,
აშშ-ის სამაუწყებლო კომპანია Voice of America („ამერიკის ხმა“) თავის ვებ-გვერდზე აქვეყნებს სტატიას სათაურით „ქართული საზოგადოების მისწრაფებები და ოცნებები ერთი ინდივიდის - ბიძინა ივანიშვილის - უკმაყოფილებების მძევალია“, რომელშიც გადმოცემულია აშშ-ის სახელმწიფო დეპარტამენტის თანამშრომლების ჯონ ბასისა და ჯიმ ო’ბრაიანის თვალსაზრისები საქართველოსთან მიმართებით, 24 ივნისს გაკეთებული განცხადებების საფუძველზე.
გთავაზობთ პუბლიკაციას:
პოლიტიკურ საკითხებში აშშ-ის სახელმწიფო მდივნის მოადგილის მოვალეობის შემსრულებელმა ჯონ ბასმა, ბრიუსელში, პრესისთვის გამართულ ბრიფინგზე საქართველოს შესახებ ისაუბრა. ჯონ ბასი, 2009-2012 წლებში, საქართველოში ამერიკის ელჩი იყო. მან ქართველი ჟურნალისტის შეკითხვას უპასუხა საქართველოს ნატოსთან დაახლოების პერსპექტივებთან დაკავშირებით.
“დასაწყისისთვის ვიტყოდი, რომ ბევრი ჩვენგანისთვის, ვინც საქართველოში დრო დავყავით ან ვმუშაობდით ქართველებთან, განსაკუთრებით 2008 წლის კონფლიქტის შემდეგ, რაც კიდევ ერთი მაგალითია რუსეთი მცდელობისა ეკარნახა თუ როგორ უნდა იცხოვროს მეზობელმა ქვეყანამ და ჰქონდეს თუ არა ამ ქვეყანას თავისუფალი არჩევანი თავისი უსაფრთხოების დასაცავად იურთიერთოს, ამ შემთხვევაში ნატოსთან, ძალიან შემაშფოთებელია ქართული ოცნების მთავრობის ევოლუციის ხილვა ბოლო წლებში და განსაკუთრებით ბოლო თვეების განმავლობაში. და, იცით, თუ ვინმე პირდაპირ იკითხავს თუ როდის გახდება საქართველო ნატოს წევრი - ამაზე პასუხი არის ის, რომ საქართველო გახდება წევრი, როცა მოკავშირეები ჩათვლიან, რომ ის მზადაა შეასრულოს ის ვალდებულებები, რომლებიც თანსდევს წევრობას, მათ შორის, დაიცავს პრინციპებს, დემოკრატიული მმართველობის ფუნდამენტური პრინციპების ჩათვლით, რომ ხალხი თავისუფალია აირჩიოს საკუთარი ლიდერები. სამწუხაროდ, მას შემდეგ, რაც მე ვიყავი ელჩი საქართველოში, ჩვენ არ გვინახავს საქართველოს წინსვლა ამ მიზნებისკენ. სამწუხაროდ, ბევრი უკუსვლა ვიხილეთ”, - თქვა ბასმა.
სახელმწიფო დეპარტამენტის მაღალჩინოსნის განცხადებით, დღეს ქართული საზოგადოების მისწრაფებები “ერთი ინდივიდის, ბიძინა ივანიშვილის უკმაყოფილებების მძევალია”.
„როგორც აშშ-ის ელჩი, რომელმაც ბევრი სამუშაო გავწიე იმის უზრუნველსაყოფად, რომ ყოფილიყო პირობები, რათა "ქართული ოცნებისთვის" სამართლიანი კონკურენცია ყოფილიყო გარანტირებული 2012 წლის საპარლამენტო არჩევნებზე, ღრმად შემაშფოთებელია იმის დანახვა, რომ იგივე ჯგუფი ახლა ანადგურებს დემოკრატიული მმართველობის საფუძვლებს საზოგადოებაში. ბოლოს, ვიტყოდი, რომ ღრმად შემაშფოთებელი და სამწუხაროა იმის ხილვა, რომ მთელი საზოგადოების მისწრაფებები და ოცნებები ერთი ინდივიდის, ბიძინა ივანიშვილის უკმაყოფილებების მძევლია”, - თქვა მან.
24 ივნისს განცხადება გააკეთა სახელმწიფო დეპარტამენტის კიდევ ერთმა წარმომადგენელმა ჯიმ ო’ბრაიანმა და თქვა, რომ საქართველოს ხელისუფლების წარმომადგენლები, როგორც ალიანსის პარტნიორი ქვეყნის წარმომადგენლები, მიწვეულნი არიან ნატოს ვაშინგტონის სამიტზე, რომელიც აშშ-ის დედაქალაქში ივლისში გაიმართება.
“საქართველო და ყველა პარტნიორი იქნება მოწვეული პარტნიორობის ღონისძიებებში მონაწილეობის მისაღებად. ძალიან გვაწუხებს „ქართული ოცნების“ ლიდერების ძალიან მცირე რაოდენობის გადაწყვეტილებები და რიტორიკა. ნათელია, რომ ქართველი ხალხის 80-დან, 85%-მდე [რაოდენობას] ევროკავშირთან და ნატოსთან უფრო დაახლოება სურს ”, - განაცხადა 25 ივნისს ჯიმ ო’ბრაიანმა, ევროპისა და ევრაზიის საკითხებში სახელმწიფო მდივნის თანაშემწემ.
პრესასთან საუბარში, ჯიმ ო’ბრაიანმა აღნიშნა, რომ საქართველოს ხელისუფლების წარმომადგელებთან შეერთებული შტატები კომუნიკაციაშია. მან კიდევ ერთხელ მოუწოდა “ქართული ოცნების” ლიდერებს გადახედონ უკანასკნელ ნაბიჯებს, მათ შორის ე.წ. “აგენტების” კანონთან დაკავშირებით.
“მთავრობა, და ჩვენ ვნახეთ პრემიერ-მინისტრმა ცოტა ხნის წინ, ამბობს რომ მათი უკანასკნელი ნაბიჯები არ უქმნის საფრთხეს ამ [ევრო-ატლანტიკურ] გზას. ჩვენ შევეცადეთ ვყოფილიყავით ძალიან მკაფიონი და ვფიქრობ, უმაღლესმა წარმომადგენელმა ჯოსეფ ბორელმა დღეს ძალზედ ნათლად თქვა, რომ ბოლო ქმედებები, ძალადობა ოპოზიციის წარმომადგენლებზე და ძალადობა სამოქალაქო საზოგადოებაზე, მოსკოვზე მოდელირებული უცხოური აგენტის კანონი და გადაწყვეტილება, რომ ახალი პორტი ჩინურ კომპანიას დაუთმონ, ეს ყველაფერი შეუთავსებელია აშშ-ისა და ევროკავშირის დაფუძნებულ საერთაშორისო ორგანიზაციებში გაწევრიანების სურვილთან. ამიტომ, ჩვენ ვთხოვთ მთავრობას გადახედოს თავის პოზიციას”, - თქვა მან.
ჯიმ ო’ბრაიანმა კიდევ ერთხელ გაუსვა ხაზი იმას, რომ საქართველომ, თუ მას სურს დასავლურ ორგანიზაციებში გაწევრიანება, უნდა გაითვალისწინოს ამ ორგანიზაციათა პირობები.
“და ჩვენ გავაგრძელებთ მთავრობასთან ჩვენი ორმხრივი თუ მრავალმხრივი თანამშრომლობის გადახედვას. ეს მართლაც საკმაოდ მარტივია. ევროპის ფეხბურთის ჩემპიონატი რომ ავიღოთ მაგალითად, - საქართველომ განაცხადა, რომ უნდა ითამაშოს ჩვენს საფეხბურთო ლიგაში და მერე თქვა, ოჰ, სხვათა შორის, ჩვენ გვსურს გვყავდეს 15 ფეხბურთელი მოედანზე. არა - იგივე რაოდენობის მოთამაშეები უნდა გყავდეს, როგორც ყველას. თუ გინდა ითამაშო ეს ისე უნდა გააკეთო, როგორც ყველა სხვა აკეთებს. ეს არის კლუბის წესები. ამიტომ, ეს არ ეხება საქართველოს სუვერენიტეტს, საქართველომ სუვერენულად გადაწყვიტა, რომ სურს კლუბში გაწევრიანება. და ჩვენ უბრალოდ ვხსნით რას ნიშნავს ეს. ჩვენ გავაგრძელებთ ამ დისკუსიებს ქართველ ოფიციალურ პირებთან. იმავდროულად, ჩვენი საელჩო აქტიურადაა ჩართული მათთან კომუნიკაციაში და ევროკავშირის ცალკეული ლიდერები აქტიურნი არიან. ჩვენ გავაგრძელებთ ამ საუბრებს”, - თქვა მან.
ჯიმ ო’ბრაიანი საქართველოში ვიზიტით მაისში იმყოფებოდა. მაშინ მან მოუწოდა მმართველი პარტიის ლიდერებს უკან გაეწვიათ ე.წ. “უცხო ქვეყნის აგენტების” კანონი. მას შემდეგ, რაც “ქართულმა ოცნებამ” კანონი მიიღო, შეერთებულმა შტატებმა ქართველი ოფიციალური პირების, პარლამენტარების და ცალკეული ინდივიდების წინააღდეგ სავიზო შეზღუდვები დააწესა.
წყარო: https://www.amerikiskhma.com/a/7668259.html
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
