,
„ყველაფერს თავისი საზღვარი აქვს, მათ შორის ევროკომისიის მეთაურის ურსულა ფონ დერ ლაიენის ხელისუფლებასაც“, - წერს ამერიკული გაზეთი „პოლიტიკო“ (Politico) თავის ევროპულ ვერსიაში (იბეჭდება ბრიუსელში, ბელგია) გამოქვეყნებულ სტატიაში სათაურით „ურსულა ფონ დერ ლაიენის მუდმივი სახელისუფლებო თამაშები ევროკავშირის წევრი ქვეყნების დედაქალაქებს აღიზიანებს“ (ავტორები - ბარბარა მუნსი და ჯაკობო ბარიგაცი). „ზოგიერთი ევროპელი ლიდერი აღშფოთებულია ურსულა ფონ დერ ლაიენის თვითნებური მოქმედებით და სურთ, რომ მას „ერთი ადგილი“ მიუჩინონ“, - აღნიშნულია პუბლიკაციაში.
გთავაზობთ სტატიას მცირე შემოკლებით:
ევროკავშირის მაღალჩინოსან დიპლომატებს შორის გაღიზიანება შეინიშნება ურსულა ფონ დელ ლაიენის ავტორიტარული ნაბიჯების გამო. კერძოდ, ამას წინათ მან ხელი მოაწერა ეპოქალურ სავაჭრო შეთანხმებას ევროკავშირსა და ლათინურამერიკულ ბლოკ „მერკოსურს“ (Mercosur) შორის და ეს გააკეთა ევროპის ერთ-ერთი უძლიერესი სახელმწიფოს - საფრანგეთის მიერ გამოხატული უკმაყოფილების მიუხედავად.
ურსულა ემანუელის წინააღმდეგ
„ურსულა ფონ დელ ლაიენი თავის მანდატს - ევროკომისიის პრეზიდენტის უფლებამოსილებას - თვითნებურად აფართოებს და უფრო მეტი ხელისუფლებით სარგებლობს, ვიდრე მისი წინამორბედები. ამის მაგალითია სავაჭრო ხელშეკრულების გაფორმება სამხრეთამერიკული სახელმწიფოების ეკონომიკურ ბლოკთან - „მერკოსურთან“, - ამბობს ერთ-ერთი დიპლომატი, ანონიმურობის პირობების დაცვით. საფრანგეთის პრეზიდენტი ემანუელ მაკრონი, რომელიც ამ გარიგების წინააღმდეგ გამოდის (ხელშეკრულება ფრანგი ფერმერების გაკოტრებას გამოიწვევს), ამჟამად ზღვისიქითა ტერიტორიაზე - მაიოტაზე - იმყოფება (აფრიკის აღმოსავლეთით), რომელსაც კატასტროფული ციკლონმა დიდი ზიანი მიაყენა.
ურსულა ფონ დერ ლაიენი პირველად არ მოქმედებს ევროკავშირის ორი საკვანძო ქვეყნის - საფრანგეთისა და გერმანიის წინააღმდეგ (მიუხედავად იმისა, რომ იგი თვითონ გერმანიის მოქალაქეა და მთავრობაში ოჯახის საქმეებისა და თავდაცვის მინისტრის პოსტი ეკავა). მიმდინარე წელს მან ბაჟი გაზარდა ევროპაში ჩინური ელექტრომობილების იმპორტზე, რომლის გამოც ბერლინმა უკმაყოფილება გამოხატა.
ევროპის კომიის თავმჯდომარის პოსტზე თავისი პირველი ხუთწლიანი ვადის დროს ურსულა ფონ დერ ლაიენმა ისეთი ადამიანის რეპუტაცია შეიძინა, რომელსაც თვითნებური და ცალმხრივი გადაწყვეტილებების მიღება ახასიათებს. იგი არცთუ იშვიათად არღვევდა თავის თანამდებობრივ ფუნქციებს და თვითნებურად დგამდა ისეთ ნაბიჯებს, რომლებიც მის უფლებამოსილებას აღემატებოდა. მან რიგ კომისრებს ფუქციები შეუკვეცა და თვითონ დაიმატა. „ურსულა ფონ დერ ლაიენი ყოველთვის თავისი პოზიციით მოქმედებს და სხვებს ყურადღებას არ აქცევს“, - ამბობს ერთ-ერთი ევროპელი ჩინოვნიკი.
არაფერი ეროვნული, მხოლოდ საერთოევროპული
ურსულას მომხრეები ბრიუსელში, ევროპის მემარჯვენე ცენტრისტული სახალხო პარტიის ლიდერის ჩათვლით ევროპარლამენტში, ამტკიცებენ, რომ კონტინენტის ნამდვილი ხელმძღვანელი სწორედ ისე უნდა მოქმედებდეს, როგორც ფონ დერ ლაიენი აკეთებს - უპირატესობა მისცეს საერთოევროპულ ინტერესებს, ეროვნულთან შედარებით.
„ევროპის კომისია არამარტო პასუხისმგებელია ყველაფერზე, მათ შორის ევროკავშირის სავაჭრო პოლიტიკაზე, არამედ ნამდვილი ლიდერობაც უნდა გამოამჟღავნოს“, - აცხადებს სახალხო პარტიის ხელმძღვანელი მანფრედ ვებერი, - ამიტომ მე პირადად მივესალმები და ყველანაირად ხელს შევუწყობ ურსულა ფონ დერ ლაიენს თავის მტკიცე პოზიციების გამო“.
მაგრამ სხვა თანამდებობის პირები აღშფოთებულნი არიან - არამარტო „მერკოსურთან“ გაფორმებული ხელშეკრულებით, არამედ საერთოდ ფონ დერ ლაიენის მიდგომების გამო.
„მან აღარ უნდა გააგრძელოს კიდევ ხუთი წელი პრინციპით „ნაბიჯი მარჯვნივ, ნაბიჯი მარცხნივ და კიდევ ერთი ნაბიჯი კონკრეტული ქვეყნისაკენ“, - აღნიშნავს ევროპარლამენტის ფრანგი დეპუტატი ქრისტოფ გრიუდლე, - „იგი კონსენსუსისაკენ უნდა ისწრაფვოდეს და პირდაპირი დავები კი არ უნდა გამოიწვიოს ევროკავშირის წევრ ქვეყნებთან, არამედ ისინი თავის პოზიციასა და სიმართლეში უნდა დაარწმუნოს“.
ევროკავშირის სხვა წევრი ქვეყნებისათვის ურსულა ფონ დერ ლაიენის წინააღმდეგ მიმართული კრიტიკა საკმაოდ უხერხულია, თუმცა ისინიც თანხმდებიან იმაში, რომ უფლებამოსილების განხორციელების დროს „წითელი ხაზები“ არ უნდა გადაიკვეთოს. ასეთი გამონათქვამები სულ უფრო ხშირად გაისმის.
ურსულას თვითნებობა: როდემდე?
ევროსაბჭოს პრეზიდენტთან ანტონიუ კოშტასთან სეხვედრის დროს ზოგიერთი ქვეყნის ხელმძღვანელმა სთხოვეს მას, რომ გადახედოს ევროკომისიასა და ევროსაბჭოს შორის ძალთა თანაფარდობის საკითხს.
არავისთვის საიდუმლო არ არის, რომ ურსულა ფონ დერ ლაიენს საკმაოდ დაძაბული ურთიერთობა ჰქონდა ანტონიუ კოშტას წინამორბედთან - შარლ მიშელთან, თუმცა როგორც მაღალჩინოსანი ევროპელი დიპლომატები იმედოვნებენ, თანამშრომლობა ურსულასა და ანტონიუს შორის უფრო ზომიერი და რბილი იქნება. თავის დროზე, როცა ანტონიუ კოშტა ჯერ კიდევ პორტუგალიის პრემიერ-მინისტრი იყო, თვითონ ურსულა ფონ დერ ლაიენმა უწინასწარმეტყველა მას ევროსაბჭოს პრეზიდენტის (თავმჯდომარის) პოსტი, თუმცა ახლახან ურსულას გამგზავრებამ თურქეთში, ანტონიუს გარეშე, საკმაო გაკვირვება გამოიწვია (როგორც ყოველთვის, ორივე თანამდებობის პირი ერთად მიემგზავრებიან ვიზიტით).
„ევროსაბჭოს ხელმძღვანელობაში უწესრიგობა შეინიშნება. ურსულა ფონ დერ ლაიენი ყველგან „ეტენება“. იგი მზადაა ყველანაირ ავანტიურაზე წავიდეს, მაგრამ ასეთი მოქმედება სარისკოა. მან კარგად იცის, თუ როგორი დამოკიდებულება აქვს საფრანგეთს „მერკოსურთან“ დადებული ხელშეკრულების მიმართ, მაგრამ მან მაინც თავისი გაიტანა. ფაქტიურად, ურსულა ფონ დელ ლაიენმა ემანუელ მაკრონი დაამცირა“, - ამბობს ერთ-ერთი ანონიმი ჩინოვნიკი.
ევროპის კომისიის პრეზიდენტს წინ დიდი სამუშაო ელოდება - იგი უნდა შეუთანხმდეს ევროკავშირის წევრ 27 სახელმწიფოს შვიდწლიანი ბიუჯეტის (ჩარჩო-გეგმის) თაობაზე, რაც გართულებულია იმით, რომ ბრიუსელი გამალებული ეძებს ფინანსებს როგორც თავდაცვისთვის, ასევე „მწვანე“ ეკონომიკაზე გადასვლისთვის. „ურსულა ფონ დერ ლაიენს აუცილებლად მოუწევს ამ შეთანხმების გაფორმება, საკუთარი პოლიტიკური მემკვიდრეობის განსამტკიცებლად, მაგრამ საკვანძო ქვეყნების მხარდაჭერის გარეშე არაფერი გამოუვა. შესაბამისად, იგი იძულებული გახდება მათი ინტერესები გაითვალისწინოს“, - ამბობს ანონიმი ევროპელი ჩინოვნიკი.
წყარო: https://www.politico.eu/article/ursula-von-der-leyen-power-play-exasperate-eu-capitals/
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
