,
პრეზიდენტმა ამერიკის შეერთებულ შტატებში ქართულ-ამერიკული მედიაპლატფორმის ,,Speech”-ის დაფუძნებისათვის, საზღვარგარეთ მცხოვრები ქართველი პროფესიონალების აღმოჩენისა და მათი ცოდნისა და გამოცდილების საქართველოში ინვესტირების ხელშეწყობისათვის სოფიკო ჯაჯანაშვილი და ზურაბ ქათამაძე ღირსების მედლით დააჯილდოვა.
,,ბედნიერი ვარ, რომ გვაქვს საშუალება, მივხედოთ ერთ-ერთ ყველაზე მნიშვნელოვან საქმეს, რასაც ჰქვია ჩვენს დიასპორასთან ურთიერთობა და ქვეყანასთან მათი კავშირების გაძლიერება. ყველაზე მნიშვნელოვნად მიმაჩნია, რომ ამ ქვეყნის ინტერესების დასაცავად, მათსა და ჩვენ შორის ბმა იყოს რაც შეიძლება ძლიერი და ეფექტური.
ის საქმე, რაც თქვენ წამოიწყეთ და რაშიც ხართ სრულიად ჩართული, ძალიან სწორი გზაა, რომ ჩვენ ვიცოდეთ იმ ადამიანების შესახებ, რომლებიც პროფესიონალურად ძალიან საჭირო არიან ჩვენი ქვეყნისთვის და რომლებიც არამხოლოდ წარმატებულები არიან.
თქვენი პროექტის ერთი ნაწილი იმ ადამიანებს ეხება, რომლებიც ძალიან წარმატებულები არიან, ჩვენ მათ შესახებ არ ვიცით და უნდა ვიცოდეთ იმიტომ, რომ ჩვენი თავისი გაძლიერებაა - როცა იცი, რომ ქვეყნის გარეთ არიან წარმატებული, ნიჭიერი ადამიანები, რომლებიც სხვანაირად წარმოადგენენ საქართველოს და გვჭირდება, რომ უფრო და უფრო წარმოადგინონ ეს ქვეყანა და სხვადასხვა მიმართულებით ამ ქვეყნის რეალური ელჩები იყვნენ.
ამ საქმეს თქვენ ძალიან კარგად ასრულებთ. ასევე ახალი მიმართულება, რაც ახლა წამოიწყეთ - დიასპორული დიპლომატია, დღეს ესეც ძალიან გვჭირდება, რათა ეს კავშირი კიდევ უფრო საქმიანი გახდეს და უფრო კონკრეტულად ვიცოდეთ ვინ შეიძლება იყოს ჩართული ამ დიპლომატიაში. ამ კუთხით, პატარა ქვეყანას თავისი თავის გაძლიერება და ერთგვარად გაათმაგება სჭირდება. ერთი ელჩი კარგია, მაგრამ როცა ასი ელჩი გყავს ქვეყანაში, სადაც ყველა თავის დარგში რაღაცას აღწევს ეს სხვა რამეზე მეტყველებს და ბევრად მეტის გაკეთების საშუალებას გვაძლევს.
ამიტომ გადავწყვიტეთ, რომ დღეს დაგაჯილდოვოთ. ეს არის ღირსების საპრეზიდენტო მედალი, ასეთი საქმიანობისთვის, რომელიც ყველას შეუძლია, რომ დაიწყოს, მოიფიქროს პროექტი, დაიწყოს ამის აღსრულება და ბოლომდე მიიყვანოს.
ვიცი რომ კიდევ ბევრი იდეა გაქვთ და ბევრს კიდევ განახორციელებთ, მაგრამ ის, რომ შეიძლება შენი ინიციატივით, შენი რესურსით, არაფრიდან დაიწყო და გააკეთო, ეს ძალიან დიდი მაგალითია უცხოეთში მყოფი ჩვენი ახალგაზრდებისა და არამხოლოდ ახალგაზრდებისთვის.
მე მინდა რომ თქვენი მაგალითი იყოს წარმატებული, იყოს რაც შეიძლება მეტის მიერ გაზიარებული და მინდა გისურვოთ, რომ ამ გზაზე და აქაც გააგრძელოთ საქმიანობა.“ - განაცხადა საქართველოს პრეზიდენტმა.
სოფიკო ჯაჯანაშვილმა და ზურაბ ქათამაძემ მადლობა გადაუხადეს საქართველოს პრეზიდენტს ჯილდოსათვის. სოფიკო ჯაჯანაშვილმა აღნიშნა, რომ ,,პრეზიდენტს ჰქონდა იდეა გაკეთებულიყო უცხოეთში მცხოვრები ქართველი პროფესიონალების ბაზა. ჩვენ ამაზე ყველა ერთად ვმუშაობდით და მიხარია, რომ ეს ყველაფერი, ეს იდეები, მიზნები, რაც ყველას გვქონდა, განხორციელდა. დღეს საქართველოს ასე რომ ვთქვათ, უკვე აქვს ეს ბაზა. ჩვენი პროექტი სხვადასხვა მიმართულებით ხუთასამდე ქართველ პროფესიონალს აერთიანებს, ეს იქნებიან - ექიმები, ხელოვანები, თუ სხვა. მიხარია, რომ ეს ადამიანები ძალიან აქტიურად არიან ჩართული ჩვენს პროექტებში. არაერთი მიმდინარე პროექტი გვაქვს. რა თქმა უნდა, სხვა პროექტებსაც ვაპირებთ და მიხარია. ჩვენი პლატფორმა არაა მხოლოდ ბაზა, ესაა ძალიან მასშტაბური პროექტი, იმიტომ რომ ამდენ ქართველი პროფესიონალს, რომელიც სხვადასხვა ქვეყანაში ცხოვრობს, შეუძლია თავისი ცოდნა და გამოცდილება გაუზიაროს საქართველოში, როგორც ახალგაზრდებს, ასევე საზოგადოების სხვა წევრებს.
კიდევ ერთხელ მინდა აღვნიშნო, რომ არ დამავიწყდება ის ფრაზა, როდესაც თქვენ სიმბოლურად დროშაზე დამიწერეთ - სადაც არ უნდა იყო, საქართველოს საქმე აკეთეო. ვცდილობ, სადაც ვიქნები იქ გავაკეთო საქართველოს საქმე უფრო დიდი მოტივაციით და უფრო სხვა ეტაპზე, რომ ვასახელო საქართველო და თქვენ.“
დაჯილდოების ცერემონია ორბელიანების სასახლეში გაიმართა.
ამერიკის შეერთებული შტატები “მშვიდობის საბჭოს” პირველი ოფიციალური სამიტისთვის ემზადება. პრეზიდენტ ტრამპის მიერ შექმნილი ახალი საერთაშორისო ორგანიზაციის პირველ სხდომას ვაშინგტონში მდებარე, ტრამპისვე სახელობის მშვიდობის ინსტიტუტი უმასპინძლებს.
არსებული ინფორმაციით, მას წევრი ქვეყნების უდიდესი ნაწილი, 20-ზე მეტი სახელმწიფოს ლიდერი დაესწრება. მათ შორის იქნებიან საუდის არაბეთის, თურქეთის, ეგვიპტის, კატარისა და ინდონეზიის წარმომადგენლები. ასევე სომხეთისა და აზერბაიჯანის მმართველები.
როგორც ირკვევა, პირველ სამიტზე პრეზიდენტი დონალდ ტრამპი ღაზას რეკონსტრუქციისთვის ფონდის შექმნას დააანონსებს და გამოაცხადებს, თუ როგორ დაკომპლექტდება ის “საერთაშორისო სტაბილიზაციის სამხედრო ძალა”, რომელიც ღაზას სექტორის საზღვარზე განლაგდება და უზრუნველყოფს, რომ ისრაელსა და ჰამასს შორის სამხედრო მოქმედებები აღარ განახლდეს.
ჯერჯერობით, უცნობია, ზუსტად რა რაოდენობის სამშვიდობოებს გაგზავნიან სახელმწიფოები, თუმცა ცნობილია, რომ ინდონეზიის კონტრიბუცია ამ მხრივ 8,000 ჯარისკაცი იქნება. რაც შეეხება ფინანსებს, პრეზიდენტი ტრამპი მოელის, რომ ღაზას სექტორის ხელახლა აღდგენისთვის წევრი სახელმწიფოებისაგან მილიარდობით დოლარს მოიზიდავს. შეგახსენებთ, “მშვიდობის საბჭოს” წევრობის საწევროს გადასახადი ერთ ქვეყანაზე $1 მილიარდია, თუმცა განსაზღვრული არ არის, ეს თანხა უნდა ჩაირიცხოს ერთიანად, თუ სხვადასხვა პროექტების ფარგლებში, მთელი წლის განმავლობაში. შესაბამისად, სავარაუდოა, რომ შტატების ლიდერი კოლეგებს ფონდში პირველადი ფინანსური კონტრიბუციის შეტანას სწორედ $1-მილიარდიანი ვალდებულების ფარგლებში სთხოვს.
რაც შეეხება ჰამასს, რომლის განიარაღებისა და ძალაუფლების ჩამორთმევის გარეშეც “მშვიდობის საბჭო” ღაზას სექტორის რეკონსტრუქციასა და ახალი ადმინისტრაციის სრულფასოვან მმართველობას ვერ უზრუნველჰყოფს, არსებული ინფორმაციით, მის ტერორისტებს საშუალება ექნებათ, სამშვიდობო ძალებს საკუთარი ნებით ჩააბარონ იარაღი და როგორც პალესტინის მშვიდობიანმა მცხოვრებლებმა, ისე განაგრძონ ცხოვრება. მათთვის, ვისაც ასეთ რეალობაში დარჩენა არ ენდომება, “მშვიდობის საბჭო” პარტნიორი ქვეყნების მეშვეობით ღაზას სექტორიდან გასვლაში დაეხმარება. შეგახსენებთ, ამჟამად ჰამასის ხელმძღვანელობის პოზიციაა, რომ ახალ ღაზაში დარჩენა და ჯარისკაცების საპოლიციო ძალებში გაწევრიანება სურთ, რათა იმ ბრძოლამ, რაც წლების განმავლობაში სექტორის დაცვისთვის გასწიეს, უკვალოდ არ ჩაიაროს. თუმცა როგორც ტრამპის ადმინისტრაცია, ისე ისრაელი ამ ფორმით ჰამასის ღაზაში დარჩენას კატეგორიულად ეწინააღმდეგებიან. სავარაუდოა, რომ შუამავალი სახელმწიფოები, რომლებიც “მშვიდობის საბჭოშიც” არიან წარმოდგენილი, 19 თებერვალს ამ საკითხზე აქტიურად იმსჯელებენ.
