,
ქართული ტექნოლოგიური სტარტაპი Artisio მსოფლიოს ერთ-ერთი ყველაზე პრესტიჟული კონკურსის “სტარტაპების მსოფლიო თასის” ფინალში გავიდა.
“სტარტაპების მსოფლიო თასი” კალიფორნიაში იმართება და მასში სხვადასხვა ქვეყანაში ჩატარებული ეროვნული კონკურსის გამარჯვებულები მონაწილეობენ, ხოლო კონკურსის საპრიზო ფონდი $1 მილიონს შეადგენს.
სწორედ ქართულმა Artisio-მ გაიმარჯვა Startup Connect-ისა და Pegasus Tech Ventures-ის ორგანიზებით, ბათუმში ჩატარებულ ეროვნულ შეჯიბრში, რომელიც მაისში შედგა.
შეგახსენებთ, რომ Artisio-ს მიერ შექმნილი პროგრამული უზრუნველყოფის გამოყენებით, აუქციონის ჩატარება ნებისმიერ კომპანიას, სულ რაღაც ერთ საათში შეუძლია.
კონკურსში გამარჯვებული ხვალ გამოვლინდება.
როგორც Artisio-ს დამფუძნებელი და აღმასრულებელი ხელმძღვანელი, ბერდია ყამარაული ამბობს, კომპანიის მიერ შექმნილი პროგრამული უზრუნველყოფის გამოყენებით, აუქციონის ჩატარება ნებისმიერ კომპანიას, სულ რაღაც ერთ საათში შეუძლია.
სამომავლო გეგმებზე საუბრისას, ბერდია ყამარაული აღნიშნავს, რომ კომპანიის უმთავრეს მიზანს მსოფლიოს ერთ-ერთ უმსხვილეს ბაზარზე, ამერიკის შეერთებულ შტატებში შესვლა წარმოადგენს. ამასთან, Artisio საფრანგეთში შესვლასაც გეგმავს, სადაც კომპანიას, ამ ეტაპზე, სამი კლიენტი ჰყავს.
“ჩვენს კლიენტებს შორის დიდი სააუქციონო სახლებიც არიან, მათ შორისაა Stanley Gibbons-იც, რომელიც საფოსტო მარკების მსოფლიოში ყველაზე დიდი და ერთ-ერთი უძველესი სააუქციონო სახლია. ამ სააუქციონო სახლს ე.წ. “სამეფო უფლება”, რაც ნიშნავს, რომ ის ბრიტანეთის სამეფო ოჯახის პირად კოლექციას მენეჯმენტს უწევს. ჩვენს კლიენტებს შორისაა ნიდერლანდების ერთ-ერთი უძველესი სააუქციონო სახლიც, მაგრამ, ამასთან, ვემსახურებით ისეთ კომპანიებს, რომლებიც აუქციონების მიმართულებით არ ოპერირებენ. ასეთია NATO-ს ერთ-ერთი უმსხვილესი სამხედრო კონტრაქტორი კომპანია, რომელსაც მეორადი პროდუქციის აუქციონზე გაყიდვაში ვეხმარებით”, - აღნიშნავს ბერდია ყამარაული ბიემჯისთან საუბრისას და დასძენს, რომ Artisio-ს კლიენტებს შორის ღვინისა და მეორეული ნივთების სააუქციონო სახლებიც არიან.
ბიემჯის კითხვაზე, გეგმავს თუ არა Artisio სახელმწიფო ტენდერების გამარტივების მიზნით საჯარო უწყებებთან თანამშრომლობას, ბერდია ყამარაული ამბობს, რომ ასეთი გამოცდილება კომპანიას უკვე ჰქონდა.
“სამხრეთ აფრიკიდან კომპანიამ მოგვმართა, რომელსაც სურდა, ჩვენი პლატფორმის დახმარებით აუქციონზე სახელმწიფო ლიცენზიები გაეყიდა. ანალოგიურად ამისა, ჩვენს პლატფორმაზე ნებისმიერი სახელმწიფო ტენდერის ჩატარება შეიძლება. ახლა ბრაზილიის ბაზარზე გაკოტრებული კომპანიების აქტივების მმართველ კომპანიას ველაპარაკებით, რომელსაც სურს, აქტივები ჩვენი პლატფორმის გამოყენებით გაყიდოს”, - აღნიშნავს ბერდია ყამარაული ბიემჯისთან საუბრისას.
როგორც Artisio-ს დამფუძნებელი ამბობს, საქართველოში, ამჟამად, კომპანიას კლიენტები არ ჰყავს, რასაც, მისი თქმით, აუქციონის კულტურის არარსებობა განაპირობებს. მიუხედავად ამისა, კომპანიის მიერ შექმნილი პროგრამული უზრუნველყოფის მიმართ დაინტერესება მზარდია.
“როგორც ვიცი, საქართველოში “ელექტრონული კომერციის შესახებ კანონი” შემოდის, რომელიც მომხმარებელს საშუალებას აძლევს, ონლაინმაღაზიაში შეძენილი პროდუქცია ყიდვიდან 30 დღის განმავლობაში დააბრუნოს. ამერიკის შეერთებულ შტატებსა და ევროპაში, ეს მოდელი შემდეგნაირად ფუნქციონირებს: როცა მომხმარებელი პროდუქტს უკან აბრუნებს, Amazon-ი ან სხვა მსგავსი კომპანია ამ პროდუქტს მის ვებგვერდზე აღარ ათავსებს, რადგან ჰყავს კომპანია, რომელსაც ამ ნივთებს აუქციონზე გასაყიდად აძლევს.
ანალოგიური მოდელის დანერგვა ქართულ ბაზარზეც გახდება აუცილებელი და მზად ვართ, ასეთ კომპანიებს აუქციონების ჩასატარებლად საჭირო მზა პლატფორმა მივაწოდოთ”, - განაცხადა ბერდია ყამარაულმა.
გლობალური ფინანსური ქსოვილი სხვადასხვა ტიპის კომპანიების ურთიერთქმედებაზე დგას. ფინანსურ ეკოსისტემაში ვხვდებით, როგორც ბანკებს, ასევე ნეობანკებს და ფინტექ-კომპანიებს, საპენსიო ფონდებს, საგადახდო სერვისების მიმწოდებელ ორგანიზაციებს, კერძო კაპიტალის მმართველებს, ჰეჯ-ფონდებსა და აქტივების მმართველ კომპანიებს. აი, სწორედ ამ ბოლო კატეგორიას განეკუთვნება ამერიკული BlackRock-ი, რომელიც სხვა ადამიანებისა და კომპანიების აქტივებს მართავს, ანუ მარტივად რომ ვთქვათ, ინვესტიციას მათ ნაცვლად დებს. გამართული ბიზნესმოდელის გარდა, ამერიკულ კორპორაციას მაღალი რეპუტაცია, ინვესტორებისთვის ფინანსური სარგებლის გენერირების დეკადების განმავლობაში დამტკიცებული შედეგები და პლანეტარული მასშტაბის კავშირები გამოარჩევს.
ამ ყველაფრის დამსახურებით, BlackRock-ი პლანეტის უდიდეს აქტივების მმართველ კომპანიად იქცა, რომლის პორტფელი, ბოლო შედეგებით, $10.5 ტრილიონად იყო შეფასებული. 2024 წლის პირველი კვარტალის ფინანსური ანგარიშის თანახმად, გასულ ერთ წელიწადში, ამერიკულმა კორპორაციამ აქტივების ზომა $1.4 ტრილიონით გაზარდა. ამ თანხის მასშტაბს რომ მიხვდეთ, გეტყვით, რომ მექსიკის მთლიანი შიდა პროდუქტი სწორედ $1.4 ტრილიონია, როცა ესპანეთის, ინდონეზიის და საუდის არაბეთის - ნაკლები. თუმცა BlackRock-ის ჯამური აქტივების ზომა უფრო შთამბეჭდავია, რადგან ამ მაჩვენებელს ქვეყნების მშპ-სთან თუ შევაფარდებთ, აღმოვაჩენთ, რომ მას მხოლოდ ამერიკის შეერთებული შტატები და ჩინეთი უსწრებს.
რა შემოსავალს და წმინდა მოგებას აგენერირებს BlackRock-ი $10.5 ტრილიონად შეფასებული აქტივების მართვით?
2024 წლის I კვარტალში, BlackRock-მა $4.7 მილიარდის შემოსავალი მიიღო, რაც 11%-ით მეტია, ვიდრე შარშან. შემოსავალთან ერთად, ბოლო პერიოდში მკვეთრად, კერძოდ 36%-ითაა გაზრდილი კომპანიის წმინდა მოგება, რომელმაც მიმდინარე წლის პირველ სამ თვეში $1.5 მილიარდი შეადგინა. აღნიშნულ მაჩვენებლებს, უმეტესწილად, ის ფინანსური ინსტრუმენტები აგენერირებენ, რომელთაც BlackRock-ის პორტფელში ვხვდებით - აქ იგულისხმება, როგორც კომპანიების კაპიტალი, ანუ აქციები, ასევე ფიზიკური აქტივები, მათ შორის უძრავი ქონება.
აქციების კუთხით, BlackRock-ის აქტივებს შორის ყველაზე დიდი წილი მსოფლიოს უდიდეს ტექნოლოგიურ, ფარმაკოლოგიურ და ფინანსურ კომპანიებზე მოდის. BlackRock-ის აქციების პორტფელის ათი უდიდესი პოზიცია კი, შემდეგნაირად გამოიყურება:
#1 - Microsoft - $229.7 მილიარდად შეფასებული 542.02 მილიონი აქცია (BlackRock-ის პორტფელის 5.37%)
#2 - Apple - $178.4 მილიარდად შეფასებული 1.04 მილიარდი აქცია (BlackRock-ის პორტფელის 4.17%)
#3 - NVIDIA - $164.66 მილიარდად შეფასებული 182.42 მილიონი აქცია (BlackRock-ის პორტფელის 3.85%)
#4- Amazon - $115.18 მილიარდად შეფასებული 638.54 მილიონი აქცია (BlackRock-ის პორტფელის 2.69%)
#5 - META - $77.18 მილიარდად შეფასებული 158.94 მილიონი აქცია (BlackRock-ის პორტფელის 1.8%)
#6 - Alphabet (Class A) - $62.77 მილიარდად შეფასებული 415.9 მილიონი აქცია (BlackRock-ის პორტფელის 1.47%)
#7 - Alphabet (Class C) - $54.11 მილიარდად შეფასებული 355.37 მილიონი აქცია (BlackRock-ის პორტფელის 1.27%)
#8 - Eli Lilly - $50.78 მილიარდად შეფასებული 65.27 მილიონი აქცია (BlackRock-ის პორტფელის 1.19%)
#9 - Broadcom - $46.27 მილიარდად შეფასებული 34.91 მილიონი აქცია (BlackRock-ის პორტფელის 1.08%)
#10 - Berkshire Hathaway (Class B) - $45.21 მილიარდად შეფასებული 107.51 მილიონი აქცია (BlackRock-ის პორტფელის 1.06%)
წყარო:https://bm.ge/
