,
რუსეთის მომავალი დამოკიდებულია სპეციალური სამხედრო ოპერაციის მონაწილეთა საბრძოლო მუშაობაზე, - რუსული მედიის ინფორმაციით, ამის შესახებ რუსეთის პრეზიდენტმა, ვლადიმერ პუტინმა კრემლში, რუს სამხედროებთან გამართულ შეხვედრაზე განაცხადა.
"ბევრი რამ არის დამოკიდებული თქვენს საბრძოლო მუშაობაზე, რუსეთის მომავალი, ეს აშკარაა", - აღნიშნა პუტინმა.
რუსეთის პრეზიდენტის მტკიცებით, გერმანიის ყოფილმა კანცლერმა, ანგელა მერკელმა და საფრანგეთის ყოფილმა პრეზიდენტმა, ფრანსუა ოლანდმა განაცხადეს, რომ არ აპირებდნენ მინსკის შეთანხმებების განხორციელებას და ეს შეთანხმებები უკრაინის საომარი მოქმედებებისთვის მოსამზადებლად გამოიყენეს.
"დიახ, და რუსეთის უკან დახევის, მისი დასუსტებისა და საბოლოოდ მისი განადგურების მცდელობა. მათ არაფერი გამოუვათ, არასოდეს", - აღნიშნა პუტინმა.
მისი მტკიცებით, რუსეთის თავდაცვის ინდუსტრია სულ უფრო და უფრო იზრდება, უკრაინის რესურსები კი იწურება, რადგან მას არ აქვს საკუთარი ბაზა, ფული და იდეოლოგია.
„მათი რესურსები იწურება, მათ არ აქვთ საკუთარი ბაზა, როდესაც არ აქვთ საკუთარი ბაზა, არ აქვთ საკუთარი იდეოლოგია, მათ არ აქვთ საკუთარი ინდუსტრია, საკუთარი ფული, მათ არაფერი აქვთ საკუთარი, მაშ არ აქვთ მომავალი, ჩვენ კი გვაქვს“, - განაცხადა პუტინმა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
