2023 წლის 10-11 ოქტომბრის შეჯამება უკრაინაში:
- დონეცკის ოლქში, ქალაქი დონეცკის მომიჯნავედ, უკრაინელთა აღმოსავლეთის თავდაცვის ერთ-ერთ ღერძზე, ავდიივკაზე მასირებული ფლანგური შეტევა დაიწყო. რუსები უტევენ როგორც ჩრდილო-დასავლეთიდან, კრასნოჰორივკადან ისე სამხრეთიდან, ვოდიანე-ოპიტნეს მონაკვეთიდან. შეტევაში მონაწილეობენ სეპარატისტების დარჩენილი დანაყოფები, მძიმე ტექნიკა, რუსული სპეციალური დანაყოფები და მოხალისეები. ავდიივკა ის წერტილია, რომელზეც 2022 წლის ომის დაწყებიდან პრაქტიკულად არ შეცვლილა ფრონტის ხაზი და მიუხედავად არაერთი მცდელობისა რუსებმა ვერ შეძლეს ავდიივკას აღება.
ქალაქი ავდიივკა იბომბება როგორც მძიმე არტილერიით ისე ავიაციის გამოყენებით. დაიბომბა ავდიივკას რკინიგზის ხაზიც.
უკრაინელები ინარჩუნებენ პოზიციებს და მეტიც, ჩრდილო-დასავლეთიდან წამოსული რუსული არმიის სატანკო და მძიმე ტექნიკის კოლონა საარტილერიო დარტყმებით გაანადგურეს. სიტუაცია მსგავსია სამხრეთ-დასავლეთის ფლანგზეც, სადაც უკრაინელებმა რუსების გაჭრა ტონენკეს მიმართულებით აღკვეთეს. მიუხედავად ამისა რუსული იერიშები არ შეჩერებულა.
ავდვიივკაში უკრაინელებს ერთ-ერთი საუკეთესო მებრძოლები ჰყავთ, შესაბამისად ისინი მაქსიმალურად ცდილობენ პოზიციების შენარჩუნებას. ამასთან, უკრაინელებმა ავდიივკას დასაცავად შესაძლოა ჩართონ დამატებითი რეზერვებიც.
აქამდე ყველა შეტევა ავდიივკას მიმართულებით სრული კრახით დამთავრდა რუსებისათვის. როგორც ჩანს ახლა საკმაოდ დიდი მომზადებისა და ძალების შემდეგ დაიწყეს იერიში მისი მიმართულებით.
- რუსეთის ბრიანსკის ოლქში მობილიზებული წვევამდელების ნაწილს დაარტყეს უკრაინელებმა, სასაზღვრო პერიმეტრის სიახლოვეს. არიან დაჭრილები და დაღუპულები.
- ბახმუტის სამხრეთით უკრაინული შეტევა აქტიურად მიმდინარეობს. მიუხედავად რუსების რიცხობრივი უპირატესობა უკრაინელები პროფესიონალიზმის ხარჯზე ლოკალურ საყრდენ პუნქტებს უტევენ. მათი დაკავების შემთხვევაში გზა ოპიტნეს მიმართულებით იხსნება.
- მასობრივად დაიწყო რუსების სასარგებლოდ მომუშავე კოლაბორაციული ქსელის გამოვლენა და მათი დაკავება უკრაინაში. ისინი არამხოლოდ იარაღის კოორდინატებს აძლევდნენ მოწინააღმდეგეს, არამედ დაბომბვის შემდეგ კორექტირების ინფორმაციას აწვდიდნენ რუსებს. გარდა ამისა პანიკის დათესვა კოლაბორაციონისტების კიდევ ერთი ფუნქციაა.
- უცვლელია ფრონტის ხაზი სამხრეთში, ზაპორიჟიას ოლქში და ჩრდილოეთში, ხარკივის ოლქში, თუმცა ორივე მიმართულებით შეტაკებები აქტიურად მიმდინარეობს. ინიციატივა გარდამავალია.
მიყევით ბმუულს - გიორგი კობერიძე
