,
თბილისის მერიამ ნუცუბიძის I მიკრორაიონში მდებარე, 3 კორპუსის შემაერთებელი ხიდის რეაბილიტაციისთვის ტენდერი მესამედ გამოაცხადა. პირველ არშემდგარ ტენდერში შესყიდვის სავარაუდო ღირებულება 324 807 ლარი იყო, მეორედ 487 470, ამჯერად ღირებულება გაორმაგებულია და 681 529 ლარს შეადგენს. შესყიდვების სააგენტოს ვებგვერდზე გამოქვეყნებული კომენტარების თანახმად სატენდერო დოკუმენტაციაში აღმოჩენილი იქნა მნიშვნელოვანი შეცდომები, რიცხვების დაკორექტირების შემდეგ კი ღირებულებაც მნიშვნელოვნად შეიცვალა.
დოკუმენტაციის თანახმად სამუშაოების შესრულების ვადა 4 თვე, საგარანტიო ვადა კი 3 წელია.
როგორც საპროექტო დოკუმენტაციაშია აღნიშნული ტექნიკური შესწავლის შედეგად გამოვლინდა შემდეგი დეფექტები: ლითონის კონსტრუქციების ზედაპირული კოროზია; დაბზარული და გარკვეულ ადგილებში დაშლილი ასფალტბეტონის საფარი, დაბზარული კიბეები, ხიდებზე არ არის განათება და ა.შ.
როგორც დოკუმენტაციაშია ნათქვამი, ხიდზე სარეაბილიტაციო სამუშაოების დროს, ხიდი დროებით დაიკეტება და მოქალაქეები ვეღარ ისარგებლებენ.
შ.ნუცუბიძის I მ/რ კორპ. #213/1, კორპ. 213/2 და ნუცუბიძის I მ/რ. კორ. #3-ის დამაკავშირებელი საფეხმავლო ხიდები წარმოადგენენ 1974წ. აშენებული საცხოვრებელი კომპლექსის “შატილის” ნაწილს.
საცხოვრებელი კომპლექსი “შატილი” დაპროექტდა და აშენდა მე-20 საუკუნის 70-იან წლებში. პროექტი შემუშავდა ორგანიზაცია „თბილქალაქპროექტში”, არქიტექტორ ოთარ კალანდარიშვილის ხელმძღვანელობით.
სამი თექვსმეტსართულიანი კორპუსი, რომლებიც სხვადასხვა სიმაღლეზეა აშენებული, ერთმანეთს ლითონის კონსტრუქციის საფეხმავლო ხიდით უკავშირდება.ხიდი ნუცუბიძის ქუჩას პირველი მიკრორაიონის ზედა პლატოსთან აკავშირებს. გადასასვლელი ხიდი პირველი კორპუსის მე-14 სართულზე იწყება, გადადის შემდეგი კორპუსის მე-12-ზე და საბოლოოდ უერთდება მესამე კორპუსის მე-10 სართულს საიდანაც შემდეგ ავტობუსის გაჩერებასთან, საავტომობილო გზას უერთდება.
წყარო: მთავარი არხი
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
