2023 წლის 26-27 მაისის შეჯამება უკრაინაში:
- ომის განმავლობაში ერთ-ერთი ყველაზე მასშტაბური სარაკეტო და საარტილერიო იერიში მიმდინარეობს რუსეთის ბელგოროდის ოლქზე. განსაკუთრებით აქტიურად იბომბება შებეკინოს მუნიციპალიტეტი. დარტყმები არ წყდება სამხედრო და ლოჯისტიკურ. რუსეთის მომარაგების ერთ-ერთი ხაზი ხარკივისა და ლუგანსკის ოლქების მიმართულებით სწორედ ბელგოროდზე გადის. ამას ემატება რუსული არმიის გარკვეული ნაწილის ამ ოლქში გადმოსროლაც, რაც პრო-უკრაინული ძალების მიერ წინა დღეებში განხორციელებული იერიშის შედეგია.
შებეკინოს გარდა აქტიური საარტილერიო ცეცხლის ქვეშაა მოქცეული გრაფოვკაც. დასახლება საზღვრიდან 19 კილომეტრში მდებარეობს. იქვეა წყალსაცავიც. ასეთი გამალებული იერიშები იმის მანიშნებელია, რომ უკრაინელები რუსებს ბელგოროდზე ფოკუსის შენარჩუნებას აიძულებენ და თავდაცვით ფორტიფიკაციებსაც უნგრევენ, რათა მეტი ბუნდოვანება შექმნან თავიანთ გეგმებთან მიმართებით.
- გუშინ დრონებით იერიში განხორციელდა როსტოვის ოლქშიც. საჰაერო განგაშისა და ჰაერსაწინააღმდეგო რაკეტების მუშაობა მიმდინარეობდა ოლქის საზღვრისპირა ტერიტორიაზე. გავრცელდა ინფორმაცია, თითქოს ამ პროცესში რუსებმა თავიანთი გამანადგურებელიც ჩამოაგდეს, მაგრამ ამის დადასტურება ნამდვილად არ მომხდარა.
- იბომბება ნავთობტერმინალები რუსეთის ტერიტორიაზე. ბოლო 48 საათში იერიშები განხორციელდა არამხოლოდ ბელგოროდისა და ბრიანსკის ოლქებზე, არამედ უფრო სიღრმეშიც, ფსკოვის ოლქის მიმართულებაზე. თუმცა სხვა დეტალები პრაქტიკულად არაა ცნობილი. ინფორმაციის ფართოდ გავრცელებას უკრაინაც ერიდება და რუსეთიც.
- დღეს Visegrad 24 ავრცელებდა ინფორმაციას, რომ პრო-უკრაინული ძალების მხრიდან პარტიზანული აქტივობა შეინიშნებოდა რუსეთში, ბრიანსკის ოლქში საზღვრისპირა დასახლება სუშანის მიმართულებით. თუმცა თავად აღნიშნეს, რომ დადასტურებული არაფერია. ომის ამ სტადიაზე რაიმეს დადასტურებით თქმა, მით უფრო პარტიზანული ან დივერსიული აქტივობის ვერ მოხერხდება. სააგენტო აღნიშნავს, რომ იერიში დრონებითაც მიმდინარეობს. შესაძლოა დრონებისა თუ ქვეითების იერიშის მასშტაბი საკმაოდ მცირე იყოს, მაგრამ ფსიქოლოგიური წნეხი ამითაც ძალიან იზრდება. საინტერესოა ის ფაქტი, რომ ბრიანსკის ოლქის ეს ნაწილი ბელარუსის საზღვრის სიახლოვეს მდებარეობს და მარტის დასაწყისში პრო-უკრაინული ძალების შეტევის წერტილი ერთხელ უკვე ნამდვილად იყო.
- გუშინ უკრაინელებმა მძლავრად დაბომბეს რუსული სამხედრო პოზიციები ქალაქი დონეცკის მიმართულებით. პირველ იერიშს განმეორებითი დაბომბვები მოჰყვა. რუსები აცხადებდნენ რომ უკრაინელები HIMARS-ის რაკეტებს იყენებდნენ.
- გუშინვე რუსებმა უკრაინის ქალაქ დნიპროში საავადმყოფო დაბომბეს. საავადმყოფოში სამოქალაქო პაციენტები იმყოფებოდნენ. ესაა ტერორიზმის ტიპური სახე.
- ძალიან აქტიურად იბომბება ზაპორიჟიას ოლქის ოკუპირებული ნაწილი. განსაკუთრებით მძიმე სარაკეტო და დრონების იერიშები მიმდინარეობს ბერდიანსკის მიმართულებით. გუშინ დილით და საღამოს რუსულ პოზიციებზე რაკეტები მიფრინდა. იგივე განხორციელდა დღესაც. ზოგიერთი ვერსიით ამ მიმართულებაზე უკრაინელები ბრიტანულ Storm Shadow-ს ტიპის ფრთოსან რაკეტებს იყენებენო, თუმცა დანამდვილებით რაიმეს თქმა არ შეგვიძლია. სწორედ ბერდიანსკია რუსული არმიის თავმოყრის ერთ-ერთი ძირითადი ღერძი.
ბერდიანსკის გარდა აქტიურად დაიბომბა ფრონტისპირა ოკუპირებული ზონები ტოკმაკისა და ვასილივკას მიმართულებით. სწორედ ამ ორი ქალაქისაკენ იერიშს ელოდებიან რუსები, უკრაინული კონტრშეტევის ზაპორიჟიას ოლქში განვითარების შემთხვევაში.
- კვლავ რამდენჯერმე დაიბომბა ოკუპირებული მარიუპოლი. სავარაუდო სამიზნე იარაღის საწყობები და სამეთაურო პუნქტები იყო. მაგრამ დღეს განხორციელებული იერიში უშუალოდ "აზოვსტალის" ტერიტორიაზე განხორციელდა.
- რუსეთი მოლდოვაში არეულობას ცდილობს. გაგაუზია, რომელიც ადრეულ 90-ან წლებში სეპარატიზმის კერა იყო და შემდგომ იმ პირობით მოგვარდა, რომ მოლდოვა რუმინეთს არ შეუერთდებოდა, ახლა პრო-რუსული მთავრობა არჩევნების გაყალბებით მოვიდა ხელისუფლებაში. გაგაუზიას ავტონომია აქვს და იქ არჩევნები ადგილობრივი მთავრობისათვის ცალკე ტარდება. ამ პროცესში ყველაფერი გააკეთა რუსეთმა, რომ პრო-რუსული "შორ" და მისი მოკავშირეები მოსულიყვნენ მართვის სადავეებთან. ჯერ შიდა არეულობამდე საქმე არ მისულა, თუმცა გაგაუზიის ახალი მთავრობა მოლდოვას ევროპულ გზას არ ემხრობა.
1 ივნისს მოლდოვაში ევროკავშირის ეგიდით დიდი სამიტი ტარდება. ეს ევროკავშირის მხრიდან მოლდოვისადმი ურყევი მხარდაჭერის ნიშანია. სამიტზე საქართველოცაა მიწვეული.
- რუსეთის შიგნით შიდა დაპირისპირება გრძელდება - იგორ გირკინი "ვაგნერის" ხელმძღვანელ ევგენი პრიგოჟინს უპირისპირდება და ამბობს, რომ პრიგოჟინის საქციელი ამბოხებამდე და გადატრიალებამდე მიიყვანს საქმეს.
- ბახმუტის უკიდურეს სამხრეთ-დასავლეთით შეტაკებები გრძელდება. ბრძოლა ქალაქის პერიფერიასთან მიმდინარეობს მაგრამ საკმაოდ აქტიურია შეტაკებები. მუშაობენ უკრაინელი სნაიპერებიც.
