USD 2.7384
EUR 2.8548
RUB 2.6619
Тбилиси
რა მდგომარეობაა ამ დროისთვის უკრაინაში
дата:  411
2023 წლის 25-26 აპრილის შეჯამება უკრაინაში:
- გუშინ ჩინეთის პრეზიდენტ სი ძინპინსა და უკრაინის პრეზიდენტ ვოლოდიმირ ზელენსკის შორის სატელეფონო საუბარი შედგა, რომელმაც ერთ საათზე მეტ ხანს გასტანა. საუბარი ჩინეთის მიერ შემოთავაზებულ სამშვიდობო გეგმასა და ზოგად სამხედრო-პოლიტიკურ ვითარებას შეეხო. უკრაინის პრეზიდენტმა შეხვედრა მოიწონა და ნაყოფიერი უწოდა.
ცხადია ეს მნიშვნელოვანი პოლიტიკური ნაბიჯია, რადგან ჩინეთი, როგორც არაერთხელ იქნა აღნიშნული, ცდილობს პოზიციონირდეს, როგორც ნეიტრალური მოთამაშე აღნიშნულ კონფლიქტში, მიუხედავად იმისა, რომ ხშირ შემთხვევაში მას კრემლის მხარდამჭერ ძალად აღიქვამდნენ ხოლმე. უკრაინა კი პეკინის სწრაფვას ნეიტრალური პოზიციის შენარჩუნების მცდელობისაკენ თავის სასარგებლოდ იყენებს, რის შედეგადაც მორალური თუ სამხედრო დახმარების ის მცირე იმედი, რომელიც კრემლს ჩინეთისაგან ჰქონდა, თანდათან შემცირდება.
ეს ყველაფერი პრინციპში ცხადიც იყო, რადგან ჩინეთისათვის რუსეთი თავისი რეგიონული ამბიციების პროცესში ხელის შემშლელი უფრო იყო ვიდრე ხელშემწყობი. რაც უფრო სუსტი იქნება რუსეთი მით უფრო ვერ შეუშლის ის ხელს ჩინურ ინტერესებს შუა და აღმოსავლეთ აზიაში ისევე როგორც აღმოსავლეთ ევროპასა თუ აფრიკაში. თუკი ჩვენ შევხედავთ ჩინურ-რუსულ ინტერესებს, თითქმის ყველა რეგიონში ნეგატიური კვეთა ჰქონდათ მათ. და ის შეხედულება გადაჭარბებული იყო, თითქოს რუსეთი და ჩინეთი ერთ ნავში ისხდნენ (სხედან). მათ საერთო მეტოქე ჰყავთ აშშ-ს სახით (რაც მოსკოვ-პეკინის დროებითი ღერძის კონტურების დახაზვის მიზეზი იყო), მაგრამ როდესაც აშშ რუსეთის შეკავებითაა დაკავებული ჩინეთი ორივე მათგანის გვერდის ავლით ცდილობს გლობალურ მოთამაშედ ქცევას, რომელსაც შეუძლია თავისი დღის წესრიგის ფორმირება. ამიტომაცაა, რომ ევროკავშირთანაც კი პოზიტიური დღის წესრიგის დამყარებას ცდილობს პეკინი და ყველაფერში საკმაოდ ორაზროვან მოთამაშედაა ქცეული, რომლის მიღმაც თავისი პოლიტიკური მიზნები იმალება.
- გუშინ უკრაინელებმა მძიმედ დაბომბეს რუსული პოზიციები ოკუპირებული ზაპორიჟიას ოლქის ქალაქ ტოკმაკის მიმართულებით. დაბომბვა საკმაოდ მასშტაბური იყო. ტოკმაკი ზაპორიჟიას ფრონტზე რუსების ერთ-ერთი საკვანძო დასაყრდენი პუნქტია.
- საინტერესო პროცესები მიმდინარეობს ყირიმში, დანარჩენი უკრაინის ადმინისტრაციული საზღვრის გასწვრივ. რუსები თავიანთ ტექნიკას არსებული დისლოკაციების ადგილებიდან ხსნიან და გაურკვეველი მიმართულებით გადააქვთ. ეს შეიძლება იყოს ფრონტის ხაზის მიმართულება ან პირიქით, კიდევ უფრო მეტად სიღრმეში, სადაც უკრაინელები ვერ მისწვდებიან. უფრო მაღალი ალბათობაა პირველ შემთხვევასთან გვქონდეს საქმე, რადგან მოახლოებული კონტრშეტევის მოლოდინში რუსულ სამხედრო ძალას ტექნიკის მხარდაჭერა ძალიან ესაჭიროება.
- დღეს ბახმუტის სიახლოვეს უკრაინელებმა რუსული შვეულმფრენი ჩამოაგდეს. კიდევ ერთი შვეულმფრენი ჩამოგდებაზე იყო საუბარი ავდიივკასთანაც.
- რუსეთში, მურმანსკში მიგ-31 გამანადგურებელ-გადამტაცი ჩამოვარდა. მიგ-31 70 მილიონ დოლარამდე ღირს და "კინჯალის" ტიპის რაკეტების სროლაც შეუძლია.
- რუსები ფრონტის ხაზის მიმართულებით ძალიან აქტიურად იყენებენ უპილოტო თვითგამანადგურებელ დრონებს - "ლანცეტებს". ბოლო დღეებია მოხშირდა მათ მიერ უკრაინული ტექნიკის წინააღმდეგ აქტივობა. ამ ომის მიმდინარეობისას "ლანცეტები" ერთ-ერთი იშვიათი მოდერნული იარაღია რუსული შეიარაღებული ძალების ხელში.
- რუსებს ეშინიათ, რომ 9 მაისს აღლუმზე რაღაც შეიძლება მოხდეს. ამიტომაც უკიდურეს ღონისძიებებს მიმართავენ და წითელ მოედანსაც წინასწარ კეტავენ. საინტერესოა აღლუმზე ტექნიკის რა რაოდენობას გამოიყვანს რუსეთი და ზოგადად, როგორი განწყობები იქნება მოსკოვში. ამასთან, T-72-ების უმრავლესობა უკრაინაშია, ხოლო თავმომწონედ შექმნილი "არმატები" უკვე ფრონტის ხაზზე დაფიქსირდა.
- კვიპროსში, ნიქოზიაში რუსული კულტურის ცენტრი დაიწვა. არსებული ინფორმაციით ის მოლოტოვის კოქტეილების სროლის შემდეგ დაიწვა. მნიშვნელოვანია იმ ფაქტის აღნიშვნა, რომ კვიპროსი რუსული ფულისა და ინვესტიციების ერთ-ერთი გზაგამტარი იყო ევროკავშირში. ახლა კი თანდათან იქაც კარგავენ ისინი პოზიციებს.
- სიტუაცია ბახმუტში კრიტიკულია რადგან მომარაგების ხაზები ინტენსიურ საარტილერიო ცეცხლშია მოქცეული. მაგრამ, მიუხედავად ამისა, ქალაქში რუსები აღარ წაწეულან. სამაგიეროდ უკრაინული არტილერია დამიზნებით ესვრის და ანადგურებს რუსულ ახალდაკავებულ პოზიციებს ქალაქის ცენტრალურ და აღმოსავლეთ ნაწილში.
аналитика
«The Washington Post» (აშშ): „ომისადმი შიშის გამო, საქართველო რუსეთისაკენ დაბრუნებას ირჩევს“

ამერიკული გაზეთი „ვაშინგტონ პოსტი“ (The Washington Post) აქვეყნებს სტატიას სათაურით „ომისადმი შიშის გამო, საქართველო რუსეთისაკენ დაბრუნებას ირჩევს“ (ავტორი - მარია ილიუშინა), რომელშიც განხილულია არჩევნებისშემდგომი სიტუაცია საქართველოში.

გთავაზობთ პუბლიკაციას შემოკლებით:

(...) ქართველთა უმრავლესობა - გამოკითხვების მიხედვით, 80%-ზე მეტი - მხარს უჭერს ქვეყნის ევროპულ ორიენტაციას და მოსკოვის მიმართ მაინცდამაინც განსაკუთრებულ სიყვარულს არ ამჟღავნებს, ოპოზიცია კი ცდილობს ხმის მიცემის შედეგები წარმოადგინოს როგორც არჩევანი ევროკავშირსა და რუსეთს შორის.

მაგრამ იმის გათვალისწინებით, რომ ორ ქვეყანას შორის 2008 წლის აგვისტორში მომხდარი ხანმოკლე ომის შედეგად საქართველოს ტერიტორიის 20% დე-ფაქტოდ რუსეთის კონტროლის ქვეშ იმყოფება, მოსკოვის სამხერო ძლიერების ჩრდილი სულ უფრო შესამჩნევი ხდება. შესაბამისად, „ქართულმა ოცნებამ“ ამომრჩევლებს უფრო რადიკალური დილემა შესთავაზა: არჩევანი მშვიდობასა და ომს შორის.

მმართველი პარტიის „რუსეთის მხარეს შებრუნება“ შედარებით ახალ მოვლენას წარმოადგენს. 2012 წელს, როცა „ქართული ოცნება“ ხელისუფლებაში მოვიდა, მნიშვნელოვან საგარეოპოლიტიკურ წარმატებას მიაღწია - სწრაფად დაუახლოვდა ევროკავშირს მასში გაწევრიანების სურვილით, მაგრამ რუსეთ-უკრაინის ომის დაწყების კვალობაზე პარტიამ რუსეთის ორბიტისაკენ გადაუხვია. მთავრობამ ევროპა და ადგილობრივი ოპოზიცია წარმოადგინა „ომის გლობალური პარტიად“, რომელსაც სურს საქართველო მოსკოვთან ომში ჩაითრიოს და კრემლთან დაპირისპირების ინსტრუმენტად გამოიყენოს

ამჟამად „ქართული ოცნება““ ოფიციალურად პრორუსულ პარტიას არ წარმოადგენს, მაგრამ ხშირად მისი პრაქტიკული მოქმედება საერთო პრორუსულ ჩარჩოებში ჯდება. 

ევროპული გზიდან გადახვევის პოლიტიკის ცენტრში მოჩანს „ქართული ოცნების“ დამაარსებელი ბიძინა ივანიშვილი - მილიარდერი, ყოფილი პრემიერ-მინისტრი, რომელიც ბოლო ათწლეულში წავიდა ქართული პოლიტიკიდან, მაგრამ იმავდროულად გავლენიან ადამიანად რჩებოდა. ბიძინა ივანიშვილი რუსეთში ყოფნის დროს გამდიდრდა, 1990-იან წლებში და როგორც მისი კრიტიკოსები ამბობენ,  მისი რიტორიკა და პოლიტიკური მრწამსი რუსეთის ლიდერის პოზიციას უთავსდება.

რუსეთის არმიის უკრაინაში შეჭრის დაწყებიდან პურველ ეტაპზე საქართველომ უკრაინას მხარი დაუჭირა. თბილისში დღესაც ბევრი უკრაინული დროშა ფრიალებს, მაგრამ მთავრობა თავს იკავებს რუსეთის გადაჭარბებული კრიტიკისაგან და ერიდება ანტირუსული სანქციების რეალიზებას.

„ჩვენ, როგორც ქვეყნის მმართველმა პარტიამ, მთავრობამ, ყველაფერი გავაკეთეთ უკრაინისა და უკრაინელი ხალხის მხარდასაჭერად“, - განაცხადა „ვაშინგტონ პოსტთან“ საუბარში „ქართული ოცნების“ თავმჯდომარის მოადგილემ არჩილ თალაკვაძემ, მაგრამ, მისი თქმით, დასავლეთის ოფიციალურმა პირებმა რუსეთ-უკრაინის ომში საქართველოს ჩათრევა მოისურვეს: „ჩვენ ჩავთვალეთ, რომ ასეთი პოლიტიკა საქართველოსათვის ძალზე სარისკო და გაუმართლებელი იქნებოდა“.

„ქართულმა ოცნებამ“ წინასაარჩევნო კამპანიის დროს აქტიურად ისარგებლა უკრაინის ომით და ამომრჩევლებს პლაკატების სერია შესთავაზა, რომლებზე გამოსახულია ერთი მხრივ, ომით დანგრეული უკრაინის ქალაქები და სოფლები, მეორე მხრივ - აღმშენებლობის პროცესში მყოფი საქართველო. ასეთმა პროპაგანდამ თავისი გამოძახილი ჰპოვა რუსეთთან ომგადატანილ საქართველოს მოსახლეობაში, განსაკუთრებით სოფლებში, ოკუპირებულ რეგიონებთან ახლოს, მხარეთა დამაშორიშორებელ ე.წ. სადემარკაციო ხაზის გასწვრივ.

როგორ ავიცილოთ თავიდან ომი

ქართველებს კარგად ახსოვთ 2008 წლის აგვისტოს ომი. ჭორვილისაკენ - ბიძინა ივანიშვილის მშობლიური სოფლისაკენ მიმავალი გზა, რომელიც კავკასიის ქედის სამხრეთ კალთებზე მდებარეობს, სწორედ რუსეთის მიერ ოკუპირებული რეგიონის - სამხრეთ ოსეთთან ახლოს გადის, სულ რაღაც ორიოდე კილომეტრში, სადემარკაციო ხაზთან.

ჭორვილაში ბიძინა ივანიშვილს თითქმის ეროვნულ გმირად თვლიან - მდიდარ ადამიანად, რომელიც თანასოფლელებს ყოველმხრივ ეხმარებოდა - სახლებისა თუ გზების მშენებლობაში, ჯანდაცვასა თუ კომუნალური გადასახადების გადახდაში, სანამ მან სახელმწიფო თანამდებობა - ქვეყნის პრემიერ-მინისტრის პოსტი არ დაიკავა.

„მე ომის მოწინააღმდეგ ვარ. დარწმუნებული ვარ, რომ „ქართული ოცნება“ მსვიდობას შეინარჩუნებს. არ გვსურს, რომ რომელიმე ქვეყანა საქართველოს მტერი იყოს და არც ის გვინდა, რომ საქართველოს იყოს სხვა ქვეყნის მტერი“, - ამბობს გიორგი გურძენიძე, სკოლის დირექტორი, რომელსაც ახსოვს, თუ როგორ ხმაურით დაფრინავდნენ სოფლის თავზე, ცაში რუსული თვითმფრინავები 2008 წელს.

„ქართული ოცნება“ აქტიურად უჭერს მხარს ბიძინა ივანიშვილის პოლიტიკური კურსის ორ ძირითად მომენტს - მშვიდობას ნეიტრალიტეტის გზით და ქართული ტრადიციული ფასეულობების დაცვას. „ქართული ოცნების“ მტკიცებით, მისი სტრატეგიული მიზანი არ შეცვლილა - ევროინტეგრაცია ძალაში რჩება, რომლის რეალიზებას 2030 წლისათვის არის დაგეგმილი: საქართველო ევროკავშირის წევრი გახდება „ღირსეულად“ და ტრადიციული ეროვნული ფასეულობების დაცვით.

„რა თქმა უნდა, მსურს ევროკავშირის წევრი ვიყოთ, მაგრამ ჩვენ ჩვენი წინაპრების ღირსებაც და მემკვიდრეობაც უნდა დავიცვათ. ქალი ქალი უნდა იყოს, კაცი კი - კაცი“, - ამბობს ჭორვილელი მამია მაჭავარიანი.

ქართველთა ღირსება კი დაცული იქნება ორი კანონით, რომლებმაც, პრაქტიკულად, ევროკავშირში საქართველოს პოტენციური წევრობის პროცესი შეაჩერეს - იმიტომ, რომ მათი დებულებები ევროპული ბლოკის სტანდარტებს ეწინააღმდეგება. ეს კანონებია „ოჯახური ფასეულობებისა და არასრულწლოვანების დაცვის, ასევე უცხოური გავლენის გამჭვირვალობის შესახებ, რომლებიც, როგორც ოპოზიცია აცხადებს, რუსული სამართლებრივი აქტების ასლებს წარმოადგენენ.

ევროპა შორეული ხდება?!

საქართველოს დედაქალაქის მცხოვრებთა ნაწილი შეშფოთებულია, რომ ქვეყნის შანსი ევროკავშირის წევრობაზე მცირდება. „არჩევნებში „ქართული ოცნების“ გამარჯვება სხვა არაფერია, თუ არა ხელისუფლების უზურპაცია“, - ამბობს 38 წლის გიორგი, რომელიც გვარს არ ასახელებს, ვაითუ დევნა დაუწყონ, - „ჩვენ ევროკავშირთან ინტეგრაცია უნდა გავაღრმავოთ. რუსეთთან დაახლოებას კი არცერთი ნორმალური ქვეყანა არ ცდილობს. პრორუსუსლი ორიენტაცია თვითმკვლელობას ნიშნავს, რადგან მოსკოვი არანაირი შეთანხმების პირობებს არ იცავს“.

ოპოზიცია მწვავედ აკრიტიკებს „ქართული ოცნების“ ომის წინააღმდეგ მიმართულ კურსს და მას პროპაგანდისტულს უწოდებს, ზოგიერთები კი თვლიან, რომ მმართველ პარტიის მხრიდან ამგვარი ლოზუნგების წარმოჩენა ხელისუფლებაში დარჩენასა და ერთპარტიული მმართველი სისტემის შენარჩუნებას ემსახურება.

პარტია „საქართველოსათვის“ ლიდერის გიორგი გახარიას განცხადებით, ბიძინა ივანიშვილისა და „ქართული ოცნების“ პოლიტიკაში მომხდარი ცვლილებები - პრორუსული გადახრები - იმითაა გამოწვეული, რომ ევროკავშირში გაწევრიანება ხელისუფლების როტაციას ნიშნავს: „მისი მთავარია მიზანია ხელისუფლების შენარჩუნება. იგი ხედავს, რომ ევროპული დემოკრატია ხელისუფლების არჩევნების გზით შეცვლას ითვალისწინებს“.

მაგრამ არჩევნების შედეგების წინააღმდეგ მიმდინარე საპროტესტო აქციები ისეთივე ძლიერი და ფართო არ არის, როგორიც გაზაფხულზე მიმდინარეობდა ზემოთ ხსენებული კანონების მიღების დროს. ეს ნიშნავს, რომ ოპოზიცია გამოფიტულია. მათ ვერც დასავლეთი ვერ უწევს სათანადო დახმარებას. ბრიუსელს შეუძლია გარკვეული ზეწოლა მოახდინოს „ქართულ ოცნებაზე“, მაგრამ ევროპელი ჩინოვნიკების რეაქცია აწონილ-დაწონილია: დამკვირვებლებმა ნამდვილად დააფიქსირეს დარღვევები, მაგრამ მათ თავი შეიკავეს იმის განცხადებაზე, რომ არჩევნები გაყალბდა და ხმები მოპარულია.

არჩევნებში მომხდარი ყველა დარღვევის დეტალურად გამოკვლევა დროს მოითხოვს - კვირეებს და შეიძლება თვეებსაც, თანაც საკმაოდ რთულია მათი დამტკიცება-დადასტურება. „ჩვენ ახლა ისეთ სიტუაციასთან გვაქვს საქმე, როცა დასავლეთს არ სურს ხისტი ნაბიჯები გადადგას საკმარისი მტკიცებულებების გარეშე, ოპოზიციას კი საკმარისი მტკიცებულებები არ აქვს“, - ამბობს ჯონ დიპირო საერთაშორისო რესპუბლიკური ინსტიტუტიდან.

ბიძინა ივანიშვილი აშკარად იმაზე დებს თავის ფსონს, რომ ევროპა საქართველოსადმი ინტერესს დაკარგავს. ჯერ კიდევ ზაფხულში იგი აცხადებდა, რომ აშშ-ის საპრეზიდენტო არჩევნებში დონალდ ტრამპის გამარჯვება რუსეთ-უკრაინის ომს დაასრულებს. „ჩვენ მაქსიმუმ ერთი წელი გვაქვს, რომ ეს ყველაფერი მოვითმინოთ, შემდეგ კი [დასავლეთის] გლობალური და რეგიონული ინტერესები შეიცვლება, მათთან ერთად კი შეიცვლება ინტერესები საქართველოს მიმართაც“, - ამბობდა ბიძინა ივანიშვილი, - ომის დასრულებასთან ერთად კი ყველა გაუგებრობა ევროპასთან და ამერიკასთან გაქრება“.

წყარო: https://www.washingtonpost.com/world/2024/11/21/georgia-russia-elections-influence/

 

более
голосование
ვინ გაიმარჯვებს რუსეთ - უკრაინის ომში?
голосование
Кстати