,
2023 წლის სექტემბრიდან რუსეთის პრეზიდენტი ვლადიმირ პუტინი სხვადასხვა დიპლომატიური არხის საშუალებით იტყობინება, რომ მზად არის უკრაინაში ცეცხლის შეწყვეტის შესახებ მოლაპარაკებების დასაწყებად. ამის შესახებ ორ ყოფილ რუს მაღალჩისანზე, ასევე მოქმედ ამერიკელ და სხვა ქვეყნის წარმომადგენელ მაღალჩინოსნებზე დაყრდნობით The New York Times-ი წერს.
გამოცემის წყაროების თქმით, პუტინმა შუამავლების საშუალებით გამოთქვა მზადყოფნა, შეწყვიტოს ცეცხლი და „გაყინოს“ საომარი მოქმედებები დღევანდელ საზღვრებში.
„ისინი ამბობენ, რომ მზად არიან მოლაპარაკებებისთვის. მზად არიან დარჩნენ იქ, სადაც ახლა არიან“, - ამბობს უცხო ქვეყნის წარმომადგენელი მაღალჩინოსანი, რომელიც რუსეთის წარმომადგენლებს შემოდგომაზე ხვდებოდა.
ამერიკელი მაღალჩინოსნები ამბობენ, რომ პუტინი ასეთი წინადადებით 2022 წლის შემოდგომაზეც გამოდიოდა, როდესაც უკრაინელებმა ხარკოვისა და ხერსონის ოლქში ტერიტორიების ნაწილი დაიბრუნეს. მათი განცხადებით, პუტინი ნათლად მიანიშნებდა, რომ მზად არის ცეცხლი შეწყვიტოს, თუ რუსეთი დაკავებულ ტერიტორიებს შეინარჩუნებს.
NYT-ის ცნობით, არაფერი მიუთითებს იმაზე, რომ უკრაინა ახალ წინანადებას დათანხმდება, ვინაიდან კიევს აქამედ არაერთხელ უთქვამს, რომ ყველა ტერიტორიის დეოკუპაციას აპირებს. ამერიკელი მაღალჩინოსნები ფიქრობენ, რომ პუტინი შესაძლოა მათ შეცდომების შეყვანაში ცდილობდეს. ყოფილი რუსი მაღალჩინოსნების თქმით, რუსული ჯარის მიერ წარმატებების მიღწევის შემთხვევაში პუტინმა ცეცხლის შეწყვეტა შეიძლება გადაიფიქროს.
ამერიკელი მაღალჩინოსნები NYT-თან საუბარში ამბობენ, რომ პუტინის წინანადების მიღების შემთხვევაში უკრაინა შეინარჩუნებს სუვერენულ სახელმწიფოს, თუმცა რუსეთის კონტროლის ქვეშ უკრაინის ტერიტორიის თითქმის 20% იქნება. მათივე თქმით, ახლა არცერთი წამყვანი უკრაინელი პოლიტიკოსი ახლა ასეთ წინადადებაზე არ წავა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
