როგორ აცდუნა გერმანელმა მზვერავმა ქალმა ბერლინში სსრკ-ის საელჩოს სამხედრო ატაშე, გენერალი მაქსიმ პურკაევი და რა თქვა იოსებ ბესარიონოვიჩმა, ეს რომ გაიგო.

1939 წლის აგვისტოში საელჩოს სამხედრო ატაშედ გენერალი მაქსიმ პურკაევი დაინიშნა, რომელიც, როგორც იმდროინდელი გენერლები ჟუკოვი, მოსკალენკო, კონევი და სხვები წერდნენ, უაღრესად პატიოსანი და დამსახურებული კაცი იყო, მაგრამ უცოლო (გარდაეცვალა 1930-იანი წლების დასაწყისში).

ბერლინში დანიშვნამდე იგი რამდენჯერმე შეხვდა იოსებ სტალინს და მისგან რჩევა-დარიგებები მიიღო.

როგორც ამბობენ, ადოლფ ჰიტლერთან აუდენციის დროს რაიხსფიურერი საბჭოთა გენერლით დაინტერესდა და შესაბამისად, გერმანელებმა მასზე ნადირობა დაიწყეს, გადაბირების მიზნით. რასაკვირველია, მაქსიმმა ეს იცოდა და ამიტომ ფრთხილად იყო.

მაგრამ... როგორც ნათქვამია - "ეძებეთ ქალი"!

გერმანელებმა საბჭოთა სამხედრო ატაშეს, რომელიც გრუ-ს დავალებებს ასრულებდა კოდური სახელით "მარმარილო" ("მრამორ'), "ეკონომკად" ლამაზი ქალი "შეურჩიეს", რომელმაც მისთვის 'თაფლიანი ხაფანგის' როლი შეასრულა. უცოლო გენერალს გულში ჩაუვარდა გერმანელი ლამაზმანი (გულს ვერ უბრძანებ!) და... წავიდა და რა წავიდა!!! მოკლედ, ამუშავდა "თაფლის ხაფანგი" - ასე უწოდებენ ქალის მონაწილეობას მნიშვნელოვანი ფიგური გადასაბირებლად.

რა თქმა უნდა, გერმანულ კონტრდაზვერვასაც მეტი რა უნდოდა... ერთ დილას მაქსიმ პურკაევს გადასცეს კონვერტი ინტიმური ფოტოებით და უთხრეს, თუ გერმანიის მხარეზე არ გადავიდოდა, ფოტოებს მოსკოვში გერმანიის ელჩს გრაფ შულენბურგს გადასცემდნენ, ის კი მოლოტოვს მისცემდა.

მაქსიმ პურკაევმა, როგორც იტყვიან, მთლიანად გაისიგრძეგანა შეცდომის მნიშვნელობა, ჯერ ელჩს ალექსანდრე შკვარცევს აცნობა, შემდეგ კი გადაწყვიტა თვითონვე მოეხსენებინა ყველაფერი მოსკოვისათვის, მოხსენებას თან დაურთო ფოტოებიც.

რა თქმა უნდა, ეს ამბავი დაუყონებლივ აცნობეს იოსებ სტალინს. სამხედრო ატაშე სასწრაფოდ გამოიძახეს მოსკოვში. მან კარგად იცოდა, რომ მსგავსი შეცდომისათვის მკაცრად სჯიდნენ, თვით დახვრეტამდეც კი.

1940 წლის 14 თებერვალი, ბერლინი-მოსკოვის მატარებელი ბელორუსიის ვაგზალზე გაჩერდა. გენერალი ვაგონიდან ჩამოვიდა თუ არა, იმავწუთს სტაცეს ხელი და... იოსებ სტალინის აგარაკზე მიიყვანეს.

როგორც თვითონ მაქსიმ პურაკევი უყვებოდა ახლო მეგობრებს, ბესარიონოვიჩმა სამხედრო ატაშე დინჯად მიიღო, სადილზე მიიპატიჟა და დიდხანს ესაუბრა. მაქსიმ პურკაევმა ყველაფერი გულახდილად უამბო. სტალინმა მოუსმინა, გაიარ-გამოიარა და უთხრა:
"გმადლობ, რომ პატიოსნად აღიარეთ შეცდომა. დაბრუნდით ბერლინში და თქვენი საქმე გააგრძელეთ. ჩვენ თქვენი გვჯერა. აბა, წარმატებებს გისურვებთ".

მაქსიმ პურკაევი ომის დროს და ომის შემდეგ მაღალ თანამდებობებზე მუშაობდა. მოულოდნელად გარდაიცვალა 58 წლის ასაკში, 1953 წლის პირველ იანვარს.

ფოტოზე:
მაქსიმ პურკაევი გერმანიის საგარეო საქმეთა სამინისტროში (აუსამტში) გერმანელ თანამშრომელ ქალებთან ერთად. 1939 წელი.