,
ნეაპოლური გაზეთი Il Mattino „პარი სენ-ჟერმენის“ მხრიდან ხვიჩა კვარაცხელიას მიმართ ინტერესზე და შესაძლო ტრანსფერის ფინანსურ დეტალებზე წერს.
როგორც სტატიაშია აღნიშნული, პარიზელები მზად არიან „ნაპოლის“ 80 მილიონი ევრო შესთავაზონ, ხოლო კვარაცხელიას წელიწადში 8 მილიონი ევრო გადაუხადონ. თუმცა, „ნაპოლის“ პრეზიდენტ აურელიო დე ლაურენტისს 80 მილიონის შეთავაზება ეცოტავება.
„აძურის“ ბოსის აზრით, კვარას ფასი ოსიმენის იდენტურია და ისიც 120-130 მილიონი ევრო ღირს. გარდა ამისა, „ნაპოლი“ ზაფხულში დიდი ალბათობით, ვიქტორ ოსიმენს დაკარგავს, ამიტომ არ სურს, რომ იმავე ზაფხულს კვარაცხელიაც დაკარგოს.
ამ მიზეზით, მისი კონტრაქტის გახანგრძლივებაზე მოლაპარაკებები დიდი ხანია მიმდინარეობს. ხვიჩა სეზონში 1.5 მილიონ ევროს გამოიმუშავებს, ხოლო აურელიო დე ლაურენტისი მზადაა კვარას ხელფასი ბონუსების ჩათვლით გაუსამმაგოს.
წყაროს თანახმად, ქართველი ფეხბურთელის გარემოცვა წელიწადში 6 მილიონს ითხოვს, მაგრამ მხარეები, რომლებიც უკვე შეხვდნენ ერთმანეთს, უახლოეს მომავალში კიდევ ისაუბრებენ და ეცდებიან შეთანხმებას მიაღწიონ.
შეგახსენებთ, რომ ხვიჩა კვარაცხელიას მიმდინარე სეზონში ყველა ტურნირზე ჩატარებულ 43 მატჩში 10 გოლი აქვს გატანილი, ხოლო შვიდჯერ საგოლე პასი მიითვალა. ქართველ ნახევარმცველს იტალიურ კლუბთან მოქმედი კონტრაქტი 2027 წლის 30 ივნისამდე აკავშირებს.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
