აშშ-ის სამაუწყებლო კომპანიის „ამერიკის ხმის“ (Voice of America) ვებ-გვერდზე გამოქვეყნებულია სტატია სათაურით „შეკითხვა ნიკოლ ფაშინიანს ჯავახეთიდან, რომელსაც სოხუმსა და ცხინვალში ანტისომხური დემარში მოჰყვა“.
გთავაზობთ პუბლიკაციას სრული სახით:
სომხეთის პრემიერ-მინისტრისთვის საქართველოს სამცხე-ჯავახეთის რეგიონიდან - ქალაქ ნინოწმინდიდან - პირდაპირ ეთერში დასმულმა კითხვამ, რომლის ავტორიც სომხური წარმოშობის საქართველოს მოქალაქე ანდრანიკ კარსლიანი იყო, საქართველოს ოკუპირებულ ტერიტორიებზე დიდი აჟიოტაჟი და ანტისომხური დემარში მოჰყვა.
ანდრანიკ კარსლიანმა სომხეთის პრემიერ ნიკოლ ფაშინიანს პირდაპირ ეთერში ჰკითხა, მზად არის თუ არა, რომ სომხეთის მთავრობამ „აფხაზეთი და სამხრეთ ოსეთი რუსეთის მიერ ოკუპირებულ ტერიტორიებად აღიაროს?“
„მიუხედავად იმისა, რომ პასუხი არ იყო პირდაპირი, მე ვფიქრობ, რომ საქართველოში პასუხით ყველა კმაყოფილია“ - უთხრა „ამერიკის ხმას“ ანდრანიკ კარსლიანმა. მისი აზრით, „ამ კითხვამ, რომელმაც სამცხე-ჯავახეთიდან გაიჟღერა და ფაშინიანის პასუხმა, ვფიქრობ, სომხურ-ქართული ურთიერთობები გააუმჯობესა“.
ანდრანიკ კარსლიანის შეკითხვაზე სომხეთის პრემიერმა პირველად ღიად აღნიშნა, რომ „სრულად და ცალსახად უჭერს მხარს საქართველოს სუვერინტეტს, დამოუკიდებლობას, ერთიანობას, ტერიტორიულ მთლიანობას და დემოკრატიას“.
ამასთან, ნიკოლ ფაშინიანმა ყურადღება გაამახვილა იმ ფაქტზე, რომ სომხეთმა 2019 წლიდან პოლიტიკა შეცვალა და გაეროში წინააღმდეგ აღარ აძლევს ხმას საქართველოს მიერ 2008 წლიდან ინიცირებულ რეზოლუციას, აფხაზეთისა და სამხრეთ ოსეთიდან დევნილთა სტატუსის შესახებ.
2019 წლამდე სომხეთისთვის, მთიანი ყარაბაღის ფაქტორის გამო, რეზოლუციის ის ნაწილი, სადაც საქართველოს ოკუპირებულ ტერიტორიებზე დევნილების დაბრუნებაზე იყო საუბარი, მიუღებელი იყო. 2019 წლიდან, ერევანმა ეს პოზიცია შეცვალა და რეზოლუციის კენჭისყრის დროს, როგორც რუსეთის მოკავშირე, მონაწილეობას აღარ იღებს.
2023 წლის შემოდგომიდან, მას შემდეგ რაც აზერბაიჯანმა ყარაბაღზე სუვერენიტეტი სრულად აღადგინა, სომხეთი უკვე ცალსახად აცხადებს, რომ საქართველოს ტერიტორიულ მთლიანობას მხარს უჭერს.
„თქვენი ყურადღება მინდა მივაქციო 2019 წლამდე და შემდეგ სომხეთის მიერ გაერო-ში ხმის მიცემების მიდგომების განსხვავებებს, რაზეც საქართველოს მხარემ თავისი კმაყოფილება გამოუცხადა ჩვენს მხარეს“ - განაცხადა ფაშინიამა ვიდეოპრესკონფერენციაზე, რომელიც პირდაპირ ეთერში ორსაათნახევარი გაგრძელდა.
საქართველოს ოკუპირებულ ტერიტორიებზე, ნიკოლ ფაშინიანის განცხადებას პირველად ოკუპირებული ცხინვალიდან უპასუხეს. „ნიკოლ ფაშინიანმა უღალატა საკუთარ ხალხს, რომლებიც დახმარებას სომხეთისგან ელოდნენ, ვერ იპოვა საკუთარ თავში გამბედაობა, ეღიარებინა არცახის (მთიანი ყარაბაღის) დამოუკიდებლობა და ჩვენ არ გვაინტერესებს ასეთი პოლიტიკოსების აზრი“ - აღნიშნა ოსი სეპარატისტების ლიდერმა ალან გაგლოევმა.
„აფხაზეთში სომხებს აქვთ ყველაფერი, რისი გარანტირებაც ნიკოლ ფაშინიანმა ვერ შეძლო ყარაბაღელი სომხებისთვის, რომლებიც მისი პოლიტიკის შედეგად სახელმწიფოებრიობის დაშლისა და მშობლიური მიწიდან მასობრივი გასახლების ტრაგედიის წინაშე აღმოჩნდნენ“ - ასე გამოეხმაურა ნიკოლ ფაშინიანის განცხადებას, აფხაზი სეპარატისტების ლიდერი ასლან ბჟანია.
ნიკოლ ფაშინიანის გამოსვლა ერევანში ცინიკურად შეაფასეს, ე.წ. „აფხაზური კრების“ სომეხმა წევრებმა, მათ შორის, გაგრელმა გალუსტ ტრაპიზონიანმა, რომელიც აფხაზეთის ომის დროს, ეთნიკური სომხებით დაკომპლექტებული „ბაგრამიანის ბატალიონის“ ერთ-ერთი საველე მეთაური იყო და გუმისთისთვის ბრძოლაში ფეხიც დაკარგა. სამხედრო დამნაშავე ტრაპიზონიანს „აფხაზთა გმირის“ წოდება აქვს მინიჭებული.
„ცინიკურია არა იმიტომ, რომ აფხაზეთს, როგორც დამოუკიდებელ სახელმწიფოს, არავითარი კავშირი არ აქვს სუვერენულ საქართველოსთან, არამედ იმიტომ, რომ რამდენიმე წლის წინ ერევანმა ხმამაღლა განაცხადა, რომ არცახი სომხეთია და არ დაუშვებს აზერბაიჯანის მხრიდან ყარაბაღის ტერიტორიაზე შეჭრას“ - ნათქვამია ე.წ „აფხაზთა კრების“ სომეხ წევრთა განცხადებაში.
„ეს რეაქცია ოკუპირებული ტერიტორიებიდან, აფხაზეთიდან და შიდა ქართლიდან მოსალოდნელი იყო“ - უთხრა „ამერიკის ხმას“ ანდრანიკ კარსლიანმა. მისი აზრით, „იქ მცხოვრებ სომხებს შეუძლიათ მნიშვნელოვანი წვლილი შეიტანონ საქართველოს გამთლიანებაში და ქართულ-აფხაზური და ქართულ-ოსური ურთიერთობების აღდგენაში“.
საქართველოს მოქალაქე ანდრანიკ კარსლიანი ნინოწმინდელია, არის ყოფილი სპორტსმენი, რომელიც 12 წლის მანძილზე ქალაქ ნინოწმინდის კომპლექსური სასპორტო სკოლის დირექტორი იყო. აქვს იურიდიული განათლება, სწავლობდა ზურაბ ჟვანიას სახელობის სახელმწიფო ადმინისტრირების სკოლაში. მისი თქმით, როცა შეიტყო, რომ სომხეთის პრემიერ ნიკოლ ფაშინიანისთვის პირდაპირ ეთერში კითხვის დასმა შეიძლებოდა, მაშინვე გადაწყვიტა, რომ საქართველოს ოკუპირებული ტერიტორიების შესახებ ეკითხა.
წყარო: https://www.amerikiskhma.com/a/7377499.html
გლობალური ფინანსური ქსოვილი სხვადასხვა ტიპის კომპანიების ურთიერთქმედებაზე დგას. ფინანსურ ეკოსისტემაში ვხვდებით, როგორც ბანკებს, ასევე ნეობანკებს და ფინტექ-კომპანიებს, საპენსიო ფონდებს, საგადახდო სერვისების მიმწოდებელ ორგანიზაციებს, კერძო კაპიტალის მმართველებს, ჰეჯ-ფონდებსა და აქტივების მმართველ კომპანიებს. აი, სწორედ ამ ბოლო კატეგორიას განეკუთვნება ამერიკული BlackRock-ი, რომელიც სხვა ადამიანებისა და კომპანიების აქტივებს მართავს, ანუ მარტივად რომ ვთქვათ, ინვესტიციას მათ ნაცვლად დებს. გამართული ბიზნესმოდელის გარდა, ამერიკულ კორპორაციას მაღალი რეპუტაცია, ინვესტორებისთვის ფინანსური სარგებლის გენერირების დეკადების განმავლობაში დამტკიცებული შედეგები და პლანეტარული მასშტაბის კავშირები გამოარჩევს.
ამ ყველაფრის დამსახურებით, BlackRock-ი პლანეტის უდიდეს აქტივების მმართველ კომპანიად იქცა, რომლის პორტფელი, ბოლო შედეგებით, $10.5 ტრილიონად იყო შეფასებული. 2024 წლის პირველი კვარტალის ფინანსური ანგარიშის თანახმად, გასულ ერთ წელიწადში, ამერიკულმა კორპორაციამ აქტივების ზომა $1.4 ტრილიონით გაზარდა. ამ თანხის მასშტაბს რომ მიხვდეთ, გეტყვით, რომ მექსიკის მთლიანი შიდა პროდუქტი სწორედ $1.4 ტრილიონია, როცა ესპანეთის, ინდონეზიის და საუდის არაბეთის - ნაკლები. თუმცა BlackRock-ის ჯამური აქტივების ზომა უფრო შთამბეჭდავია, რადგან ამ მაჩვენებელს ქვეყნების მშპ-სთან თუ შევაფარდებთ, აღმოვაჩენთ, რომ მას მხოლოდ ამერიკის შეერთებული შტატები და ჩინეთი უსწრებს.
რა შემოსავალს და წმინდა მოგებას აგენერირებს BlackRock-ი $10.5 ტრილიონად შეფასებული აქტივების მართვით?
2024 წლის I კვარტალში, BlackRock-მა $4.7 მილიარდის შემოსავალი მიიღო, რაც 11%-ით მეტია, ვიდრე შარშან. შემოსავალთან ერთად, ბოლო პერიოდში მკვეთრად, კერძოდ 36%-ითაა გაზრდილი კომპანიის წმინდა მოგება, რომელმაც მიმდინარე წლის პირველ სამ თვეში $1.5 მილიარდი შეადგინა. აღნიშნულ მაჩვენებლებს, უმეტესწილად, ის ფინანსური ინსტრუმენტები აგენერირებენ, რომელთაც BlackRock-ის პორტფელში ვხვდებით - აქ იგულისხმება, როგორც კომპანიების კაპიტალი, ანუ აქციები, ასევე ფიზიკური აქტივები, მათ შორის უძრავი ქონება.
აქციების კუთხით, BlackRock-ის აქტივებს შორის ყველაზე დიდი წილი მსოფლიოს უდიდეს ტექნოლოგიურ, ფარმაკოლოგიურ და ფინანსურ კომპანიებზე მოდის. BlackRock-ის აქციების პორტფელის ათი უდიდესი პოზიცია კი, შემდეგნაირად გამოიყურება:
#1 - Microsoft - $229.7 მილიარდად შეფასებული 542.02 მილიონი აქცია (BlackRock-ის პორტფელის 5.37%)
#2 - Apple - $178.4 მილიარდად შეფასებული 1.04 მილიარდი აქცია (BlackRock-ის პორტფელის 4.17%)
#3 - NVIDIA - $164.66 მილიარდად შეფასებული 182.42 მილიონი აქცია (BlackRock-ის პორტფელის 3.85%)
#4- Amazon - $115.18 მილიარდად შეფასებული 638.54 მილიონი აქცია (BlackRock-ის პორტფელის 2.69%)
#5 - META - $77.18 მილიარდად შეფასებული 158.94 მილიონი აქცია (BlackRock-ის პორტფელის 1.8%)
#6 - Alphabet (Class A) - $62.77 მილიარდად შეფასებული 415.9 მილიონი აქცია (BlackRock-ის პორტფელის 1.47%)
#7 - Alphabet (Class C) - $54.11 მილიარდად შეფასებული 355.37 მილიონი აქცია (BlackRock-ის პორტფელის 1.27%)
#8 - Eli Lilly - $50.78 მილიარდად შეფასებული 65.27 მილიონი აქცია (BlackRock-ის პორტფელის 1.19%)
#9 - Broadcom - $46.27 მილიარდად შეფასებული 34.91 მილიონი აქცია (BlackRock-ის პორტფელის 1.08%)
#10 - Berkshire Hathaway (Class B) - $45.21 მილიარდად შეფასებული 107.51 მილიონი აქცია (BlackRock-ის პორტფელის 1.06%)
წყარო:https://bm.ge/