2023 წლის 13-14 სექტემბრის შეჯამება უკრაინაში:
- უკრაინელთა მხრიდან საბოლოო დაწოლა ხორციელდება ბახმუტის სამხრეთით მდებარე კლიშჩიივკაზე, ანდრიივკასა და კურდიუმივკაზე. დღეს უკრაინის თავდაცვის სამინისტრომ გაავრცელა ინფორმაცია, რომ ანდრიივკა გათავისუფლებულ იქნა რუსეთის კონტროლისაგან, მაგრამ ადგილზე მყოფმა სამხედროებმა უარყვეს ეს ინფორმაცია და აღნიშნეს, რომ ინტენსიური საბრძოლო მოქმედებები სამივე წერტილში კვლავ აქტიურია. ამასთან, უკრაინული შეტევა საკმაოდ დიდ მანძილზეა გავრცელებული, მათ შორის ბახმუტის დასავლეთ გარეუბანშიც.
- შავ ზღვაში რუსულ საბრძოლო და საპატრულო ხომალდებზე უკრაინული წყლის დრონების მხრიდან თავდასხმები მიმდინარეობს. რუსეთს საზღვაო ბლოკადის განხორციელება ძალიან ძვირი უჯდება. უკრაინელთა მხრიდან ნავთობის კოშკურების გათავისუფლების შემდეგ, რუსებს სარადარო ინფორმაციაც აღარ აქვთ ძველებურად ეფექტური.
- გამთენიას ევპატორიაში რუსეთის ჰაერსაწინააღმდეგო სისტემა S400-ზე "ნეპტუნის" ტიპის რაკეტებით იერიში იქნა მიტანილი. ეს ერთ-ერთი ყველაზე ძვირადღირებული და ლიმიტირებული სისტემაა. ყირიმის ჰაერიდან ეფექტური დაცვა რუსეთს ძალიან გაუჭირდება. ღიმილისმომგვრელია, რომ ამ ფონზე მარია ზახაროვა უკრაინელებს დაემუქრა, ყირიმის ხიდზე არ მიიტანოთ იერიში თორემ პასუხი მკაცრი იქნებაო.
- ATACMS-ის ტიპის რაკეტების გადაცემაზე მოლაპარაკებები საბოლოო ეტაპზეა და სავარაუდოდ პოზიტიური შედეგებით დასრულდება.
- რუსეთისათვის იარაღის (ძირითადად ჭურვების) მთავარი მიმწოდებელი ჩრდილოეთ კორეაა. კიმ ჩენ ინის გუშინდელი მოსკოვური ვოიაჟის შემდეგ სავარაუდოა, რომ რუსეთის მხრიდან ჩრდილოეთ კორეაზე დამოკიდებულება კიდევ გაიზრდება, მით უფრო რომ არტილერიის მხრივ ფხენიანი მნიშვნელოვან არსენალს ფლობს. თუმცა გასათვალისწინებელია ისიც, რომ მოსკოვის ჩრდილოეთ კორეასთან მიტმასნება მის პოლიტიკურ რეპუტაციაზე ძალიან მოქმედებს, ხოლო ფხემნიანზე დამოკიდებულება ირიბად ჩინეთზე დამოკიდებულებასაც მოასწავებს. თუმცა ვნახოთ, ზოგადად, ჩრდილოეთ კორეაც ვაჭრობს ყველასთან და რუსეთში საჩვენებელი ვიზიტი მხოლოდ რუსეთისაგან ფულისა და რესურსების წამოღება არ იქნება. ეგ ისეთი რეჟიმია, ვინც მეტს შესთავაზებს იმის თამაშს დაჰყვება.
- ნიუ-იორკ თაიმსი მიმოიხილავს უკრაინელთა საჭიროებებს და აცხადებს, რომ ომის მაღალი ინტენსივობიდან გამომდინარე სასწრაფოდაა სამხედრო პროდუქცია გასაორმაგებელი. ზოგადად, ამ ომმა ანახა რომ ასეთი მასშტაბისა და ხანგრძლივობის საბრძოლო მოქმედებებისათვის არც დასავლური წარმოების ომამდელი ტემპი კმაროდა და არც რუსული. ახლა რუსეთმა წარმოება თავის მაქსიმუმზე აიყვანა და პრაქტიკულად ინდუსტრიის დიდი ნაწილი ომისაკენ მომართა. დასავლეთშიც მოხდება ამ მიმართულებით ცვლილებები.
ამასთან, დღეს ბორის ჯონსონმა ბრიტანულ ჟურნალ Spectator-ში გამოაქვეყნა სტატია და აღნიშნა, რომ იმაზე მეტი იარაღის მიწოდებაა საჭირო, ვიდრე ეს ახლა ხდება. მან აღნიშნა, რომ თუკი რუსეთი გაიმარჯვებს პირველი საფრთხე ბალტიისპირეთსა და საქართველოს დაუდგება, ხოლო დასავლური სამართლებრივი დღის წესრიგი სწრაფადვე დასრულდება.
- რუმინეთში, ნაფარულ ვიქტორიაში მეორე რუსული დრონის ნამსხვრევი იპოვეს. რუმინეთმა სამხედრო ძალების გადასროლა მოახდინა ამ მიმართულებაზე.
- ევროპარლამენტმა ლუკაშენკა ომში პასუხისმგებლად გამოაცხადა და მოუწოდა სისხლის სამართლის სასამართლოს მასზეც დაიწყოს გამოძიება.
