,
მოსკოვიდან 500 კილომეტრით დაშორებული სოფლის გამგებელმა ადმინისტრაციული შენობის დამლაგებელს თავად სთხოვა, ადგილობრივ არჩევნებში კანდიდატად დარეგისტრირებულიყო. ახლა 35 წლის მარინა უდგოდსკაიას გამგებლის თანამდებობა უკავია, მისმა ყოფილმა უფროსმა კი კაბინეტი დაცალა და პოსტს დაემშვიდობა.
რუსეთში ადგილობრივი არჩევნები სექტემბერში ჩატარდა. სოფელ პოვალიხინოსა და მის გარშემო მდებარე კიდევ 29 სოფლის გამგებელს, ვლადიმერ პუტინის “ერთიანი რუსეთის” წევრს, ნიკოლაი ლოკტევს, მოსახლეობაში კონკურენტი არ გამოუჩნდა: კანდიდატად, მის გარდა, არავინ დარეგისტრირდა. იმისათვის, რომ არჩევნები შემდგარიყო, ლოკტევმა სოფლის ადმინისტრაციული შენობის დამლაგებელს სთხოვა, ფორმალურად დარეგისტრირებულიყო კანდიდატად.
ადგილობრივი საარჩევნო კომისიის წევრის თქმით, ლოკტევი არ ელოდა, რომ ადმინისტრაციის დამლაგებელს ვინმე მისცემდა ხმას. თუმცა, ყველაფერი ისე არ წარიმართა, როგორც ის ელოდა: მოსახლეობის 62%-მა სწორედ “ფორმალურ” კანდიდატს, მარინა უდგოდსკაიას დაუჭირა მხარი.
BBC-ის ცნობით, სოფელში აქტიური საარჩევნო კამპანია არ ჩატარებულა. არ ყოფილა შეხვედრები ამომრჩეველთან, ბილბორდები თუ პლაკატები. ახლა, მედიის ყურადღების ცენტრში მყოფი გამარჯვებული ამბობს, რომ პოლიტიკით დაინტერესებული არ ყოფილა, არც ცნობადობა სურს და უნდა, ისე იცხოვროს, როგორც მანამდე.
“კონცენტრირდებიან იმ ფაქტზე, რომ მე დამლაგებელი ვარ. დამლაგებელი რა, ადამიანი არ არის?” – ციტირებს მას “რადიო თავისუფლება”.
ამბობს, რომ თავდაპირველად შეშინებული იყო, თუმცა აპირებს, იმუშაოს საპასუხისმგებლო თანამდებობაზე, რომელზეც აირჩიეს.
“რატომაც არ უნდა ვცადო? ვფიქრობ, იმუშავებს”, – აცხადებს ის.
საზოგადოების ნაწილი რუსეთის ერთი პატარა სოფლის მაგალითზე საუბრობს პუტინის პარტიის შემცირებულ პოპულარობაზე და ცვლილებების მომლოდინე რიგით მოქალაქეებზე, რომლებიც დაიღალნენ.
“რადიო თავისუფლების” ცნობით, რომელიც ადგილზე ჩავიდა, სოფელ პოვალიხინოში 250 ადამიანი ცხოვრობს და ის უდიდესი სოფელია რაიონში. სხვა დასახლებული პუნქტების უმრავლესობა მიტოვებულია, ახალგაზრდობა კი დიდი ქალაქებისკენ მიიწევს.
“რა მოგვცა ჩვენ [მმართველმა პარტიამ] “ერთიანმა რუსეთმა”? შესაძლოა, ის რაღაცას აკეთებს მოსკოვში, მაგრამ პროვინციისთვის – არაფერს. სოფელი იშლება”, – ამბობს ერთ-ერთი ადგილობრივი.
ზოგიერთი აღნიშნავს იმასაც, რომ კონკრეტულად ამ სოფელში, იმჟამინდელი გამგებლის წინააღმდეგ მოსახლეობის გაერთიანება პერსონალური საკითხი იყო, ვინაიდან ნიკოლაი ლოკტევმა დიდი ხნის წინ შეწყვიტა საქმის კეთება. თავად ყოფილი გამგებელი უარყოფს აღნიშნულს, ამბობს, რომ ყველაფერს აკეთებდა რაც საჭირო იყო და ხალხს, უბრალოდ, ცვლილება სურდა.
“ვფიქრობ, რომ ის[მარინა] გაუმკლავდება [ამ თანამდებობას]. მთელი სოფელი დაეხმარება. რა თქმა უნდა, მის განათლებას ცოტათი გაუმჯობესება სჭირდება”, – ამბობს სოფლის მაღაზიის გამყიდველი BBC-სთან საუბრისას.
იმ პარტიის ლიდერი კი, რომელიც უდგოდსკაიას კანდიდატურას მხარს უჭერდა, ახლადარჩეულ გამგებელზე საუბრისას ბელარუსის ოპოზიციის ლიდერის ისტორიას იხსენებს. მისი თქმით, სვეტლანა ტიხანოვსკაია არჩევნებამდე დიასახლისი იყო, პოლიტიკისგან შორს, თუმცა ახლა თავისი პოპულარობის პიკზეა.
რაიონის ოფიციალური პირები აცხადებენ, რომ დაეხმარებიან ახლადარჩეულ გამგებელს ბიუჯეტის, გადასახადებისა და სხვა საკითხების შესახებ ცნობიერების ამაღლებაში.
რუსეთში ადგილობრივი არჩევნები მიმდინარე წლის სექტემბერში ჩატარდა. ეკონომიკური პრობლემებისა და პანდემიის კრიზისის ფონზე, აღნიშნულ არჩევნებს არაერთი დამკვირვებელი განიხილავდა, როგორც ტესტს მმართველი პარტიისთვის “ერთიანი რუსეთი”, რომლის მიმართაც უკმაყოფილება მზარდია.
არჩევნებს ასევე უძღოდა წინ ოპოზიციონერ ალექსეი ნავალნის მიერ წამოწყებული კამპანიაც, რომლის ფარგლებშიც ის მოსახლეობას ტაქტიკურად ხმის მიცემისკენ მოუწოდებდა, მმართველი პარტიის ძალაუფლების შესარყევად. შედეგად, ქალაქების საბჭოებში მისი არაერთი თანაგუნდელი არჩიეს.
წყარო: netgazeti.ge
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
