,
მსოფლიოს ყველაზე სწრაფად მზარდ სოციალურ ქსელ TikTok-ს, შესაძლოა, ამერიკის შეერთებულ შტატებში ოპერირება აეკრძალოს. ცოტა ხნის წინ, აშშ-ის წარმომადგენელთა პალატამ მხარი დაუჭირა კანონპროექტს, რომლის თანახმად, TikTok-ს ქვეყანაში საქმიანობა აეკრძალება, თუკი მისი მშობელი ჩინური კომპანია ByteDance-ი მას სხვა კომპანიაზე არ გაასხვისებს.
მარტივად რომ ვთქვათ, TikTok-ის მფლობელმა კომპანიამ სოციალური ქსელი უნდა გაყიდოს, რადგან ის აშშ-ის ეროვნული უსაფრთხოებისთვის რისკებს შეიცავს, რაც იმ ფაქტითაა განპირობებული, რომ ByteDance-ის მართვის პროცესში ჩინეთის მთავრობის ჩარევის შემთხვევები ფიქსირდება.
TikTok-ს ამჟამად 2 მილიარდი აქტიური მომხმარებელი ჰყავს, აქედან 170 მილიონი ამერიკაშია რეგისტრირებული, რაც ქვეყნის მოსახლეობის თითქმის ნახევარია. სოციალური ქსელის ასეთი პოპულარობა მას განსაკუთრებით საშიშ პლატფორმად აქცევს, სწორედ ამიტომ აშშ-ის მთავრობა ამ უპრეცედენტო ნაბიჯის გადასადგმელად ემზადება. მართალია, კანონპროექტი ჯერ სენატის და პრეზიდენტის მიერ ოფიციალურად დამტკიცებული არ არის, თუმცა კანონმდებლების მხრიდან ამის მზაობა ნამდვილად არსებობს.
აღსანიშნავია, რომ TikTok-ის გასხვისების ან აკრძალვის საკითხს აქტიურად უჭერს მხარს როგორც მოქმედი პრეზიდენტი ჯო ბაიდენი, ასევე ყოფილი პრეზიდენტი დონალდ ტრამპი, რომელმაც პირველმა გააჟღერა ეს იდეა თავისი მმართველობის პერიოდში.
კანონპროექტის დამტკიცების შემთხვევაში, კომპანია ByteDance-ს 5 თვე ექნება TikTok-ის გასაყიდად. თუკი ის სოციალურ ქსელს არ გაასხვისებს, მაშინ ამერიკის მოსახლეობას TikTok-ის გამოყენება აეკრძალება, რაც სოციალური ქსელისთვის აშშ-ის ბაზარზე სასიკვდილო განაჩენი იქნება.
როგორც ByteDance-ში აცხადებენ, კანონპროექტის დამტკიცების შემთხვევაში, კომპანია სასამართლოში საჩივარს მყისიერად შეიტანს, რადგან TikTok-ის აკრძალვის რეალური საფუძველი არ არსებობს.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
