“ნაციონალურმა მოძრაობამ” კიდევ 4 პოლიტიკურ სუბიექტთან ერთად საარჩევნო ბლოკი “გაერთიანებული ოპოზიცია — ძალა ერთობაშია” შექმნა. ბლოკის შემადგენლობაში არიან: ენმ, რესპუბლიკური პარტია, მოძრაობა “სახელმწიფო ხალხისთვის”, მოძრაობა “ჩვენ თვითონ” და პარტია “პროგრესი და თავისუფლება”.

ბლოკის შემაგენლობაში შემავალი პოლიტიკური სუბიექტები 2020 წლის საპარლამენტო არჩევნებზე საერთო პროპორციული სიით წარსდგებიან.

როგორც დღეს, 15 სექტემბერს გამართულ პრეზენტაციაზე ენმ-ს ერთ-ერთმა ლიდერმა გრიგოლ ვაშაძემ განაცხადა, გაერთიანებული ოპოზიცია არა თუ დაიშალა, არამედ გაფართოვდა, ძალა და რესურსი, მათ შორის, ინტელექტუალური, შეემატა.

რესპუბლიკური პარტიის ერთ-ერთი ლიდერის, ხათუნა სამნიძის განმარტებით, ენმ-სთან ერთ ბლოკში იმიტომ გაერთიანდნენ, რომ ენმ არის პოლიტიკური ძალა, რომელიც “ბიძინა ივანიშვილს ყველაზე მეტად აწუხებს”. მისი თქმით, ამ გაერთიანებით, დღეს კოალიციური მთავრობისკენ პირველი ნაბიჯები გადაიდგა.

“პოლიტიკა არ არის არც სიძულვილი, არც ზიზღი და არც კომპლექსები, არც სიყვარული არაა პოლიტიკა. პოლიტიკა არის პრინციპები და ღირებულებები და საერთო ინტერესები იმისთვის, რომ ქვეყანა წინ წავიდეს. “რესპუბლიკელებმა” გადავწყვიტეთ და დაემთხვა ჩვენი ინტერესები, ერთიანად გავერთიანდეთ საარჩევნო ბლოკში ენმ-სთან — “ძალა ერთობაშია”.

იმიტომ, რომ ეს არის პოლიტიკური ძალა, რომელიც ყველაზე მეტად აწუხებს ბიძინა ივანიშვილს. ამ ძალის განადგურებასა და მოსპობაზე საუბრობენ პრემიერები, თავდაცვის მინისტრები. იმიტომ, რომ ისინი ახმოვანებენ ბიძინა ივანიშვილს. ჩვენ გავერთიანდით იმისთვის, რომ რესპუბლიკელებმა ჩვენი წვლილი შევიტანოთ ჩვენი მანდატის ფარგლებში იმისთვის, რომ ამ არჩევნებზე ჩვენმა ქვეყანამ ახალი, ძლიერი კოალიციური მთავრობა”, — განაცხადა სამნიძემ.