები დაიწყო, რომელიც ივნისამდე გაგრძელდა. ირანმა ბირთვული პროგრამის შეჩერების შესახებ აშშ-ის მოთხოვნას მიუღებელი უწოდა და განაცხადა, რომ აშშ-ს ახალ წინადადებას წარუდგენდა. გასული წლის 13 ივნისს ისრაელმა ირანში რამდენიმე სამხედრო ობიექტს დაარტყა, ხოლო ისრაელის იერიშების დაწყებიდან ერთი კვირის შემდეგ, აშშ-მა ირანში ბირთვული ობიექტები დაბომბა.
