,
რუსეთისა და ბელარუსის ყველა გეგმა ხორციელდება იმაზე უკეთესი ტემპით, ვიდრე მოსალოდნელი იყო, - ამის შესახებ რუსეთის პრეზიდენტმა, ვლადიმერ პუტინმა ბელარუს კოლეგასთან, ალექსანდრე ლუკაშენკოსთან შეხვედრაზე განაცხადა.
"ჩვენი ყველა გეგმა ხორციელდება და იმაზე უკეთესი ტემპითაც კი, ვიდრე ველოდით. მინდა აღვნიშნო როგორც რუსეთის, ისე ბელარუსის ეკონომიკის კარგი მდგომარეობა", - განაცხადა პუტინმა.
მისი თქმით, პროგნოზირებულია ბელარუსის ეკონომიკის 3.75%-იანია ზრდა.
"ჩვენ გვაქვს ოდნავ დაბალი მაჩვენებელი, შემიძლია ვთქვა, მაგრამ ასევე კარგი მაჩვენებელია ჩვენთვის. იმედი გვაქვს ეკონომიკის ზრდის მაჩვენებელი 2%-ზე მეტი იქნება“, - აღნიშნა პუტინმა.
მან უკრაინაში მიმდინარე ე.წ. სპეციალურ სამხედრო ოპერაციაზეც ისაუბრა და აღნიშნა, რომ უკრაინის შეიარაღებული ძალების პირადი შემადგენლობის დანაკარგმა 26 000-ს გადააჭარბა.
ბელარუსის პრეზიდენტმა, ალექსანდრე ლუკაშენკომ შეხვედრაზე განაცხადა, რომ აშშ-ის შეფასებით, „ოპერაციის“ დაწყების დღიდან უკრაინის შეიარაღებული ძალების დანაკარგმა 26 000 ადამიანი შეადგინა. "მეტი... უკვე მეტი", - უპასუხა პუტინმა.
