,
დედაქალაქში მიწის ნაკვეთების ბაზარი გააქტიურდა. უძრავი ქონების საბროკერო კომპანიების ნაწილი აცხადებს, რომ ზაფხულის პერიოდში გაყიდვები წლიურად 20%-ით გაიზარდა. მოთხოვნა არსებობს, როგორც საცხოვრებელ, ისე საინვესტიციო მიწის ნაკვეთებზე, თუმცა იქიდან გამომდინარე, რომ დედაქალაქში საინვესტიციო მიწის ნაკვეთების დეფიციტია, მოთხოვნა კი მიწოდებას აჭარბებს, ფასი ამ ტიპის უძრავ ქონებაზე საკმაოდ გაიზარდა.
ბოლო წლებში საცხოვრებელი კორპუსების მშენებლობის გააქტიურებასთან ერთად ფასი გაიზარდა დიდ ქალაქებში არსებულ მიწის ფონდზეც. Brokeri.ge-ს მმართველი პარტნიორის ილია ინაშვილის თქმით, მაგალითად, ქუთაისში ზოგიერთ ტერიტორიაზე ფასი მინიმუმ გაორმაგებულია.
„თუ ვსაუბრობთ ისეთ დიდ ქალაქებზე, როგორიცაა ქუთაისი, ბათუმი, თელავი, აქ ყოველთვის იყო მაღალი მოთხოვნა მიწის ნაკვეთებზე. თუ გავითვალისწინებთ იმასაც, რომ ადრე თელავში და ქუთაისში კორპუსების მშენებლობა აქტუალური არ იყო და ბოლო 3 წლის განმავლობაში დაიწყო ამ ქალაქებში აქტიური მშენებლობები, აქედან გამომდინარე კომერციულ მიწის ნაკვეთებზე მოთხოვნა განსაკუთრებით გაიზარდა, შესაბამისად, სოლიდურად გაიზარდა ფასებიც. მაგალითად, ქუთაისში რამდენიმე ტერიტორიაზე ფასები გაორმაგებული და გასამმაგებული დაგვხვდა, იმდენად მოთხოვნადია საკორპუსე მიწის ნაკვეთები აღნიშნულ ტერიტორიებზე.
სადაც გვქონდა 20 დოლარიანი სეგმენტი, დღევანდელი ფასი არის 60-65 დოლარი; ხოლო სადაც 80-100 დოლარის ფარგლებში იყო ფასი, დღეს არის 250-300 დოლარი”, - აცხადებს ილია ინაშვილი.
წყარო:https://bm.ge/
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
