ევროპაში მდებარე შენგენის ზონაში მყოფი ქვეყნების ტერიტორიაზე უვიზოდ შესასვლელად საჭიროა საქართველოს მოქალაქის ბიომეტრიული პასპორტი. აღნიშნული დოკუმენტი ბოლო 10 წლის განმავლობაში უნდა იყოს გაცემული და პირის დაბრუნების თარიღიდან კიდევ მინიმუმ 3 თვის ვადით უნდა ჰქონდეს მოქმედების ძალა.

ოფიციალური წესების თანახმად, უცხო ქვეყნის ტერიტორიაზე შესვლისას სასაზღვრო სამსახურის წარმომადგენლებმა, შესაძლოა, რამდენიმე დამატებითი საბუთის წარდგენა მოითხოვონ. ასეთი დოკუმენტების სიაში შედის:

1. საქართველოშიდასაბრუნებელი ავიაბილეთი და უცხო ქვეყნის ტერიტორიაზე არსებული სასტუმროს მიერ მოწოდებული მოქმედი ჯავშანის დამადასტურებელი საბუთი.
2. სამოგზაურო დაზღვევა.

შენგენის ზონაში უვიზოდ მიმოსვლის მსურველებმა, ასევე, უნდა გაითვალისწინონ ფინანსური რეგულაციებიც. ევროპის ქვეყნებში უვიზოდ შესვლისათვის მესაზღვრეს ასევე უნდა წარუდგინონ მოგზაურობის ფინანსურად უზრუნველყოფის დამადასტურებელი ფაქტები. ეს შეიძლება იყოს ნაღდი ფული ან პირის მფლობელობაში არსებული საბანკო ელექტრონული ბარათები, ასევე დაფინანსების შესახებ ცნობა ან აღნიშნულ ქვეყანაში მცხოვრები მასპინძლის მიერ მოწოდებული საგარანტიო წერილი.

ჩამოთვლილ  ფინანსურ რეგულაციებს თითოეული ქვეყანა ინდივიდუალურად განსაზღვრავს შიდა კანონმდებობლის მიხედვით. თუმცა, ფინანსური უზრუნველყოფისთვის გათვალისწინებული თანხის რაოდენობა შენგენის ზონის წევრი ქვეყნის ტერიტორიაზე ყოფნისას, როგორც წესი,  დღეში 50 ევროს არ აღემატება.

თუკი მოგზაურობის მიზანი არა ტურისტული, არამედ სამედიცინო მომსახურების მიღება, ან კონფერენციებსა თუ სემინარებში მონაწილეობაა,  დამატებით საჭირო იქნება კონფერენციის პროგრამა. მკურნალობის მიზნით მოგზაურ ადამიანებს, სასურველია, თან ჰქონდეთ იმ კონკრეტული სამედიცინო ორგანიზაციის თანხმობის დოკუმენტი, რომელშიც დაგეგმილი აქვთ მკურნალობა.