,
პეკინში ენტონი ბლინკენისა და ცინ განის შეხვედრა დასრულდა. ჩინეთისა და ამერიკის პირველმა დიპლომატებმა ორმხრივი ურთიერთობის, ტაივანისა და უკრაინის საკითხები განიხილეს.
როგორც ჩინეთის საგარეო საქმეთა მინისტრმა აღნიშნა, ორი ქვეყნის ურთიერთობა დღეისათვის ყველაზე დაბალ ნიშნულზეა, რაც არც ვაშინგტონისა და არც პეკინის ინტერესებში არ შედის. მთავარ პრობლემად განმა ტაივანის პრობლემა დაასახელა და ვაშინგტონს კიდევ ერთხელ მოუწოდა, „ერთი ჩინეთის“ პრინციპს სცეს პატივი.
სახელმწიფო მდივანმა ენტონი ბლინკენმა პეკინში გამართა გულწრფელი, არსებითი და კონსტრუქციული მოლაპარაკებები ჩინეთის სახალხო რესპუბლიკის (PRC) სახელმწიფო მრჩეველთან და საგარეო საქმეთა მინისტრთან ცინ განგთან, - ამის შესახებ აშშ-ის სახელმწიფო დეპარტამენტის მიერ გავრცელებულ ინფორმაციაშია აღნიშნული.
უწყების ცნობით, სახელმწიფო მდივანმა ხაზი გაუსვა დიპლომატიის მნიშვნელობას და კომუნიკაციის ღია არხების შენარჩუნების მნიშვნელობას.
„სახელმწიფო მდივანმა ხაზი გაუსვა დიპლომატიისა და კომუნიკაციის ღია არხების შენარჩუნების მნიშვნელობას, რათა შემცირდეს არასწორი აღქმისა და არასწორი გაანგარიშების რისკი. სახელმწიფო მდივანმა წამოაყენა არაერთი შემაშფოთებელი საკითხი, ასევე ისაუბრა ჩინეთთან საერთო ტრანსნაციონალურ საკითხებზე თანამშრომლობის შესაძლებლობაზე, სადაც ჩვენი ინტერესები შეესაბამება. სახელმწიფო მდივანმა ნათლად აჩვენა, რომ შეერთებული შტატები ყოველთვის მხარს დაუჭერს ამერიკელი ხალხის ინტერესებსა და ღირებულებებს და იმუშავებს თავის მოკავშირეებთან და პარტნიორებთან ერთად ჩვენი ხედვის გასაუმჯობესებლად მსოფლიოზე, რომელიც არის თავისუფალი, ღია და იცავს საერთაშორისო წესებზე დაფუძნებულ წესრიგს“, - აღნიშნულია ინფორმაციაში.
ენტონი ბლინკენმა დიპლომატიისა და ღია დიალოგის აუცილებლობას გაუსვა ხაზი და ჩინელ კოლეგას განუცხადა, რომ შეერთებული შტატები საკუთარ ინტერესებს მომავალშიც დაიცავს. ცნობილი ხდება ისიც, რომ ბლინკენმა განი ოფიციალური ვიზიტით ვაშინგტონში მიიწვია.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
