მერაბ დვალიშვილმა დღეს, 15 სექტემბერს ამერიკელი მებრძოლი, შონ ო’მალი დაამარცხა და UFC-ის სუპერმსუბუქი წონის ახალი ჩემპიონი გახდა. დვალიშვილისთვის UFC-ში ეს გამარჯვება ზედიზედ მე-11 იყო. ამასთანავე, დვალიშვილმა შერეულ ორთაბრძოლებში გამართული 22 ბრძოლიდან 18 შემთხვევაში გამარჯვება მოიპოვა. ბოლოს ის 2018 წელს დამარცხდა.

„ბიზნესპრესნიუსი“ უკვე წერდა იმის შესახებ, თუ რა ღირს UFC-ის საჩემპიონო ქამარი. ფასი დაახლოებით 330 ათას დოლარს შეადგენს. ცნობისთვის, ქამრის ღირებულება ტიტულის დაცვის რაოდენობის მიხედვით იზრდება და ყოველი დაცვისთვის ძვირფასი ქვა ემატება.

ამასთანავე, დავინტერესდით, რამდენს გამოიმუშავებს მერაბ დვალიშვილი გამარჯვების შემდეგ. უცხოური მედია წერს, რომ დვალიშვილმა გამარჯვებით საბაზისო ხელფასი სავარაუდოდ 250 ათასი ამერიკული დოლარიდან 500 ათასი აშშ დოლარის ფარგლებში იმერყევებს.

უფრო კონკრეტულად, მაგალითად The sportster-ი წერს, რომ დვალიშვილი, სავარაუდოდ, აიღებს საბაზისო ხელფასს, რომლის რაოდნეობაც დაახლოებით 500 000 დოლარი იქნება. გამოცემა წერს, რომ დვალიშვილი, სავარაუდოდ, აიღებს დამატებით პრემიასაც.

ამასთანავე, marca.com-ის ინფორმაციით, დვალიშვილის ქონება ამ ეტაპზე 2 მილიონ დოლარად არის შეფასებული. გამოცემა აღნიშნავს, რომ დვალიშვილი ერთ მოგებულ ბრძოლაში საშუალოდ 250 ათას დოლარს იღებს.

Essentiallysports-ი კი წერს, რომ დვალიშვილი შონ ო’მალის დამარცხებითა და მოპოვებული გამარჯვების შედეგად, დაახლოებით 300 ათას აშშ დოლარს გამოიმუშავებს. გამოცემის ინფორმაციით, აღნიშნულს დაემატება ბონუსიც.

შეგახსენებთ, მიმდინარე წლის თებერვალში დვალიშვილმა UFC-ში კიდევ ერთ გამარჯვებას მიაღწია. მან ბრძოლაში ჰენრი სეხუდო დაამარცხა. მაშინ ქართველმა სპორტსმენმა 211 ათასი ამერიკული დოლარი გამოიმუშავა.

გარდა ამისა, სეხუდოს დამარცხებამდე მერაბმა პეტრ იანი დაამარცხა და ამ შემთხვევაშიც მის მიერ მიღებული თანხა 211 ათასი დოლარი იყო. აღსანიშნავია ისიც, რომ მერაბს კარიერაში მოგებული ორთაბრძოლიდან მაქსიმუმ 211 ათასი დოლარი აქვს მიღებული, შესაბამისად, მოსალოდნელია, რომ ომალის დამარცხებით დვალიშვილი ყველაზე მეტს გამოიმუშავებს.

წყარო: bpn.ge