,
ინფრასტრუქტურის მინისტრმა რევაზ სოხაძემ დილის გადაცემის საავტორო რუბრიკაში – „ბიზნეს ინსაიდერი საქართველო“ ქვეშეთი-კობის საგზაო ინფრასტრუქტურის მშენებლობის მიმდინარეობასა და პროექტთან დაკავშირებულ გამოწვევებზე ისაუბრა.
მინისტრის განცხადებით, მლეთა-გუდაურისა და გუდაური-კობის მონაკვეთები ზამთრის პერიოდში ხშირად იკეტება ზვავსაშიშროების გამო, რაც გადაადგილებას მნიშვნელოვნად აფერხებს. მისი თქმით, აღნიშნული პრობლემის აღმოსაფხვრელად სამუშაოები ინტენსიურად მიმდინარეობს და ქვეშეთი-კობის გზის მშენებლობის პროექტის ფარგლებში, ზაფხულში გაიხსნება გუდაურამდე მისასვლელი გზა, რაც წლის ნებისმიერ სეზონზე უზრუნველყოფს უსაფრთხო, შეუფერხებელ და კომფორტულ გადაადგილებას, მათ შორის სტეფანწმინდა-თბილისის მიმართულებითაც.
მან ასევე აღნიშნა, რომ გზის საბოლოოდ გახსნამდე საავტომობილო გზების დეპარტამენტი 24-საათიან რეჟიმში მუშაობს და ათასობით ადამიანია მობილიზებული იმისთვის, რომ რთულ მეტეოროლოგიურ პირობებშიც კი გადაადგილების შეფერხება მინიმუმამდე იყოს დაყვანილი.
რევაზ სოხაძის განცხადებით, ქვეშეთი–კობის მონაკვეთი წარმოადგენს ერთ-ერთ ყველაზე რთულ საინჟინრო პროექტს ქვეყანაში. ამ ეტაპზე მიმდინარეობს რეგიონში ყველაზე დიდი – 9 კილომეტრიანი გვირაბის მოპირკეთების სამუშაოები, ასევე შენდება ყველაზე მაღალი – 166 მეტრის უნიკალური ხიდი.
„ეს პროექტი მნიშვნელოვანია არა მხოლოდ ქვეყნის სატრანზიტო პოტენციალის გაძლიერებისთვის, არამედ ტურისტული მიმართულებითაც. მისი განხორციელება შესაძლებლობას მისცემს მოსახლეობას, უკეთ გაეცნოს ხადას ხეობის უნიკალურ ბუნებას და კიდევ ერთ გამორჩეულ რეგიონს“, – განაცხადა მინისტრმა.
მისივე თქმით, პარალელურად მიმდინარეობს გველეთი-ლარსის მონაკვეთის მშენებლობა, უახლოეს პერიოდში გამოცხადდება ტენდერი არშა-სტეფანწმინდის 8-კილომეტრიან მონაკვეთზე, ასევე იგეგმება წიწამური-ჟინვალის მაგისტრალის მშენებლობის დაწყება. გარდა ამისა, დაგეგმილია ფასანაურის შემოვლითი 6-კილომეტრიანი გზის მშენებლობა, რაც მთლიანობაში ამ მიმართულებით მნიშვნელოვნად გააუმჯობესებს მაგისტრალის ხარისხს და კომფორტს.
რევაზ სოხაძემ ყურადღება გაამახვილა თბილისის შემოვლითი გზის პროექტზეც და აღნიშნა, რომ უკვე გამოცხადდა ტენდერი მეორე ლოტზე – წიწამური-ავჭალის მონაკვეთზე, ხოლო თებერვალში გამოცხადდება მესამე ლოტი. მინისტრის თქმით, წელს უკვე დაიწყება თბილისის შემოვლითი გზის მშენებლობა.
„მეოთხე და მეხუთე ლოტებიც წელს გამოცხადდება და გვაქვს დიდი იმედი, რომ სამუშაოები აქტიურ ფაზაში შევა. ეს პროექტი მნიშვნელოვანია არა მხოლოდ აღმოსავლეთ-დასავლეთის დერეფნის განვითარების კუთხით, არამედ დედაქალაქის სატრანსპორტო სისტემის გაუმჯობესებისა და განტვირთვისთვისაც“, - განაცხადა მინისტრმა.
ევროკომისიამ ვიქტორ ორბანის მმართველობის პერიოდში გაყინული 35 მილიარდი ევროს განბლოკვის მიზნით პიტერ მადიარს 27 პირობა წაუყენა, - ინფორმაციას Financial Times-ი ავრცელებს.
გამოცემის ინფორმაციით, უნგრეთის საპარლამენტო არჩევნებში გამარჯვების შემდეგ ევროკომისიამ პიტერ მადიარის პარტია „ტისასთან“ მოლაპარაკებები უკვე დაიწყო.
ევროკომისიის მიერ წამოყენებულ პირობებს შორის უნგრეთის მიერ რეფორმების განხორციელება და უკრაინასთან ურთიერთობების გაუმჯობესება შედის.
ევროპელი დიპლომატების განცხადებით, ევროკავშირის წევრი სახელმწიფოები ელიან, რომ პიტერ მადიარის მთავრობა ვიქტორ ორბანის მიერ უკრაინისთვის 90 მილიარდი ევროს სესხის გამოყოფასა და რუსეთის წინააღმდეგ სანქციების ახალ პაკეტზე დაწესებულ ვეტოს მოხსნის.
ასევე, ევროკომისიის წარმომადგენლის ცნობით, 35 მილიარდი ევრო გაყინულია უნგრეთის მოქმედი პრემიერ-მინისტრის ვიქტორ ორბანის მიერ აუცილებელ რეფორმებზე უარის, ასევე, კანონის უზენაესობის დარღვევისა და კორუფციის გაზრდის გამო.
გამოცემა წერს, რომ გაყინული თანხების განბლოკვის მიზნით უნგრეთის ახალ მთავრობას ისეთი წარსული გადაწყვეტილებების გაუქმება მოუწევს, რომლებსაც ევროკავშირი მისი წესების დარღვევად მიიჩნევს.
