,
რუსეთის მიერ უკრაინაში შეჭრის და დონეცკისა და ლუგანსკის ე.წ. “რესპუბლიკების” აღიარებას აშშ-ის, გერმანიის, დიდი ბრიტანეთის და ევროკავშირის მხრიდან რუსეთის მიმართ ეკონომიკური სანქციების პირველი ტალღა უკვე მოჰყვა. მათ შორის გერმანიის მთავრობის გადაწყვეტილებით, შეჩერდა Nord Stream 2-ის მილსადენის სერტიფიცირების პროცესი, რომელსაც ევროპისთვის წლიურად 55 მილიარდი კუბური მეტრი გაზი უნდა მიეწოდებინა.
რუსეთის მთავარი საექსპორტო საქონელი სწორედ ბუნებრივი რესურსებია. ქვეყანა დღეში 10 მილიონ ბარელ ნედლ ნავთობს მოიპოვებს, რითიც გლობალურად მესამე ადგილზეა; რუსეთი ევროკავშირისთვის ბუნებრივი აირის უმსხვილესი მიმწოდებელია. მთლიანობაში ქვეყნის საექსპორტო შემოსავალი მნიშვნელოვნად არის დამოკიდებული ნავთობპროდუქტების სარეალიზაციო ფასზე. სწორედ ნავთობის გაძვირების გამო, 2021 წელს რუსეთის ექსპორტი 46%-ით გაიზარდა და $493 მილიარდ დოლარს მიაღწია.
ექსპორტის ნახევარზე მეტი - 54% საწვავ და ენერგეტიკულ პროდუქტებზე მოდიოდა.
უფრო დეტალურად რუსეთის უმსხვილესი საექსპორტო საქონელი ასე ნაწილდება:
1. ნედლი ნავთობი - $110.1 მილიარდი, 230 მილიონი ტონა, მატება წინა წელთან 52%;
2. ნავთობპროდუქტები (გარდა ბენზინისა და დიზელისა) - $70.0 მილიარდი, 144 მილიონი ტონა, მატება წინა წელთან 102%;
3. ბუნებრივი აირი - $55.5 მილიარდი, 203 მლრდ კუბ მეტრი, მატება წინა წელთან 114%;
4. მანქანები და აღჭურვილობა - $32.6 მილიარდი, მატება წინა წელთან 16%;
5. შავი ლითონები - $28.9 მილიარდი, 44 მილიონი ტონა, მატება წინა წელთან 164%;
6. დიზელი - $26.2 მილიარდი, 49 მილიონი ტონა, კლება წინა წელთან -30%;
7. ბენზინი - $22.9 მილიარდი, 59 მილიონი ტონა, მატება წინა წელთან 197%;
8. შავი, ლითონები, (გარდა თუჯის, ფეროშენადნობებისა და ჯართისა) - $22.0 მილიარდი, 31 მილიონი ტონა, კლება წინა წელთან -60%;
9. ქვანახშირი - $17.6 მილიარდი, 211 მილიონი ტონა, მატება წინა წელთან 201%;
10. ფოლადი - $9.2 მილიარდი, 15 მილიონი ტონა, კლება წინა წელთან -12%;
მთლიანობაში რუსეთის ექსპორტის 2/3-ზე მეტი ნედლეულისგან შედგება.
ბოლო ერთ თვეში ნედლი ნავთობის ფასი 8%-ით, 93 დოლარამდე გაიზარდა, რაც მათ შორის რუსეთის საექსპორტო შემოსავალსაც ზრდის. გუშინ, რუსეთის უშიშროების საბჭოს თავმჯდომარის მოადგილემ დიმიტრი მედვედევმა განაცხადა, რომ გერმანიის მიერ Nord Stream 2-ის შეჩერება ევროკავშირის ბაზარზე ბუნებრივი აირის ფასის მკვეთრ ზრდას და 1000 კუბური მეტრის 2000 ევრომდე გაძვირებას გამოიწვევს.
წყარო:https://bm.ge/
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
