- ბახმუტის ირგვლივ სიტუაცია კრიტიკულია. თუკი ქალაქის ურბანულ სივრცეში რუსულ ნაწილებს აღმოსავლეთ რაიონებშიც კი უჭირთ სწრაფი გადაადგილება, ქალაქის შემოგარენში, ფლანგებიდან შედარებით წარმატებით მოძრაობენ. უკრაინელები ახერხებენ და კვლავ ფლობენ მომარაგების არტერიას ბახმუტი-ჩასივ იარის გზის სახით, მაგრამ სოფელ ხრომოვესთან, რომელზეც აღნიშნული გზა გადის, რუსები საკმაოდ ახლოს არიან.
უკრაინელები ბახმუტში როტაციას ახორციელებენ - ქალაქიდან გარკვეული ნაწილები გადის და სხვა შედის. ეს შეიძლება უკანდახევის მოსამზადებელი სამუშაო იყოს ან პირიქით, გამოცდილი დანაყოფებით კონკრეტული პოზიციების შენარჩუნებას ემსახურებოდეს ქალაქში.
სავარაუდოა, რომ ქალაქის აღმოსავლეთ ნაწილი რუსების კონტროლქვეშ გადავა, რადგან მისი დაცვა და მომარაგება ჭირს, მით უფრო რომ ხიდები აფეთქებულია თავად უკრაინელთა მიერ. ცოცხალი ძალა ეტაპობრივად დატოვებს აღმოსაველთს, თუმცა რუსების მიერ ტერიტორიის სწრაფი კონტროლი რამდენად იქნება შესაძლებელი ეს ცალკე საკითხია - ქალაქის ის ნაწილი, რომლიდანაც უკრაინელები გამოვლენ ტანკსაწინააღმდეგო და ქვეითსაწინააღმდეგო მახეებით აუცილებლად იქნება გამაგრებული.
- უკრაინაში 28 ერთეული "ჩელენჯერ 2" ტანკი ჩავა. ბრიტანელები თავდაპირველად 14 ტანკს გამოდიოდნენ, მაგრამ შემდგომი შეფასებით მათი რაოდენობა გაორმაგდა. "ჩელენჯერ 2" ძალიან ძლიერი ტანკია, ეფექტური დაცვითა და პრაქტიკულად სრულად განადგურების უპრეცედენტო შემთხვევით, თუკი მეგობრულ ცეცხლს არ ჩავთვლით, რომლითაც ბრიტანელებმა თავად გაანადგურეს საკუთარი ტანკი.
- არის ვერსია, რომ რუსეთი ზაპორიჟიასა და ხერსონის ოლქს მოლაპარაკებებისათვის ინახავს - ყირიმსა და დონბასში გადასაცვლელად. რუსეთისათვის ნათელია, რომ ვერც ხერსონის და ვერც ზაპორიჟიას (ქალაქები) აღებას რუსეთი ვერ შეძლებს, ამიტომ ადმინისტრაციულ ცენტრად მელიტოპოლი აქვთ გამოცხადებული. რეალურად კი მათი ეფექტური კონტროლი ყოველგვარი ბუნებრივი ბარიერის გარეშე, შუა მდელოებზე აქტიური ომის პერიოდში ძალიან ძვირი უჯდებათ. ამ რეალობის გათვალისწინებით, რუსეთს მათი შენარჩუნება პერმანენტული შეტევის მცდელობით თუ შეუძლია, რაც რესურსების უზომო ხარჯვასთანაა დაკავშირებული ხოლო რამდენად წარუმატებელია ეს შეტევები რამდენჯერმე ვიხილეთ უკვე. ამასთან, მთელი ზაპორიჟიას რაიონი უკრაინული არტილერიის დარტყმების ქვეშ იმყოფება და ამის მასშტაბები არ კლებულობს - მატულობს.
ცხადია, უკრაინელები მსგავს მოლაპარაკებაზე არ აპირებენ წასვლას, მაგრამ რუსებს აშკარა გამოფიტვა დაეტყოთ. დაპირებული და დაანონსებული შეტევა ფრონტის ამ მიმართულებით ვერც კი წამოიწყეს. ორიხივისაკენ გადაადგილების მცდელობა კი ორ დღეში უკანდახევით დაასრულეს.
ზაპორიჟია ადვილი დასაცავი არ არის - სტეპური, უტყეო გარემო და დიდი დასახლებების სიმცირე დამცველს საკმაოდ რთულ მდგომარეობაში აყენებთ. რეალურად, რუსებს ხერსონისა და ზაპორიჟიას ოლქების შენარჩუნება ყველაზე მეტად გაუჭირდება. თუმცა ზაპორიჟია ერთგვარი ფარია ყირიმისათვის, რომელშიც მთელ საზღვაო პერიმეტრზე სანგრებია გათხრილი და ფორტიფიკაციების მოწყობა მიმდინარეობს რუსების მხრიდან.
- ბრიტანული ჟურნალი "ეკონომისტი" წერს, ჩინეთის პოზიციაზე უკრაინაში. ანალიზი ისეთია, როგორც მოსალოდნელი იყო - ჩინეთს რუსეთის დასავლეთის ხელით დამარცხება არ აწყობს, მაგრამ კმაყოფილია იმით, რომ დასავლეთის ფოკუსი აღმოსავლეთ აზიიდან მოშორებული და ევროპაზეა დაბრუნებული. ეს პეკინს საკუთარი საგარეო პოლიტიკის უფრო თამამად განხორციელების საშუალებას აძლევს იმ რეგიონებში, რომლებიც ომამდე ან რუსეთის უკანა ეზოდ იყო მოაზრებული - ცენტრალური აზიის ქვეყნები - ან აშშ და მისი მოკავშირეები ედავებოდნენ - სამხრეთ ჩინეთის ზღვა. ცხადია, რუსეთი ჩინეთის მოკავშირე არ არის და პეკინში ეს კარგად იციან. დასუსტებული რუსეთი დასუსტებულ დასავლეთთან ერთად ჩინეთის გაძლიერებას ნიშნავს.
მაგრამ ჩინეთი თავის რეპუტაციაზე ზრუნავს და "ეკონომისტის" მიხედვით პეკინი ძალიან გაბრაზებულია რუსეთის მხრიდან ინფორმაციის გამოჟონვაზე, რომლის მიხედვითაც ჩინეთი კრემლს დახმარებას აღუთქვამს. ამით ჩინეთის, როგორც ფორმალურად ნეიტრალური სახელმწიფოს რეპუტაციაც ზარალდება. ამიტომ შემდგომში რა ფორმაში და რამდენად ღიად გაგრძელდება რუსულ-ჩინური სამხედრო ურთიერთობა - უცნობია.
სხვათა შორის ჩინეთში უკვე დაიწყო იმ ისტორიული რუკების ბეჭდვა, რომელზეც რუსული ქალაქები აღმოსავლეთ აზიაში ჩინური ტოპონიმებით არის გაფორმებული. თითქოს არაფერი, მაგრამ მსგავსი ნაბიჯები სერიოზული განცხადების ტოლფასია. დასავლეთში გახიზნული რუსი ანალიტიკოსები თავად ადარებენ ამ მდგომარეობას როგორც რუსეთის ყელთან მიდებულ ჩინურ ცელს, რომელზეც რუსეთში არავინ საუბრობს.
